ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ހިންގުން އެ ޕާޓީގެ ޕާލަމެންޓްރީ ގްރޫޕްގެ ލީޑަރު އިބްރާހިމް ފަލާހްއާއިހަވާލުކުރި ކަމަށް ބުނެ، މީޑިއާތަކުގައި ރިޕޯޓުކޮށްފައިވާ ހަބަރުތައް އެޕާޓީން ދޮގު ކޮށްފި އެވެ.

ބައެއް މީޑިއާތަކުގައި ރިޕޯޓު ކޮށްފައި ވަނީ ޕީއެންސީގެ ޗެއާޕާސަންގެ މަގާމުގައި ހުންނެވި ރައްޔިތުންގެ މަޖިލީހުގެ ރައީސް އަބްދުއްރަހީމް މަސްއޫލިއްޔަތުތަކުން އެކަހެރިކޮށް ޕާޓީގެ ހިންގުން ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހާއި ހަވާލުކޮށްފައިވާކަމަށެވެ. އަދި ޕާޓީ ހިންގުމުގެ ހުރިހާ ބާރެއް ފަލާހަށް ދީފައިވާ ކަމަށެވެ.

Ad by Hajj Corporation

އެހެން ނަމަވެސް އެޕާޓީން ވަނީ އެކަން ދޮގުކޮށްފަ އެވެ. ޕީއެންސީން ބުނީ ޗެއާޕާސަން އަބްދުއްރަހީމްގެ މަސްއޫލިއްޔަތުތަކުން އެކަހެރިކޮށްފައި ނުވާ ކަމަށެވެ. އަދި ޕާޓީގެ ހިންގުން ޕީޖީ ލީޑަރު ފަލާހްއާއި ހަވާލުކުރި ވާހަކަ އެއީ ކަނޑައެޅިގެން ދޮގެއް ކަމަށެވެ.

މިވާހަކަފެތުރިފައިވާއިރު ރައީސް ޑރ.މުހައްމަދު މުއިއްޒުއާއި އަބްދުއްރަހީމް އާއި އޮތް ގުޅުން ހީނަރުވެފައިވާ ކަމަށް ބުނެ ވަނީ އަޑުފެތުރިފަ އެވެ.

ޓޫރިޒަމް މިނިސްޓަރުގެ މަގާމުން، އަބްދުއްރަހީމްގެ ދަރިކަލުން އިބްރާހިމް ފައިސަލް ވަކިކުރެއްވުމާ އެކު، ރައީސާއި އަބްދުއްރަހީމް އާ ދެމެދު ނުތަނަވަސްކަން އުފެދިފައިވާ ކަމުގެ އަޑުތަކެއް ފެތުރުނެވެ.ނަމަވެސް ރައީސް އާއި އަބްދުއްރަހީމް އާއި އޮތް ގުޅުން ހީނަރު ނުވާކަމަށް މީގެ ކުރިން އަބްދުއްރަހީމްވެސް ވަނީ ވިދާޅުވެފަ އެވެ.