އަޒަރުބައިޖާނުގެ ވެރިރަށް ބާކޫއިން ރަޝިޔާގެ ގްރޮޒްނީ ސިޓީއަށް ދަތުރުކުރަމުންދިޔަ އަޒަރުބައިޖާން އެއަރލައިންސްގެ މަތިންދާބޯޓެއް ކަޒަކިސްތާނުގެ އަކްޓައު ސަރަހައްދުގައި ވެއްޓި އަލިފާންރޯވެއްޖެއެވެ. މި ހާދިސާގައި މަތިންދާބޯޓުގައި ތިބި 110 މީހުންގެ ތެރެއިން 12 މީހުން ދިރިތިބިކަމަށް ކަޒަކިސްތާނުގެ އޮފިޝަލުން މަޢުލޫމާތު ދީފައިވެއެވެ. އެމްބްރެއަރ އީ 190 އޭއާރު ބޯޓުގައި 105 ފަސިންޖަރުންނާއި 5 ކުރޫ މެމްބަރުން ތިބިކަމަށް އޮފިޝަލުން ބުނެއެވެ.

ކަޒަކިސްތާނުގެ އެއަރ ނެވިގޭޝަން ސަރވިސް ކަޒައެރޯނަވިގޭޝިޔާއިން ބުނެފައިވަނީ ބޯޓު ދަތުރުކުރަމުންދަނިކޮށް ދޫންޏަކާ ޖެހި، ސްޓިއަރިންގ ކޮންޓްރޯލް ގެއްލިފައިވާ ކަމަށެވެ. އަދި ކަސްޕިއަން ކަނޑުގެ މަތީގައި 2،125 ފޫޓުގެ އުސްމިނުގައި ދަތުރުކުރަމުންދަނިކޮށް ބޯޓުން ޑިސްޓްރެސް ސިގްނަލް ފޮނުވާފައިވާ ކަމަށްވެސް އެ ފަރާތުން ބުނެފައިވެއެވެ.

މޫސުން ގޯސްވުމާ ގުޅިގެން ގްރޮޒްނީ އަދި މަހަޗްކަލާ ސިޓީއަށް ޖެއްސޭގޮތް ނުވުމުން، ބޯޓު ކަޒަކިސްތާނުގެ އަކްޓައު ސިޓީއަށް އަމާޒުކުރެވުނެވެ. ނަމަވެސް ބޯޓު ބިމަށް ޖެއްސުމުގެ ކުރިން އަލިފާންރޯވެ، ބައިބައިވެގެން ދިޔަކަމަށް ރިޕޯޓުތަކުގައި ބުނެއެވެ. ބޯޓު ޖެއްސުމުގެ ކުރިން ތިރިވަމުން އައީ ނިސްބަތުން ބޮޑު އެންގަލްއެއްގައި ކަމަށްވެސް ފާހަގަކުރެވެއެވެ.

މި ހާދިސާގައި ދިރި އޮތް 12 މީހުންގެ ތެރޭގައި ކުޑަކުއްޖަކުވެސް ހިމެނޭ ކަމަށާއި، އޭގެ ތެރެއިން ބައެއް މީހުންގެ ހާލަތު ނާޒުކު ކަމަށް ކަޒަކިސްތާނުގެ އޮފިޝަލުން ބުނެފައިވެއެވެ. މި ހާދިސާއާ ގުޅޭ އިތުރު މަޢުލޫމާތު ހޯދުމުގެ މަސައްކަތް ކަމާބެހޭ ފަރާތްތަކުން ކުރަމުންދާ ކަމަށް ބެލެވެއެވެ.