އިޓާލިއަން ސެރީއޭގެ ތާވަލުގެ އެއްވަނައިގައި އޮތް އިންޓަރ މިލާން ހަފްތާއެއްގެ ތެރޭގައި ތިން މެޗެއް ގެއްލި، ޓްރެބްލް ހޯދުމުގެ ހުވަފެން ފެނަށް ގޮސްފައެވެ. އެގޮތުން ރޭގައި އިންޓަރ ރޯމާ އަތުން ބަލިވެ ލީގުގެ ކޮންޓްރޯލް ގެއްލިފައިވާއިރު، މީގެ ހަތަރު ދުވަސް ކުރިން އިންޓަރ ވަނީ އިޓާލިއަން ކަޕްގެ ސެމީގައި އޭސީ މިލާން އަތުން ބަލިވެ މުބާރާތާއި އަލްވަދާޢުކިޔާފައެވެ.

ސެރީއާގައި އިންޓަރ ރޯމާ އަތުން ބަލިވީ 1-0 އިންނެވެ.

Ad by Hajj Corporation

މެޗުގެ ފުރަތަމަ ބައިގައި އިންޓަރ މޮޅު ކުޅުމެއް ދެއްކި ނަމަވެސް، ރޯމާ ގެ ގޯލްކީޕަރ ސްވިލާ ދެއްކި މޮޅު ކުޅުމާއެކު އިންޓަރ ފޮނުވާލި ގިނަ ހަމަލާތައް ވަނީ ހުއްޓުވާފައެވެ. މި މެޗުގެ ހަމައެކަނި ލަނޑު ޖެހީ 22 ވަނަ މިނެޓުގައި މަޓިއަސް ސޯލޭ އެވެ.

އިންޓަރ ބަލިވުމާއި ގުޅިގެން، ނަޕޮލީ ވަނީ ޕޮއިންޓް ޓޭބަލްގެ އެއްވަނައަށް އަރައި، ތިން ޕޮއިންޓުގެ ލީޑެއް ނަގާފައެވެ. މިއީ މިހަފްތާގައި ބާސެލޯނާ އާ ދެކޮޅަށް ކުޅެން އޮތް ޗެމްޕިއަންސް ލީގުގެ ސެމީ ފައިނަލް މެޗުގެ ކުރިން އިންޓަރ އަށް ލިބުނު ވަރަށް ބޮޑު ނިކަމެތިކަމެކެވެ.