ކަފާލާތުގެ ދަށުން ވިކްރަމަސިންހަ ދޫކޮށްލި ނަމަވެސް އޭނާ އަދިވެސް އޮންނެވީ އައިސީޔޫގައި ކަމަށް ހޮސްޕިޓަލްގެ އޮފިޝަލުން ކަށަވަރުކޮށްދީފިއެވެ.

ޚިޔާނާތުގެ މައްސަލައެއްގައި ސްރީ ލަންކާގެ ކުރީގެ ރައީސް ރަނިލް ވިކްރަމަސިންހަ ހައްޔަރުކޮށް، ހަތަރު ދުވަހުގެ މުއްދަތަށް އޭނާ ބަންދުގައި ބެހެއްޓެވުމަށް އެ ޤައުމުގެ ކޯޓަކުން މުއްދަތު ޖެހީ އޮގަސްޓު މަހުގެ 22 ވަނަ ދުވަހުއެވެ. އުމުރުން 76 އަހަރުގެ ވިކްރަމަސިންހަ ހައްޔަރުކޮށްފައި ވަނީ ސްރީ ލަންކާގެ ފުލުހުންގެ މައި ތަޙުޤީޤީ އިދާރާ، ކްރިމިނަލް އިންވެސްޓިގޭޝަން ޑިޕާޓްމަންޓް (ސީއައިޑީ)ން ބަލަމުންދާ މައްސަލައަކާ ގުޅިގެންނެވެ.

Ad by Hajj Corporation

އެއީ ދައުލަތުގެ މުދަލާއި ފައިސާ ނަހަމަ ގޮތުގައި ބޭނުން ކުރެއްވުމުގެ ތުހުމަތުގައެވެ. ސީއައިޑީން ތަޙުޤީޤު ކުރަމުން ދަނީ، ރައީސްގެ މަޤާމުގައި ވިކްރަމަސިންހަ ހުންނެވިއިރު އިނގިރޭސިވިލާތުގެ ވެރިރަށް ލަންޑަނަށް ކުރެއްވި އަމިއްލަ ދަތުރުފުޅަކާ ގުޅޭ މައްސަލައެކެވެ.

އެ މައްސަލައިގައި ވިކްރަމަސިންހަ ހައްޔަރުކުރުމަށް ފަހު ކޮލޮމްބޯ ފޯޓް މެޖިސްޓްރޭޓްސް ކޯޓުން ކަފާލާތުގެ ދަށުން އޭނާ ދޫކޮށްލާފައި ވަނީ އޭނާގެ ޞިއްޙީ ޙާލަތަށް ރިއާޔަތްކުރުމަށް ފަހުގައެވެ. އެއީ ކަފާލާތުގެ ގޮތުގައި ޖުމްލަ 15 މިލިޔަން ސްރީލަންކަން ރުޕީސް ދައްކާ ގޮތަށެވެ. ޖަލުގައި ހުންނަވަނިކޮށް ޙާލު ދެރަވެގެން ހަސްފަތާލަށް ގެންދިޔަ ވިކްރަމަސިންހަ އަދިވެސް އޮންނެވީ ކޮލޮމްބޯ ނޭޝަނަލް ހޮސްޕިޓަލްގެ އައިސީޔޫގައެވެ.

ކޯޓުގެ ލިޔެކިޔުންތަކުން ދައްކާގޮތުގައި ވިކްރަމަސިންހަ ލަންޑަނަށް ކުރެއްވި ދަތުރުފުޅު ފުރަތަމަ ލިސްޓުކޮށްފައި ވަނީ އަމިއްލަ ދަތުރުފުޅެއްގެ ގޮތުގައެވެ. ނަމަވެސް ވިކްރަމަސިންހައާއި އަރިހުގައި ދަތުރުކުރެއްވި ބޭފުޅުންނަށް އެ ދަތުރުގައި ހިނގި ޚަރަދު ފަހުން ހަމަޖައްސާފައި ވަނީ ދައުލަތުގެ ބަޖެޓުގެ ތެރެއިންނެވެ. ކޯޓުގައި ދައުލަތުން ތުހުމަތުކުރަނީ ވިކްރަމަސިންހަ އެ ފައިސާ ޚަރަދުކުރައްވާފައި ވަނީ ނަހަމަގޮތުގައި ކަމަށެވެ.

ވިކްރަމަސިންހަގެ މައްސަލައިގައި ސްރީ ލަންކާ މި ވަނީ ދެބައިވެފައެވެ. ވިކްރަމަސިންހައަށް ތާއީދުކުރާ މީހުންނާއި އޭނާގެ ސިޔާސީ ޕާޓީގެ މެންބަރުން ބުނަމުން ދަނީ އޭނާއާ ދެކޮޅަށް އުފުލާފައިވާ ދައުވާތަކަކީ ސިޔާސީ މަޤްސަދެއްގައި އުފުލާފައިވާ ދައުވާތަކެއް ކަމަށެވެ. ބަންދާމެެދު ގޮތެއް ނިންމުމަށް ބޭއްވި އަޑުއެހުން ކުރިއަށްދިޔަ ކޯޓު ދޮށަށް އޭނާއަށް ތާއީދުކުރާ މީހުން އެއްވެ އެ ސަރަޙައްދުގައި މުޒާހަރާކޮށްފައި ވެސް ވެއެވެ. ކަފާލާތުގެ ދަށުން ވިކްރަމަސިންހަ ދޫކޮށްލުމަށް ނިންމުމުން އެ މީހުން ވަނީ އެ ސަރަޙައްދުގައި ތިބެ އުފާ ފާޅުކޮށްފައެވެ. އެ މުޒާހަރާތަކުގައި ފުލުހަކަށް އަނިޔާވިއިރު، ވިކްރަމަސިންހަ ވަނީ ޑިމޮކްރަސީ ދިފާޢުކުރުމުގައި އިދިކޮޅު ޕާޓީތަކުން ވެސް އެކުގައި މަސައްކަތް ކުރުމަށް ގޮވާލައްވައިފައެވެ.