ރައްޔިތުން އެދުނު ގޮތަށް ކާސާމިއާ މަތިވެރި ކައުންސިލަށް: ރަށުގެ މާލިއްޔަތަށް ބޮޑު އާމްދަނީއެއް، ރަށުގެ ތަރައްގީއަށް ދިރުން

22 އޯގަސްޓު 2025 - 06:45

2024 ވަނަ އަހަރު ޑިސެމްބަރު މަހުގެ 9 ވަނަ ދުވަހު ރައީސް ޑރ. މުޙައްމަދު މުޢިއްޒު އއ. މަތިވެރިއަށް ކުރެއްވި ޒިޔާރަތުގައި އެރަށުގެ ރައްޔިތުންގެ ފަރާތުން ކައުންސިލުން ރައީސަށް ހުށަހެޅުމެއް ހުށަހެޅިއެވެ.
މަތިވެރި ރައްޔިތުންގެ ހުށަހެޅުމެއް

Ad by Hajj Corporation
އެދުވަހު އެރަށުގައި ހުންނަ ކާސާ މިއާ ގެސްޓް ހައުސް ހުރި ބިމުން ރައްޔިތުންނަށް ނަފާ ނުލިބިދާ މައްސަލައިގެ ކަންބޮޑުވުންތައް މަތިވެރި ކައުންސިލުން ރައީސް މުޢިއްޒާއި ހިއްސާކުރިއެވެ. އަދި އެއިގެ ކުރިއަށް ދިޔައަށެއްކަ އަހަރު ވެސް އެ ގެސްޓްހައުސް ހުރި ބިމުން މަތިވެރި ރައްޔިތުންގެ މާލިއްޔަތަށް މަންފާނުލިބޭކަމުގެ ކަންބޮޑުވުން ފާޅުކުރިއެވެ. މިކަންބޮޑުވުންތަކާއެކު އެ ބިން މަތިވެރީގެ ރައްޔިތުންނަށް ލިބޭނެ ގޮތް ހައްދަވައި ދެއްވުމަށް އެދުވަހު މަތިވެރި ކައުންސިލުން ރައީސަށް ދެންނެވިއެވެ.
ރައީސަށް މަތިވެރިން ހޫނު މަރުހަބާއެއް ކިޔަން ތައްޔާރުވެފައި، ފޮޓޯ: ރައީސް އޮފީސް
އަބަދުވެސް ރައްޔިތުން އިސްކުރާ ވެރިއެއްގެ ނިންމުން
މަތިވެރި ކައުންސިލްގެ މި ހުށަހެޅުމަށް ރައީސް ދެއްވީ ވަރަށް އީޖާބީ ޖަވާބެކެވެ. އެމަނިކުފާނަކީ އަބަދުމެ ރައްޔިތުން އިސްކުރަށްވާ ވެރިއެއްކަމުން، މަތިވެރީގެ ރައްޔިތުންނަށް އެ ބިން ލިބޭނެ ގޮތް ހައްދަވައިދެއްވާނެކަމުގެ އުފާވެރި ޚަބަރު އެދުވަހު ރައީސް މަތިވެރި ރައްޔިތުންނަށް ދެއްވިއެވެ.
ރައްޔިތުން އެދުނުގޮތަށް ކާސާމިއާ ރައްޔިތުންނަށް
އޭގެ ފަހުން މަތިވެރި އަށް ރައީސް މުއިއްޒު ވަޑައިގަތީ 19 އޯގަސްޓް 2025 ގައެވެ. އެ ދުވަހު ރައީސް ވަނީ މަތިވެރި ރައްޔިތުން ހެއްވާލައި، އެ ރައްޔިތުން އެދުނުގޮތަށް ކާސާމިއާ ގެސްޓް ހައުސް މަތިވެރި ކައުންސިލާ ހަވާލުކޮށްދެއްވާފައެވެ. މަތިވެރި ކައުންސިލާ މި ބިން ހަވާލުކުރުމުގެ ލިޔުން ހަވާލުކޮށްދެއްވީ ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤް އިބްރާހިމްއެވެ. އަދި ކައުންސިލުން އެ ލިޔުމާއި ހަވާލުވެވަޑައިގަތީ ކައުންސިލްްގެ ރައީސް އަޙްމަދު އަޞްލަމްއެވެ.
ކާސާމިއާ ބިން މަތިވެރި ކައުންސިލާ ހަވާލުކުރުމުގެ ރަސްމިއްޔާތުގައި ރައީސް ބައިވެރިވެވަޑައިގަންނަވަނީ، ފޮޓޯ: ރައީސް އޮފީސް
ސަރުކާރުގެ ފުރިހަމަ އެއްބާރުލުން މަތިވެރި ރައްޔިތުންނަށް
ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެމްބަރު އަބްދުﷲ ޖާބިރުއަށް އއ.މަތިވެރީގެ ޓޫރިޒަމް ޒޯނުން ދޫކޮށްފައިވާ ބިމުގައި ކާސާ މިއާގެ ނަމުގައި 50 ކޮޓަރީގެ ގެސްޓް ހައުސްއެއް ވަނީ ތަރައްގީ ކޮށްފައެވެ. ނަމަވެސް އެތަން ހުރި ބިމުން ރައްޔިތުންނަށް ނަފާވެރިކަމެއް ނުލިބުނެވެ. އެކަމާއި ގުޅިގެން ރައްޔިތުންގެ އޮތް ދުވަސްވީ ކަންބޮޑުވުމަށް ތަސައްލީއެއް ގެނެސްދެއްވީ ރައީސް ޑރ. މުޙައްމަދު މުޢިއްޒެވެ.
ކާސާމިއާ މަތިވެރި ކައުންސިލާ ހަވާލުކުރުން، ފޮޓޯ: ރައީސް އޮފީސް
މި ބިން މަތިވެރިކައުންސިލާއި ހަވާލުކުރެއްވުމަށްފަހު މަތިވެރީގެ ރައްޔިތުންނާއި ބައްދަލުކުރައްވާ ރައީސް ދެއްކެވި ވާހަކަފުޅުގައި ވިދާޅުވީ ކާސާ މިއާ އަކީ މަތިވެރި ރައްޔިތުންނަށް ވަރަށް މުހިންމު ތަނެއްކަމަށާއި، އެތަން ތަރައްގީކޮށްފައިވާ ޓޫރިޒަމް ޒޯންގެ ބިމުގެ ފުރިހަމަ ބޭނުން ރައްޔިތުން ހިފާނެކަމަށް އުއްމީދުކުރައްވާކަމަށެވެ. އަދި ސަރުކާރުގެ ފަރާތުން އެކަމަށް އެއްބާރުލުން ލިބޭނެކަމުގެ ޔަގީންކަން ވެސް ދެއްވިއެވެ.
ރައީސް މަތިވެރިއަށް ވަޑައިގެންނެވުން، އެރަށުން އެ މަނިކުފާނަށް ވަނީ ހޫނު މަރުޙަބާއެއް ކިޔާފައި، ފޮޓޯ: ރައީސް އޮފީސް
މަތިވެރި ރައްޔިތުން އުފަލުން ފޮޅިފައި
ރައީސްގެ މި ދީލަތި ނިންމެވުން އެންމެ އުފާވި ބަޔަކީ އެކަމުގެ ހަގީގީ ޙައްޤުވެރިންކަމަށްވާ މަތިވެރި ރައްޔިތުންނެވެ. އެ ރައްޔިތުން ދަނީ މި ނިންމުމާއެކު އުފާވެރިކަމުގެ ޝުޢޫރުތައް ބަންޑުން ކުރަމުންނެވެ.
އޭގެ ތެރެއިން އެއް ރައްޔިތަކު ދައުލަތު މީޑިއާ އަށް ދިން ބަސްދީ ގަތުމެއްގައި ބުނީ އެ ބިމުން މަހެއްގެ މައްޗަށް 5 ލައްކަ ރުފިޔާގެ އާމްދަނީ އެއް ރަށުގެ މާލިއްޔަތަށް ވަންނާނެކަަށް އުންމީދު ކުރާކަމަށެވެ.
''އަޅުގަނޑުމެން އުންމީދުކުރަނީ މަހެއްގެ މައްޗަށް ގާތްގަނޑަކަށް މަހެއްގެ މައްޗަށް 5 ވަރަކަށް ލައްކަ ރުފިޔާ ލިބޭނެކަަމަށް ކައުންސިލްގެ އާމްދަނީ އަށް، އެހެންވެއްޖެއްޔާ މިހާރު ކައުންސިލުން ދޭ މުނިސްޕަލް ވަރަށް ގިނަ ޚިދުމަތްތަކެއް، ރަށުގެ ތަރައްގީ އަށް ވަރަށް ގިނަ ކަންތައްތަކެއް ކުރެވިގެންދާނެކަމަށް ގަބޫލު ކުރަނީ، ކުރީގައި ކައުންސިލްގެ ރައީސް ވެސް ފާހަގަކުރި ގޮތަށް އަޅުގަނޑުމެން ހުންނާނެ އޭރު ކާސާމިއާގެ އާމްދަނީ ވަރަށް ގިނަ ކަންތައްތަކެއް ކޮށްފައި މިރަށުގައި ވަށައިގެން މި ފެންނަ ގިނަ ކަންތައްތަކަކީ އެއިރުގައި ހަމަ އާމްދަނީން ކުރެވިފައި ހުރިކަންތައްތައް، ހަގީގަތުގައި މިއީ ރައްޔިތުންނަށް ދީފައި އޮތް ވަރަށް ބޮޑު އަނިޔާއެއްގެ ގޮތުގައި އަޅުގަނޑު ސިފަކުރަނީ، ވަރަށް ބޮޑަށް ހަމަ ޝުކުރުއަދާ ކުރަން ރައީސް މުޢިއްޒަށް'' އޭނާ ބުނެފަވެއެވެ.
ރައީސް މަތިވެރި ކައުންސިލާ ބައްދަލުކުރެއްވުން، ފޮޓޯ: ރައީސް އޮފީސް
ކާސާމިއާގެ ބިން ކައުންސިލަށް ލިބުން، ރަށުގެ ތަރައްގީ އަށް އައު ދިރުމެއް
ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެމްބަރު އަބްދުﷲ ޖާބިރަށް ގެސްޓްހައުސް ހިންގުމަށް އެ ބިން ފުރަތަމަ ދީފައި އޮތީ 10 އަހަރު ދުވަހަށެވެ. ނަމަވެސް ނިމިދިޔަ އެމްޑީޕީގެ ސަރުކާރުން ވަނީ އިޖުރާއަތްތަކާ ޚިލާފަށް އަކަފޫޓަކަށް 5 ރުފިޔާގެ މަގުން 50 އަހަރު ދުވަހުގެ މުއްދަތަކަށް އެތަނުގެ އެއްބަސްވުމުގެ މުއްދަތު އިތުރުކޮށްދީފައެވެ. އެކަމުގެ ސަބަބުން ރަށު ކައުންސިލަށް ވަނީ އެތައް މިލިޔަން ރުފިޔާއެއްގެ ގެއްލުން ލިބިފައެވެ. މީގެއިތުރުން ކަރަންޓު ބިލާއި ކުލިވެސް ދައްކާފައި ނެތުމުން ދަޢުލަތަށް ވަނީ 94 މިލިޔަން ރުފިޔާގެ ގެއްލުމަކާއި ކުރިމަތިލާން ޖެހިފައެވެ.
ނަމަވެސް ރައީސް ޑރ. މުޙައްމަދު މުޢިއްޒުގެ މި ނިންމެވުމާއެކު އެ ބިމުގެ ހަގީގީ ނަފާ ރަށުގެ މާލިއްޔަތަށް ލިބުމަށް މަގު ހުޅުވިގެން ދިޔައީއެވެ. އެ ނަފާވެރިކަން ލިބެން ފެށުމުން ކައުންސިލުން ރައްޔިތުންނަށް ދޭ ޚިދުމަތްތަކުގެ ފެންވަރުމަތިކުރެވި، މައި ބަޖެޓަށް ބަރޯސާނުވެ ރަށުގެ ތަރައްގީއަށް ކަންކަން ކުރުމަށް ޚަރަދުކުރާނެ ގާބިލުކަން ރަށުގެ ކައުންސިލަށް އިތުރުވެގެންދާނެއެވެ. ނަތީޖާއެއްގެ ގޮތުން ރައްޔިތުންގެ ފަސޭހައަށާއި ލާބައަށް ގިނަ ކަންތައްތަކެއް ކުރެވިގެންދާނެއެވެ.