ގާނާގައި އަސްކަރީ ހެލިކޮޕްޓަރެއް ވެއްޓި އެ ޤައުމުގެ ދިފާޢީ ވަޒީރު، އެޑްވާޑް އޮމާނޭ ބުއާމާއާއި ތިމާވެއްޓާއި ސައިންސާއި ޓެކްނޮލޮޖީ ވަޒީރު، އިބްރާޙިމް މުރުތަލާ މުޙައްމަދު އަވަހާރަވެއްޖެއެވެ.

މީގެ އިތުރުން، މި ހާދިސާގައި އެ ޤައުމުގެ ސަރުކާރަށް ނިޞްބަތްވާ 5 އޮފިޝަލަކާއި ވައިގެ އަސްކަރިއްޔާއަށް ނިޞްބަތްވާ 3 މީހަކުވެސް ވަނީ އަވަހާރަވެފައެވެ.

Ad by Hajj Corporation

ހެލިކޮޕްޓަރު ވެއްޓެން މެދުވެރިވި ސަބަބާ ގުޅޭގޮތުން ގާނާގެ އިދާރާތަކުން މިހާތަނަށް އެއްވެސް އެއްޗެއް ބުނެފައެއް ނުވެއެވެ. ގާނާގެ ހަތިޔާރުއެޅި ފައުޖުން އޭގެ ކުރިން ވަނީ ވައިގެ އަސްކަރިއްޔާގެ ޒީ9 ހެލިކޮޕްޓަރެއް ރާޑަރަށް ގެއްލިފައިވާ ކަމަށް ބުނެފައެވެ.

ގާނާގެ ރައީސް، ޖޯން މަހާމާގެ ތަރުޖަމާނު، ޖޫލިޔަސް ޑެބްރާހް ވިދާޅުވީ ފަހު ވަގުތާ ޖެހެންދެން ޤައުމީ ޚިދުމަތުގައި އުޅުއްވި، އެ އެންމެ ބޭފުޅުންގެ ޢާއިލާތަކަށް ރައީސާއި ސަރުކާރުގެ ފަރާތުން ތައުޒިޔާ ފޮނުއްވާ ކަމަށެވެ.

ދިފާޢީ ވަޒީރު ބުއާމާއަކީ މީގެ ކުރިން ގާނާގެ ކޮމިއުނިކޭޝަންސް ވަޒީރުގެ މަޤާމު ވެސް އަދާކުރެއްވި ބޭފުޅެކެވެ. ދިފާއީ ވަޒީރުގެ މަޤާމާ އޭނާ ޙަވާލުވެވަޑައިގަތީ ރައީސް މަހާމާ އަލުން ވެރިކަމަށް ވަޑައިގަތުމުން މި އަހަރުގެ ޖަނަވަރީ މަހުގެ ތެރޭގައެވެ.