ޣައިރު ގާނޫނީ އިސްރާއީލުގެ ދައުލަތުން ހިފާފައިވާ ޣައްޒާގެ އެކި ސަރަހައްދުތަކުގައި މުއްދަތެއްނެތްގޮތަށް ދެމިތިބޭނެކަމަށް ޔަހުދީން ބުނެފިއެވެ.

ޔަހޫދީ ދިފާއީ ވަޒީރު ބުނެފައިވަނީ ޣައްޒާއާއި ލުބުނާނާއި ސީރިއާގެ ސަރަހައްދުތަކަށް ދެމުންދާ ހަމަލާތަކުގައި ޔަހޫދީންގެ ބާރުގެ ދަށަސް އަންނަ ބިންތަކުންވެސް ނުފައިބާނެކަމަށެވެ.

އަދި މިއީ އަސީރުން މިނިވަންކުރަން ހަމާސްއަށް ބާރުއެޅުމުގެ ގޮތުން ކުރާ ކަމެއްކަމަށްވެސް ޔަހޫދީން ބުނެއެވެ. ޣައްޒާގައި އިސްރާއީލުން ހިންގަމުން އަންނަ ގަތުލުއާއްމުގައި މިއަދު ފަތިހުން ފެށިގެން މެންދުރާ ހަމައަށް 23 މުސްލިމުން ވަނީ ޝަހީދުކޮށްލާފައެވެ. މީގެ އިތުރުން ލުބުނާނުގެ އެކި ހިސާބުތަކަށް ވެސް ޔަހޫދީންވަނީ ވައިގެ ހަމަލާތައް ދީފައެވެ. 2024ވަނަ އަހަރުގެ ނޮވެމްބަރު މަހުގެ 27ވަނަ ދުވަހު ހަނގުރާމަ ހުއްޓާލުމުގެ އެއްބަސްވުން ޤާއިމު ކުރި ފަހުން ލުބުނާނުގެ 71 ރައްޔިތުން ޔަހުދީންގެ ހަމަލާތަކުގައި ޝަހީދުވެފައިވާ ކަމަށް ރިޕޯޓުތައް ބުނެއެވެ.

ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. އެ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު 61,700އަށް އުފުލިފައިވާއިރު، އިތުރު 114,000އަށްވުރެ ގިނަ މީހުން ވަނީ ޒަޚަމު ކޮށްލާފައެވެ. އަދި، ޣައްޒާގެ ޢާންމުންގެ ގެދޮރާއި އުމްރާނީ ވަސީލަތްތައް ވަނީ ސުންނާފަތިކޮށް ބިމާ ހަމަކޮށްލާފައެވެ.