ވޭތުވެ ދިޔަ ހަފްތާ އެންމެ ބާރަށް ދެކެވުނު އެއްވާހަކަ އަކީ އިދިކޮޅު އެމްޑީޕީގެ މުޒަހަރާޤއެއްގައި އެޕާޓީގެ އިސް އެކްޓިވިސްޓަކު ރާއްޖޭގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ދަރިކަލުންނާ ގުޅުވާ ދެއްކި ވާހަކަ އެއްގެ މައްސަލައެވެ.

އިދިކޮޅު އެމްޑީޕީން މާލޭގައި ބޭއްވި މުޒާހަރާގައި އެޕާޓީގެ އެކްޓިވިސްޓެއް ކަމަށްވާ މަރިޔަމް ޒުބެއިރު (މަންދީ) ކުޑަކުއްޖެއްގެ ޙައްގުތަކަށް އުނިކަން އަންނަ ގޮތަކަށް ދެއްކި ވާހަކަތަކާއި ގުޅިގެން ވަޒީރުންނާއި އާންމުންގެ ގިނަ ބަޔަކު އަންނަނީ ކަންބޮޑުވުން ފާޅުކޮށް އެކަން ކުށްވެރިކުރަމުންނެވެ.

އެމްޑީޕީގެ އެކްޓިވިސްޓު މަރްޔަމް ޒުބައިރު ދެއްކި ވާހަކަތައް އިލެކްޝަންސް ކޮމިޝަނާއި ހިއުމަން ރައިޓްސް ކޮމިޝަނުން ވަނީ ކުށްވެރިކޮށްފަ އެވެ. އަދި އެ މައްސަލައިގައި ޤާނޫނީ ފިޔަވަޅު އެޅުމަށާއި، އެކަށީގެންވާ އަދަބު ދިނުމަށް ޗައިލްޑް އެބިއުސް ޕްރިވެންޝަން ސޮސައިޓީންވެސް ގޮވާލާފައިވެ އެވެ.

މީގެއިތުރުން ރައީސްގެ އާއިލާއިން ވަނީ އެޕާޓީގެ ޗެއާޕާސަން ފައްޔާޒް އިސްމާއިލާއި ޕާޓީގެ އިސް އެކްޓިވިސްޓު މަރިޔަމް ޒުބެއިރު (މަންދީ)ގެ އިތުރުން އެމްޑީޕީގެ މައްޗަށް ދައުވާކުރަން ނިންމާފަ އެވެ.

އާއިލާގެ ގާނޫނީ ވަކީލު އަދި ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވިދާޅުވީ ފައްޔާޒުއާއި މަންދީ އަދި އެމްޑީޕީގެ މައްޗަށް މަދަނީ ދައުވާއެއް ކުރާނެ ކަމަށެވެ. މި ދައުވާ ކުރަނީ ރައީސްގެ ދަރިކަލުންނާއި ގުޅުވާ ސާބިތު ނުހިފޭ ދޮގު ވާހަކަތަކެއް ދެއްކުމާ ގުޅިގެން ކަމަށް އާޒިމާ ވިދާޅުވި އެވެ.

ދަރިއަކާއި ދިމާލަށް މިފަދަ ދޮގު ވާހަކަތަކެއް ދެއްކުމުން ހަގީގަތުގައިވެސް މައިމީހާގެ ހިތަށް އަސަރު ކުރާނެއެވެ. އަދި އެމީހަކާ ދޭތެރޭ ރުޅިވެރިކަންވެސް އޮޮންނާނެ އެވެ. އެއީ އިންސާނީ ތޮބީއަތެވެ. އެހެން ނަމަވެސް އެހުރިހާ ކަމެއް އެއްފަރާތްކޮށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާގެ ފަރާތުން ފެނިގެން ދިޔައީ މުޅީން ތަފާތު މަންޒަރުތަކެކެވެ.

އޭގެ ފަހުން އިވިގެން ދިޔައީ މަރިޔަމް ޒުބައިރު އެމްޑީޕީގެ މުޒަހަރާއެއް ނިންމާފައި ގެޔަށް ދިޔަ މަގުމަތީ ކާކުކަން ނޭންގޭގޮތަށް މޫނު ނިވާކޮށްގެން ތިބި ބަޔަކު ވަނީ މަރިޔަމް ޒުބައިރު (މަންދީ) ގަޔަށް ކަޅުތެޔޮ ޖަހާފަ އެވެ.

މަންދީ ގަޔަށް ކަޅުތެޔޮ ޖެހި މައްސަލަ އެންމެ ފުރަތަމަވެސް ކުށްވެރިކޮށް ވާހަކަ ދެއްކީ ރައީސް މުއިއްޒުގެ އަނބިކަނބަލުން މެޑަމް ސާޖިދާ މުހައްމަދެވެ. މަރިޔަމް ޒުބައިރު (މަންދީ) ގަޔަށް ކަޅުތެޔޮ ޖެހި މައްސަލަ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވަނީ ހަރުކަށި އިބާރާތުން ކުށްވެރިކުރައްވާފަ އެވެ.

އެކަމަނާ ވިދާޅުވީ އެއްވެސް މީހަކަށް މިގޮތަށް ހަމަލާ ދިނުމަކީ ބަލައިގަނެވޭނޭ ކަމެއް ނޫންކަމަށެވެ. އަދި މިވަގުތު ކަންކަން ހަލަބޮލި ނުކޮށް އިންޞާފު ޤާއިމުކުރުމަށް ޖާގަ ދިނުމަށް މެޑަމް ސާޖިދާ ވަނީ އިލްތިމާސްކުރައްވާފަ އެވެ.

މިހުރިހާ ކަމަކުންވެސް ދައްކުވައިދިނީ އެކަމަނާގެ ހިއްތިރިކަމާ ހިތްހެޔޮކަމާ އޯގާތެރިކަމެވެ. އެކަމަނާގެ ހިތުގައި އެހެން މީހުންނާއި މެދު އޮތް ލޯތްބާއި އިހުތިރާމް ރަނގަޅަށްވެސް މިކަމުން ދައްކުވައިދިނެވެ.

މެޑަމް ސާޖިދާއަކީ އަބަދުވެސް ހިނިތުންވުމާއި އެކު މީހުންނާ މުހާތަބުކުރައްވާ މީހުންނާ ބައްދަލުކުރައްވާ ކަނބަލެކެވެ.އަބަދުވެސް ހިނިތުންވުމަކާއި އެކު ނޫންގޮތަކަށް އެކަމަނާއެއް ނުފެނެ އެވެ. އެކަން އެކި ރަސްމިއްޔާތުތަކާއި ރަށްރަށަށް ކުރައްވާ ދަތުރުތަކުންވެސް ވަރަށް ރަނގަޅަށް ފެނިގެންދެއެވެ.މެޑަމް ސާޖިދާ އަކީ ހިއްތިރި އޯގާތެރި ކަނބަލެއްކަން މުޖުތަމައުގެ އެންމެންވެސް ގަބޫލުކުރެތެވެ. އަންހެނުންނަށް ހުރި ނަމޫނާ ކަނބަލެކެވެ.