އެމެރިކާގެ ހަރުކަށި ރައީސް ޑޮނާލްޑް ޓްރަމްޕް އާއި ނިރުބަވެރި ދައުލަތް، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ދެވަނަ ބައްދަލުވުން އިއްޔެ ބާއްވައިފިއެވެ.

މި ބައްދަލުވުމުގައި ދެ ވެރިން ވަނީ ޣައްޒާގެ ބިން ހުސްކުުރުމަށް ޓްރަމްޕް ގެންގުޅޭ ސިޔާސަތާ ގުޅޭ ގޮތުން އަނެއްކާ ވެސް މަޝްވަރާކޮށްފައެވެ. އެގޮތުން އޯވަލް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޓްރަމްޕް ވަނީ ޣައްޒާ ހުސްކުރުމަށް ބޭނުންވާކަން ތަކުރާރުކޮށްފައެވެ.

Ad by Hajj Corporation

އެގޮތުން ޓްރަމްޕް ބުނީ، ޣައްޒާއަކީ ވަރަށް މުހިންމު ބިމެއް ކަމަށާއި، އެމެރިކާފަދަ ސުލްޙައިގެ ބާރެއް އެތަނުގައި އޮތުމަކީ ޣައްޒާގެ ހަމަޖެހުމަށް މުހިންމުކަމެއް ކަމަށެވެ. އެހެންކަމުން އެތަން އެމެރިކާއިން މިލްކުކުރުމަކީ ރަނގަޅުކަމެއްކަމުގައި ޓްރަމްޕް ބުންޏެވެ.

މީގެ އިތުރުން ޓްރަމްޕް ބުނީ، ޣައްޒާގެ ރައްޔިތުން ބަލައިގަންނާނެ އެހެން ގައުމުތައް ވާނެ ކަމަށާއި، އެމެރިކާއާ ގުޅިގެން އެކަން ކުރާނެ ގައުމުތައް ވެސް އެބަހުރި ކަމަށެވެ. އަދި އޭނާ ހުށަހެޅި ޣައްޒާގެ ކޮންސެޕްޓަށް ވަރަށް ގިނަ ފަރާތްތަކުގެ ތާއީދު ލިބިފައިވާ ކަމުގައި ވެސް ޓްރަމްޕް ބުންޏެވެ.

ޓްރަމްޕް އެފަދައިން ބުނިއިރު، ޣައްޒާއާ މެދު ޓްރަމްޕް ގެންގުޅޭ ތަސައްވަރު މުޅި ދުނިޔެއިން ދަނީ ކުށްވެރިކުރަމުންނެވެ. އެގޮތުން އދ. އާއި އަރަބި ޤައުމުތަކުން އެކަމުގެ ކަންބޮޑުވުން ފާޅުކޮށްފައިވާއިރު، އެކަމަކީ ނަސްލެއް ނައްތާލުމުގެ ގޮތުގައި އެ ގައުމުތަކުން ވަނީ ސިފަކޮށްފައެވެ.