ބޭންކް އޮފް މޯލްޑިވްސް، (ބީއެމްއެލް)ގެ ބޭންކު ފަންޑުގެ އެހީގައި ތ. ވޭމަންޑޫ ސްކޫލުގައި ސެން ކުލާހެއް ގާއިމް ކޮށްފިއެވެ.

ބީއެމްއެލުން ބުނީ، މިއީ މިދިޔަ އަހަރު ބޭންކު ފަންޑުގެ ދަށުން އެހީ ލިބުނު ވޭމަންޑޫގެ ޒުވާނުންގެ ގުޅުމުން ހިންގި މަޝްރޫއެއް ކަމަށެވެ.

Ad by Hajj Corporation

އެގޮތުން ބީއެމްއެލްގެ ބޭންކު ފަންޑުގެ އެހީގައި ވޭމަންޑޫ ސްކޫލުގައި ސްޕެޝަލް އެޑިއުކޭޝަން ނީޑްސް، ސެން ދަރިވަރުންނަށް ހާއްސަކޮށްގެން ސެންސަރީ އަދި ވޮކޭޝަނަލް ކުލާސްރޫމެއް ތަރައްގީކޮށް މިހާރު ވަނީ ހުޅުވާފައެވެ.

ބީއެމްއެލްއިން ބުނީ، މި ކްލާސް ތަރައްގީކޮށްފައިވަނީ ދަރިވަރުންގެ ގާބިލުކަން އިތުރުކުރުމާއި، އެހެން މިހުންނާ ގުޅިގެން މުޖުތަމައުގައި ހަރަކާތްތެރިވުމަށް ބޭނުންވާ ހުނަރުތައް ދަސްކޮށްދިނުމަށާއި، އެ ކުދިންގެ ތައުލީމީ ބޭނުންތަކަށް ބަލައިގެން ކަމަށެވެ.

އެގޮތުން ވޭމަންޑޫ ސްކޫލުގެ އަމާޒަކީ މި ކްލާހުގައި ތައުލީމު ހާސިލުކުރާ ދަރިވަރުންނަށް ކެއްކުމާއި ފެހުން ފަދަ ދިރިއުޅުމުގެ ހުނަރުތައް ދަސްކޮށްދިނުމަށް ކްލާސްރޫމުގެ ހިދުމަތްތައް އިތުރަށް ފުޅާކުރުން ކަމަށް ވޭމަންޑޫ ސްކޫލާއި ހަވާލާދީ ބީއެމްއެލުން ބުންޏެވެ.

ވޭމަންޑޫގެ ޒުވާނުންގެ ގުޅުމުގެ ރައީސް އަޙްމަދު ޝައުގަތު ބުނީ، މި މަޝްރޫއުގެ މައިގަނޑު މަގްސަދަކީ އުގެނުމުގައި ހާއްޞަ އެހީއަށް ބޭނުންވާ ދަރިވަރުންނަށް ހާއްޞަކުރެވޭ ކުލާހަކުން ތަފާތު ހަރަކާތްތައް ހިންގޭނެ ގޮތެއް ފަހިކޮށްދިނުން ކަމަށެވެ. އަދި މިމަސައްކަތް ކުރުމަށް އެހީތެރިވި ފަރާތްތަށް ފާހަގަކޮށް އެފަރާތްތަކަށް ޝައުގަތު ވަނީ ޝުކުރުއަދާކުރެއްވިއެވެ.

ބީއެމްއެލުން ވަނީ މި އަހަރު މިހާތަނަށް ދެ ސްކޫލެއްގައި ސެން ކްލާސްތައް ތަރައްގީކޮށްފައިވެއެވެ. އެގޮތުން ހުޅުމާލޭގައި ހުންނަ ސަލާހްއްދީން ސްކޫލާއި، މާލޭ ހިރިޔާ ސްކޫލުގެ ސެން ކްލާސްރޫމްތައް ތަރައްގީކޮށްފައިވެއެވެ. މި ދެ މަޝްރޫއިން 200 އަށްވުރެ ގިނަ ދަރިވަރުންގެ އުނގެނުމުގެ މާހައުލު ތަރައްގީކޮށް، ވަސީލަތްތައް ފަހިކޮށްދޭފައިވާ ކަމަށް ބީއެމްއެލްއިން ވަނީ ބުނެފައެވެ.

ވޭތުވެދިޔަ އަހަރުތަކުގެ ތެރޭގައި ބީއެމްއެލުން ރާއްޖޭގެ އެކި ކަންކޮޅުތަކުގެ 40 ސްކޫލެއްގެ ސެން ކްލާސްތަކަށް ބޭނުންވާ އާލާތްތައް ވަނީ ހަދިޔާކޮށްފައެވެ. މީގެ އިތުރުން އަތޮޅުތެރޭގެ ސްކޫލުތަކުގެ ކޮމްޕިއުޓަރ ލެބްތައް ތަރައްގީކުރުމަށްވެސް އެހީތެރިކަން ފޯރުކޮށްދީފައިވާކަމަށް ވެސް ބީއެމްއެލް އިން ބުނެފައިވެއެވެ.