ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިބްރާހީމް ޒުވާނުންގެ އަޑު ގާތުން އައްސަވައި، ކެތްތެރިކަމާއި ހިކުމަތްތެރިކަމާއެކު ފިޔަވަޅު ވެސް އަޅުއްވާނެ ކަމަށް ރައްޔިތުޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު މުޙައްމަދު ޢަފޫ ހާމިދު ވިދާޅުވެއްޖެއެވެ.

އަފޫ މިފަދައިން ވިދާޅުވީ ފަހަކަށް އައިސް ޒުވާނުންގެ މެދުގައި ހިނގަމުންދާ ހަރަކާތްތަކާ ގުޅޭގޮތުން އެކްސްގައި ކުރެއްވި ޕޯސްޓެއްގައެވެ.

އޭނާ ވިދާޅުވީ ޒުވާނުން އިސްވެ ހެޔޮ ނިޔަތުގައި ފެށި އިޚްލާޞްތެރި މަސައްކަތުގެ ނާޖާއިޒު ފައިދާ ނެގުމަށް އިދިކޮޅު ފަރާތްތަކުން މަސައްކަތް ކުރަމުންދާ ކަމަށެވެ.

"އިދިކޮޅުން އެ ހަރަކާތުގެ ތެރެއަށް ވަދެ، ދައުލަތުގެ ވެރިންނާއި އާއިލީ ބޭފުޅުންނަށް ލެއްވިހާ އަވަގުރާނައަކާއި ބޭއަދަބީ ބަސްތަކެއް ރައްދުކޮށް، އެ ވެރިންގެ އަމިއްލަ ސިޔާސީ އެދުންތައް ހާސިލްކުރުމަށް މަސައްކަތް ކުރަމުންދޭ،" އަފޫ ވިދާޅުވިއެވެ.

އަފޫ ޒުވާނުންގެ ކިބައިން އެދިވަޑައިގަތީ ހުރިހާ ސިޔާސީ އޮއިވަރުތަކުން އެއްކިބާވެ، އެ ހަރަކާތުގެ މަޤްޞަދުގައި ދެމިތިބުމަށެވެ. އަދި ޒުވާނުންގެ ބޮޑު އަޣުލަބިއްޔަތަކާއެކު ގެނައި މި ވެރިކަމާމެދު އޮތް އިތުބާރާއި ގުޅުން ދެމެހެއްޓުމަށްވެސް އޭނާ ގޮވާލެއްވިއެވެ.

"އަޅުގަނޑުމެން އެންމެންގެ އަމާޒަކީވެސް އިންސާފުވެރި ތަޙްޤީޤެއް، އަދުލުވެރި ޝަރީޢަތެއް މި ޤައުމުގެ ކޮންމެ ރައްޔިތަކަށްވެސް ތަފާތުކުރުމެއްނެތި ލިބިގެންދާ މަންޒަރު ދެކުން،" އަފޫ ވިދާޅުވިއެވެ.

އަފޫ ޔަޤީންކަމާއެކު ވިދާޅުވީ ރައީސް މުޢިއްޒު ޒުވާނުންގެ އަޑު ގާތުން އައްސަވައި، ކެތްތެރިކަމާއި ހިކުމަތްތެރިކަމާއެކު ފިޔަވަޅު އަޅުއްވާނެ ކަމަށެވެ. އަދި އަނިޔާ ލިބުނު ޒުވާނާއަށް އަވަސް ޝިފާއެއް އަދި އޭނާގެ އާއިލާއަށް ކެތްތެރިކަން މިންވަރުކުރެއްވުމަށް އެދި ެދި ދުޢާ ކުރެއްވިއެވެ.