ހއ. އުލިގަމުގައި ޔޮޓް މެރީނާއެއް އެޅުމަށް ހަ ފަރާތަކުން ޝައުގުވެރިވެފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހު އިބްރާހިމް ރޭ ވިދާޅުވެއްޖެއެވެ.

ހއ. އުލިގަމުގައި އިންޓަނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ (އައިއެސްޕީއެސް) ގޭޓް އިފްތިތާހު ކުރުމަށް ބޭއްވި ރަސްމިއްޔާތުގައި ވަޖީހު ވިދާޅުވީ، އުލިގަމަކީ ޒާމާނުއްސުރެ ފެށިގެން ބޭރުގެ ފަރާތްތަކުން ޝައުގުވެރިވާ ސަރަހައްދެއް ކަމަށެވެ. މިކަން ހެކިދޭކަން ފާހަގަކުރައްވަމުން ވަޖީހު ވިދާޅުވީ، އަހަރެއްގެ މައްޗަށް އެތައް ސަތޭކަ ޔޮޓެއް މިރަށަށް ބަނދަރު ކުރާ ކަމަށް ވަޖީހު ފާހަގަކުރެއްވިއެވެ.

މީގެ އިތުރުން ވަޖީހު ވިދާޅުވީ، މި ފެށުނީ އޭގެ ބައެއް ކަމަށާއި މި ފެށޭ މަަސައްކަތް ކާމިޔާބު ކުރުމަށްޓަކައި އިހަވަންދިއްޕޮޅުގައި މެރިޓައިމް ދާއިރާގެ ވަރަށް ގިނަ މަޝްރޫއުތަކެއް ހިންގާނެ ކަމަށެވެ. އޭގެ ތެރޭގައި އުލިގަމުގައި ހިންގާނެ ތިން މަޝްރޫއެއްގެ ވާހަކަ ފާހަގަކުރެއްވިއެވެ. އޭގެ ތެރެއިން އެއް ކަމެއްގެ ގޮތުގައި ފާހަގަކުރެއްވީ ޔޮޓްތަކަށް ހާއްސަ މެރީނާއެއް ތަރައްގީ ކުރުމެވެ.

"އެ މަސައްކަތަށް މިހާރު ވަނީ އަޅުގަނޑުމެން ހުޅުވާލައި، ބޭރުގެ ހަ ފަރާތަކުން ޝައުގުވެރިކަން ފާޅުކޮށްފައި، އިރާދަކުރެއްވިއްޔާ ލަސްތަކެއް ނުވެ ކޮންމެވެސް ބަޔަކާއި ހަވާލު ކުރުމުގެ މަސައްކަތް ކުރާނަން،". ވަޖީހު ވިދާޅުވިއެވެ.

މީގެ އިތުރުން، ކްރޫޒް ލައިންތަކަށް ހިދުމަތް ދިނުމަށް ރާއްޖޭގެ ތިން ސަރަހައްދުގައި ކްރޫޒް ޓާމިނަލް ގާއިމް ކުރައްވާނެ ކަންވެސް އޭނާ ފާހަގަކުރެއްވިއެވެ. ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން މި ދައުރުގެ ތެރޭގައި އުތުރާއި، މެދު ރާއްޖެ އާއި ދެކުނުގައި ކްރޫޒް ޓާމިނަލް ގާއިމް ކުރާއްވާނެ ކަމަށް ވިދާޅުވިއެވެ.

"މިކަންކަމަކީ އެމްޕީއެލް އިން ތައްޔާރުކުރިޔަސް، އެ ކުންފުނިން ހިންގާނެ ކަންތައްތަކެއް ނޫން، މިކަން ހިންގާނީ މިކަމަށް ޝައުގުވެރިވާ އެހެނިހެން ފަރާތްތަކުން،". ވަޖީހު ވިދާޅުވެފައި ވެއެވެ.