ގްރީންލޭންޑްގެ ކޮންޓްރޯލް އެމެރިކާއަށް ލިބޭނެ ކަމަށް ގަބޫލުކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ހޮނިހިރު ދުވަހު އެއާރފޯސް ވަން ގައި ނޫސްވެރިންނާއި ވާހަކަފުޅު ދައްކަވަމުން ޓްރަމްޕް ވިދާޅުވީ ގްރީންލޭންޑް ލިބެންޖެހޭކަމަށް ގަބޫލުކުރައްވާކަމަށާއި، އެ ރަށުގެ 57،000 މީހުން ބޭނުންވަނީ އެމެރިކާ މީހުންނާއެކު ތިބެންކަމަށެވެ.

އޭނާ މިހެން ވިދާޅުވެފައި މިވަނީ މިދިޔަ ހަފުތާގައި ޑެންމާކުގެ ރައީސް އާއި ދެމެދު ފޯނުން ދެކެވުނު ހޫނު ވާހަކަތަކަށް ފަހު ގްރީންލޭންޑް ވިއްކާލަން ނުޖެހޭ ކަމަށް ޑެންމާކުގެ ބޮޑުވަޒީރު މެޓް ފްރެޑްރިކްސަން ވިދާޅުވެފައިވަނިކޮށެވެ.

ޓްރަމްޕް ވަނީ 2019 ވަނަ އަހަރު އޭނާގެ ވެރިކަމުގެ ފުރަތަމަ ދައުރުގައިވެސް ގްރީންލޭންޑް ހިމެނޭ އާކްޓިކްގެ ބޮޑު ސަރަހައްދު ގަތުމުގެ ޝައުގުވެރިކަން ފާޅުކުރައްވައިފައެވެ. އަދި ގްރީންލޭންޑްގެ މައްޗަށް އެމެރިކާގެ ކޮންޓްރޯލް އޮތުމަކީ ބައިނަލްއަގްވާމީ ސަލާމަތަށް ވަރަށް ބޮޑަށް ބޭނުންވެފައިވާ ކަމެއް ކަމަށް ވެސް އޭނާވަނީ ކުރިން ވިދާޅުވެފައެވެ.

ޓްރަމްޕް މިމޭރުމުން ވަރަށް ޔަގީން ކަމާއެކު ވާހަކަފުޅު ދެއްކެވި ނަމަވެސް ގްރީންލޭންޑާއި ޑެންމާކުގެ ބޮޑުވަޒީރު ވެސް މީގެ ކުރިން ވިދާޅުވެފައި ވަނީ އެ ރަށް ދޫނުކުރާނެ ކަމަށެވެ.

އަދި އެ ސަރަހައްދުގެ ބިން ބޭނުން ކުރުމަކީ ގްރީންލޭންޑްގެ އަމިއްލަ ކަމެއް ކަމަށާއި، ނަމަވެސް ދިފާއީ އަދި މައިނިންގެ ދާއިރާއިން އެމެރިކާއާ އެކު އިތުރަށް ގާތުން މަސައްކަތް ކުރަން ޝައުގުވެރިވާ ކަމަށް ގްރީންލޭންޑްގެ ބޮޑުވަޒީރު މުޓޭ އެގެޑޭ ވަނީ ވިދާޅުވެފައެވެ.

ގްރީންލޭންޑަކީ ގްރީންލޭންޑްގެ ރައްޔިތުންނަށް ނިސްބަތްވާ ތަނެއް ކަމަށާއި އެ ގައުމުގެ މުސްތަގުބަލު ކަނޑައަޅާނެ ހަމައެކަނި ބަޔަކީ އެގައުމުގެ ރައްޔިތުން ކަމަށް މި މަހުގެ ކުރީކޮޅު ޑެންމާކުގެ ބޮޑުވަޒީރު ފްރެޑްރިކްސަންވެސް ވަނީ ވިދާޅުވެފައެވެ.