ކުޅުދުއްފުށި ސިޓީގައި ރޭސިންއަށް ހާއްސަ މަގުތަކެއް ހަދަނީ
29 އޯގަސްޓު 2025 - 04:29

ކުޅުދުއްފުށި ސިޓީގައި ރޭސިންއަށް ހާއްސަ މަގުތަކެއް ހަދައިދިނުމަކީ ސަރުކާރުގެ ޕްލޭނެއްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އަތޮޅުތެރެއަށް ކުރެއްވި ދަތުރުފުޅުގައި ހދ. ކުޅުދުއްފުށި ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

Ad by Hajj Corporation
ރޭސިންގ އަށް ބޭނުންކުރެވޭ މަގުތައް ހިމެނޭ ގޮތަށް، ސިޓީގެ މަގުތައް ޒަމާނީ ފެންވަރަށް ތަރައްޤީކުރުމުގެ ތިންވަނަ ފިޔަވަހީގެ މަޝްރޫޢުގެ އަމަލީ މަސައްކަތް މިހާރުވަނީ ފަށާފައެވެ.
ކުޅުދުއްފުށީގައި ކުޅިވަރުގެ އެކި މަޝްރޫއުތައް ކުރިއަށްދާއިރު ކުޅުދުއްފުށީ ސްޕޯޓްސް ކޮމްޕްލެކްސް ތަރައްޤީކުރުމުގެ މަޝްރޫޢުގެ އިތުރުން، ފުޓުބޯޅަ އާއި ހޭންޑް ބޯލް ކުޅޭ ޑުއަލް ދަނޑެއްގެ މަސައްކަތްވެސް ކުރިއަށްގެންދަވާނޭ ކަމަށް އެމަނިކުފާނު ވިދާޅުވިއެވެ. މީގެ އިތުރުން ސިންތެޓިކް ޓްރެކްގެ މަސައްކަތް ޑިސެމްބަރު މަހު ފައްޓަވައި، އަންނަ މަހު ބާއްވާ ކޮމަންވެލްތު ބީޗް ހޭންޑްބޯލް ޓޯނަމަންޓަށް އަމާޒުކުރައްވައިގެން ބީޗް ހޭންޑްބޯލް ސްޓޭޑިއަމެއް ޤާއިމުކުރައްވާނޭކަމަށް އެ މަނިކުފާނު ވިދާޅުވެފައިވެއެވެ.
ރޭސިން އަދި ޑްރިފްޓް އެރީނާތައް މާލެ ސަރަހައްދުގައިވެސް ތަރައްގީކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.