މި ހަފްތާތެރޭ އެމެރިކާގެ ކުރީގެ ރައީސް އަދި ނޮވެމްބަރު މަހު އޮންނަ އިންތިޚާބުގައި ވާދަކުރާ ޑޮނާލްޑް ޓްރަމްޕް އަވަހާރަކޮށްލަން ދިން ހަމަލާއާއި ގުޅުވާ އީލޮން މަސްކް އޭނާގެ އެކްސްގައި ކުރި ޕޯސްޓް ޑިލީޓްކޮށްފިއެވެ. ގިނަ ބައެއްގެ ފާޑުކިއުން އަމާޒުވި ޕޯސްޓްގައި މަސްކްވަނީ " ރައީސް ޖޯ ބައިޑަން އާއި ނައިބު ރައީސް ކަމަލާ ހެރިސް އަވަހާރަކޮށްލަން އެއްވެސް މީހަކު މަސައްކަތެއް ނުކުރާކަމަށް" ބުނެ އެކްސްގައި ޕޯސްޓްކޮށްފައެވެ. މަސްކުގެ މި ޕޯސްޓަކީ އޭނާ ފޮލޯކުރާ 700 އެކައުންޓްގެ ތެރޭގައި ހިމެނޭ ޑޮޖްޑިޒައިނާ "ޑޮނަލްޑް ޓްރަމްޕް އަވަހާރަކޮށްލަން ބޭނުންވަނީ ކީއްވެތޯ؟" އަހާ އެކްސްގައި ކުރި ޕޯސްޓަކަށް ރައްދު ދިނުމުގެ ގޮތުން ކުރި ޕޯސްޓެކެވެ.

ކުޑައިރުކޮޅެއް ތެރޭ ގިނަ ބައެއްގެ ފާޑުކިއުން އަމާޒުވެ މި ޕޯސްޓް ޑިލީޓްކޮށްލި އިރު އެކްސްގައި ވަނީ އީލޮން މަސްކް ޑީޕޯޓްކުރަން ގޮވާލާ ހޭޝްޓެގެއްވެސް ވައިރަލް ވެފައެވެ.

ވައިޓް ހައުސްއިންވެސް ވަނީ މި ޕޯސްޓާގުޅިގެން ރައްދުދީފައެވެ. ވައިޓް ހައުސްގެ ތަރުޖަމާނު އެންޑްރޫ ބޭޓްސްވަނީ ހަމަނުޖެހުން ތައް ކުށްވެރިކުރަން ވީ ކަމަށާއި ހިތްވަރު ދީގެން ނުވަތަ ފުރައްސާރަ ކޮށްގެން ނުވާނެ ކަމަށް ވިދާޅުވެ އީލޮން މަސްކްގެ ޕޯސްޓަށް ފާޑުވިދާޅުވެފައެވެ.

އެމެރިކާގެ ރިޔާސީ ރޭހުގައި ވާދަކުރައްވާ ޑޮނަލްޑް ޓްރަމްޕަށް އީލޮން މަސްކްދަނީ ފާޅުގައި ތާއީދުކޮށް ޓްރަމްޕްއާއި އިދިކޮޅުވާ ފަރާތްތަކަށް ރައްދުދީ އެކްސްގައި ޕޯސްޓްތައް ކުރަމުންނެވެ.

ޓެސްލާ އަދި އެކްސްގެ ވެސް ވެރިޔާ ވަނީ މީގެ ކުރިން ވެސް ޚިޔާލުފާޅު ކުރުމުގެ މިނިވަން ކަމުގެ ތެރޭން ކަމަށް ބުނެ އެކި ކަހަލަ ޕޯސްޓްކޮށް ދުނިޔޭގެ ލީޑަރުންނާއި ސިޔާސީ ފަރާތްތަކާ ދެމެދު ހަމަނުޖެހުން ހިންގައިފަ އެވެ.

ބްރެޒިލްގައި އެކްސް މިހާރު މަނާކުރީވެސް ހިޔާލުފާޅުކުރުމުގެ މިނިވަންކަމާއި ހަރުކަށި ފިކުރުގެ އެކައުންޓްތަކާއި ދޮގު މައުލޫމާތު ދިނުމުގެ މައްސަލާގައި މަސްކާއި ބްރެޒިލްގެ ސުޕްރީމް ކޯޓުގެ ފަނޑިޔާރަކާ ދެމެދު އުފެދުނު ހަމަނުޖެހުންތަކާ ގުޅިގެންނެވެ.