ރިސޯޓެއްގެ ވޯޓަރ ވިލާއެއްގައި ރޯވެއްޖެއެވެ.

ރޯވެފައި ވަނީ އދ. އަތޮޅުގައި އޮންނަ ކުޑަރަށް ރިސޯޓްގެ ވޯޓާ ވިލާއެއްގައެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މަޢުލޫމާތުދިން ގޮތުގައި، އެތަނުގައި އަލިފާން ރޯވެގެން އުޅޭ ކަމުގެ މަޢުލޫމާތު ލިބުމާ ގުޅިގެން އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރމަނުން ވަނީ އެ ރިސޯޓަށް ދަތުރު ފަށާފައެވެ.

މި ހާދިސާގެ މަޢުލޫމާތު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބިފައިވަނީ މިއަދު ހެނދުނު 10:52 ހާއިރުއެވެ. އަދި، އެމްއެންޑީއެފްގެ ފަޔަރ ޓީމް އެ ރިސޯޓަށް ދިޔުމަށް މާލެއިން ފުރާފައިވަނީ 11:05 ހާއިރުއެވެ.

އެމްއެންޑީއެފުން އިތުރަށް ހާމަކުރި ގޮތުގައި، މި ވަގުތު ރިސޯޓުގެ އަމިއްލަ ފަޔަރ ޓީމެއް ދަނީ އަލިފާން ނިއްވުމުގެ މަސައްކަތުގައި ހަރަކާތްތެރިވަމުންނެވެ.

މި ހާދިސާއާ ގުޅިގެން މިހާތަނަށް އެއްވެސް މީހަކަށް އަނިޔާވި ކަމުގެ މަޢުލޫމާތެއް ލިބިފައެއް ނުވެއެވެ. އަދި އަލިފާން ރޯވި ސަބަބާއި ލިބުނު ގެއްލުމުގެ ތަފްސީލީ މަޢުލޫމާތު ވެސް އަދި ނުލިބެއެވެ.