އިސްލާމީ ކަންތައްތަކާއި ބެހޭ ވުޒާރާއިން 'މަޢުރިފާ' ނަމުގައި ފޮތް މައުރަޒެއް ބާއްވަން ތައްޔާރުވެއްޖެއެވެ.

'މަޢުރިފާ' ނަމުގައި މި މަޢުރަޒު ކުރިޔަށްދާނީ މި މަހުގެ 26 ވަނަ ދުވަހުން 28 ވަނަ ދުވަހުގެ ނިޔަލަށެވެ. މައުރަޒު އޮންނާނީ މި މުއްދަތުގެ ތެރޭގައި ކޮންމެ ދުވަހެއްގެ ހަވީރު 16:00 އިން 18:00 އާއި އަދި، ރޭގަނޑު 20:00 އިން 22:00 އަށް އިސްލާމީ މަރުކަޒުގެ ޖަލްސާކުރާ މާލަމުގައެވެ.

Ad by Hajj Corporation

އިސްލާމީ ކަންތައްތަކާ ބެހޭ ވުޒާރާއިން ބުނީ 'ފޮތްތެރިކަން – ބުއްދީގެ ކާނާ' މި މަޢުޟޫއަށް މި މަޢުރަޒު ބޭއްވުމުގެ އެންމެ މައިގަނޑު މަޤުސަދަކީ ފޮތް އުފައްދާ ފަރާތްތަކާއި ފޮތް ވިއްކާ ފަރާތްތަކަށް އެ ފޮތްތައް ވިއްކުމުގެ ފުރުސަތު ހޯދައިދިނުމާއި އޭގެ އިތުރުން ފޮތް ގަންނަން ބޭނުންވާ ފަރާތްތަކަށް އަގުހެޔޮކޮށް ފޮތް ގަތުމުގެ ފުރުސަތު ހޯދައިދިނުންކަމަށެވެ.

ވުޒާރާއިން ބުނީ މި މަޢުރަޒުން 15 ފަރާތްތަކަށް ޖާގަ ދިނުމަށް ވަނީ ހަމަޖެހިފައިކަމަށާއި ޖާގަ ދޫކުރަން ފަށާނީ ބައިވެރިވާން އެދޭ ތަރުތީބުން އެންމެ ފުރަތަމަ ކުރިމަތިލާ 15 ފަރާތަށްކަމަށެވެ.