ރައްޔިތުންގެ މަޖިލީހަށް 19 އޯގަސްޓް 2025  ގައި ތުޅާދޫ ދާއިރާގެ މިނިވަން މެމްބަރު އަބްދުލްހަންނާނު އަބޫބަކުރު، އޭނާގެ އަމިއްލަ ހައިސިއްޔަތުން ހުށަހަޅުއްވާފައިވާ ''މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލު"  މި ހާރު އޮތީ މަޖިލީހުގެ ކޮމެޓީ މަރުހަލާގައެވެ. މިއީ މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ބަދަލުގައި، "މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން" ގެ ނަމުގައި އައު ކޮމިޝަނެއް އުފައްދައި ހިޔާލުފާޅުކުރުމުގެ މިނިވަންކަމާއި ނޫސްވެރިކަން ކުރިއެރުވުމުގެ މަގްސަދުގައި ހުށަހެޅުއްވި ބިލެކެވެ.

މި ބިލު ހުށަހެޅުއްވި ހަންނާން ވިދާޅުވެފައިވާ ގޮތުގައި ބިލަކީ ރާއްޖޭގެ މީޑިއާ ބާރުވެރިކުރުމުގެ މަޤްޞަދުގައި އޭނާ ހުށަހަޅުއްވާފައިވާ ބިލެކެވެ. އަދި މީޑިއާތަކަށް ފުރިހަމަ ބާރާއި އިމްތިޔާޒުތަކާއި ޙައްޤުތައް ލިބިދީ، ތެދު ޚަބަރު ފެތުރުމަށް މި ބިލުން މަގުފަހިކޮށްދީފައިވާކަމަށް ވިދާޅުވެ، އެ ބިލަށް އެއްބާރުލުން ދިނުމަށް އޭނާ ވަނީ އެ ބިލު ހުށަހެޅި ދުވަހު ވެސް އެދިވަޑައިގެންފައެވެ.

Ad by Hajj Corporation

މީޑިއާގެ މިނިވަންކަމަށް ވެސް ހުދޫދެއް އޮންނަންވާނެ

މީޑިއާގެ މިނިވަންކަން ވެސް އޮންނަންވާނީ ހުދޫދެއްގެ ތެރޭގައިކަމީ ހަމަ ޤަބޫލުކުރާ ކޮންމެ ނޫސްވެރިޔަކުވެސް، ކޮންމެ ރައްޔިތަކު ވެސް ޤަބޫލު ކުރާނެކަމެކެވެ. މި ހަމައިގެ ތެރެއިން ނަޒަރުކުރާއިރު މީޑިއާތައް ރަނގަޅަށް މީޑިއާ ރެގިއުލޭޓް ކުރެވޭނެ ހަމައަކުން، ޚަރަދުކުޑަ ނިޒާމެއްގެ ތެރެއިން މިނިވަން، އެއްވެސް ފަރާތެއްގެ ނުފޫޒެއް ނެތް މީޑިއާއެއް ގާއިމުރުމަކީ ހުރިހާ ރައްޔިތުންގެ މެދުގައި ހަމަހަމަކަން ގާއިމުވެ އަދުލުވެރިކަމާއި، އިންސާފާއި، އަބުރުގެ ރައްކާތެރިކަމާއި އެކުވެރިކަމާއި އަޚުވަންތަކަން އާލާވާނެ މަގެވެ.

ނޫސްވެރިކަމުގެ މިނިވަންކަމުގެ މާނައަކީ މީހުންގެ އަބުރުކަތިލައި، ކުޑަކުދިންނާއި ދުވަސްވީ މީހުންގެ ކަރާމާތަށް އަރައިގަތުމަށް އޮތް ލައިސަންސެއްނޫނެވެ. އަދި ކިއެއްތަ، އެއީ ސިޔާސީ ފިކުރުތައް ހަންފެތުރުމަށް އޮތް ހަތިޔާރެއް ވެސް ނުމެނޫންމެއެވެ.

އަބަދުވެސް ރައްޔިތު މީހާގެ އަޑު އައްސަވާ ވެރިއެއް

ރައީސް ޑރ. މުޙައްމަދު މުޢިއްޒަކީ މިހާތަނަށް ވެރިޔަކު ރާއްޖޭގެ ރައްޔިތުންނާއި އެންމެ ގާތުން މަސައްކަތްކުރެއްވުމުގެ ރެކޯޑް ވެރިކަމުގެ ދޮޅު އަހަރުގެ ތެރޭގައި ވެސް އޮތް ހަމައެކަނި ރައީސެވެ. އެމަނިކުފާނުގެ ވެރިކަމުގެ ދޮޅު އަހަރުގެ ތެރޭގައި ރާއްޖޭގެ މަދު އަތޮޅަކަށް ނޫނި ވަޑައިގެން ސީދާ ރައްޔިތު މީހާގެ އަޑު އައްސަވައި ހާލު ބައްލަވައިފިއެވެ. އޮންލައިން އެކި ޕްލެޓްފޯމްތައް މެދުވެރިކުރަށްވައި ރައްޔިތު މީހާއާއި އެމަނިކުފާނު ކޮންމެ ހަފުތާއަކު ހެން ގުޅާލަދެއެވެ. އެހެންކަމުން ކަންބޮޑުވުން އޮންނަ ކޮންމެ ދާއިރާއެއް ނިސްބަތްވާ ބަޔަކާއި ބައްދަލުކުރަށްވައި ކަންކަން ހައްލުކޮށްދެއްވުމުގެ މިސާލީ ވެރިއެއްގެ ގޮތުގައި ވެސް އެމަނިކުފާނު ފާހަގަވެއެވެ.

މަޖިލީހުގެ މެމްބަރު ންނާން ހުށަހަޅުއްވާފައިވާ ބިލާއި ގުޅިގެން ނޫސްވެރިންތަކެއްގެ ކަންބޮޑުވުން ރައީސް ޑރ. މުޙައްމަދު މުޢިއްޒު އިއްޔެ ވަނީ އައްސަވާފައެވެ. އެ މަނިކުފާނު ނޫސްވެރިންނަށް ދެއްވި ޔަގީންކަމަކީ މިއީ 100 ޕަސެންޓް މީޑިއާ ޕްރޯ ސަރުކާރެއްކަމެވެ. މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި މީޑިއާ ރެގިއުލޭޓްކުރުމުގައި ސަރުކާރުގެ ކޮންޓްރޯލް ބާއްވަން ބޭނުންފުޅުނުވާ ކަމަށާއި، މެންބަރުން އައްޔަނު ކުރުމުގައިވެސް ސަރުކާރުގެ އެއްވެސް ދައުރެއް ބާއްވަން ބޭނުންފުޅުނުވާ ކަމަށް ވިދާޅުވިއެވެ. އަދި މިހާރު ރައްޔިތުންގެ މަޖިލީހަށް ހުށަހެޅިފައިވާ ބިލުގެ ވަކި ވަކި މާއްދާތަކުގައި ހުރި ކަންބޮޑުވުންތަކަށް ސަރުކާރުގެ ފަރާތުން އިސްލާޙް ހުށަހަޅުއްވާނެކަމަށްވެސް އެ މަނިކުފާނު ވިދާޅުވިއެވެ. އަދި ރާއްޖޭގެ މީޑިއާގެ މިނިވަންކަން ދެމެހެއްޓުމަށް ހުރިހާ ފަރާތްތަކަށް ސަރުކާރުން އަބަދުވެސް އެއްބާރުލުން ދެއްވާނެކަމުގެ ޔަޤީންކަން ވެސް ރައީސް ދެއްވިއެވެ.

މީޑިއާތައް ކޮންޓްރޯލް ކުރުމަށް އެއްވެސް ޝައުޤުވެރިކަމެއް ނެތް

އޭގެ ކުރިން 25 އޯގަސްޓް 2025 ދުވަހުގެ ރޭ ހދ. ނޮޅިވަރަންފަރުގައި ވާހަކަފުޅު ދައްކަވަމުން ރައީސް މުޢިއްޒު ވަނީ މި ބިލާމެދު އެމަނިކުފާނުގެ ވިސްނުންފުޅު ހާމަކުރައްވާފައެވެ. އެ ދުވަހު ރައީސް ވިދާޅުވީ، ސަރުކާރުން މަސައްކަތް ކުރަމުންދާނީ ރައްޔިތުން ބޭނުންވާގޮތަށް ކަންކަން ގެންދިޔުމަށް ކަމަށާއި، ރައްޔިތުން އެދޭ ކަންކަން ފުރިހަމައަށް ހާސިލުކޮށްދިނުމަކީ ސަރުކާރުގެ ޒިންމާއެއް ކަމަށެވެ. އަދި ސިޔާސީ ޕާޓީތައް ކަމުގައިވިޔަސް، އަދި އެހެނިހެން ޖަމުޢިއްޔާ ޖަމާޢަތްތައް ކަމުގައިވިޔަސް، އަދި މީޑިއާ ކަމުގައިވިޔަސް، ކޮންމެ ފަރާތެއްގެވެސް ޒިންމާތަކެއްވާނެ ކަމަށެވެ. އެމަނިކުފާނު ވަނީ މީޑިއާތައް ކޮންޓްރޯލް ކުރުމަށް އެއްވެސް ޝައުޤުވެރިކަމެއް ނެތް ކަމަށާއި، އެއީ އެއްވެސް އިރަކު ކުރި ކަމެއްވެސް ނޫން ކަމަށާއި، ކުރާނެ ކަމެއްވެސް ނޫން ކަމަށް ވިދާޅުވެފައެވެ. އެހެންނަމަވެސް، ޒިންމާދާރުކަމާ އެކީގައި ހުރިހާ ފަރާތްތަކުންވެސް މަސައްކަތް ކުރަންޖެހޭނެ ކަމަށް ރައީސް ވިދާޅުވިއެވެ.

''އަޅުގަނޑަށް މަޢުލޫމާތު ލިބޭގޮތުގައި، އަމިއްލަ މެންބަރަކު މިހާރު އެބައޮތް، މީޑިއާއާ ބެހޭ ބިލެއް ހުށަހަޅާފައި. ސަރުކާރުގެ ފަރާތުން، ސަރުކާރުގެ ޕާޓީން، ޕީ.އެން.ސީގެ މެންބަރުންނަށް އަޅުގަނޑު މިހާރުވާނީ ދަންނަވާފައި، އަޅުގަނޑުގެ އެއްވެސް ކޮންޓްރޯލެއް އޮންނަ ގޮތަކަށް މިކަން ކުރާކަށް ބޭނުމެއްނޫނޭ. އެ ބިލުގައި ހުށަހަޅާފައި އެބައޮވޭ، ރައީސުލްޖުމްހޫރިއްޔާ ޢައްޔަންކުރާ މެންބަރެކޭ، އެ ބިލު ފާސްވެގެން ޤާނޫނަކަށްވަންޏާ، ވާއިރުގައި އުފެދޭ ކޮމިޝަންގެ ރައީސަކަށް ހުންނާނީ. އެގޮތަކަށް އަޅުގަނޑު އެކަމެއް ނުކުރާނަން. އަޅުގަނޑު މިހާރު ދަންނަވާފައި ވާނެ، އެ އިޞްލާޙުކުރާ މަރުޙަލާއަކަށް ހިނގައްޖެނަމަ އިޞްލާޙު ކުރާއިރުގައި، އެ އުފެދޭ ކޮމިޝަންގެ ތެރެއިން، އެ ކޮމިޝަންގެ މެންބަރުން ވޯޓުލައިގެން ނަގާ މީހެކޭ ރައީސަކަށްވާންވާނީ.'' ރައީސް އެދުވަހު ވިދާޅުވެފަވެއެވެ.

މީޑިއާ ވާންޖެހޭނީ ނުފޫޒެއްނެތި މިނިވަންކަމާއެކު އޮޕަރޭޓްކުރާ ބަޔަކަށް

ރައީސް މުޢިއްޒު ވަނީ، އެއްގޮތަކަށްވެސް މީޑިއާއަށް ނުފޫޒުފޯރުވާ ބަޔަކަށްވުމަށް ބޭނުންފުޅުނުވާ ކަމަށް ތަކުރާރުކޮށް ވިދާޅުވެފައެވެ. މީޑިއާ ވާންޖެހޭނީ މިނިވަންކަމާއެކު އޮޕަރޭޓްކުރާ ބަޔަކަށް ކަމަށް އެމަނިކުފާނު ދެކެވަޑައިގަންނަވާކަމަށް ވެސް ވަނީ ވިދާޅުވެފައެވެ. މިހާރު އެ ބިލުގައި އޮތްގޮތުން 7 މެންބަރުންގެ ކޮމިޝަނެއް ހަދާގޮތަށް އޮތްއިރު، އޭގެ ތެރެއިން 4 މެންބަރުން ނަކީ މީޑިއާތަކުން ވޯޓުލައިގެން ހޮވާ ބައެއްކަމަށާއި، ދެންތިބި 3 މެންބަރުން ހޮވަނީ ހުޅުވާލައިގެން ލިބޭ ނަންތަކުގެ ތެރެއިން ރައްޔިތުންގެ މަޖިލީހުން ވޯޓުލައިގެންކަން ރައީސް ވަނީ ފާހަގަކުރަށްވާފައެވެ

''އެ 7 މީހުންގެ ތެރެއިންވެސް، ރައީސް ނަގަން އަޅުގަނޑު ބޭނުންވަނީ، އެ 7 މީހުން ވޯޓުލައިގެން. އެހެންވީމާ، އެއްވެސްވަރަކަށް އަޅުގަނޑުގެ ކޮންޓްރޯލެއް އޮންނަ ގޮތަކަށް އެއްވެސް ކަމެއް ބޭނުމެއްނޫން، މީޑިއާ ރެގިއުލޭޓް ކުރުމުގައިވިޔަސް، އަދި ބެލެހެއްޓުމުގައިވެސް އޮންނާކަށް. އަޅުގަނޑު ދެކޭގޮތުގައި އޮންނަންވާނީ، ފުރިހަމަ މިނިވަންކަން އޮންނަގޮތަށް. ދެފުށް ފެންނަގޮތަށް. ޒިންމާދާރުކަމާއެކީގައި ހިންގޭ މީޑިއާއެއްގެ ގޮތުގައި.'' ރައީސް ވިދާޅުވެފަވެއެވެ.

ރައީސް ވިދާޅުވީ، ހުރިހާ ފަރާތްތަކުންވެސް ޒިންމާދާރުކަމާއެކީގައި މަސައްކަތްކުރާނެކަމަށް ދެކިވަޑައިގަންނަވާ ކަމަށެވެ. އަދި ތެދުބަހުން މަޢުލޫމާތު ފެތުރުމާއި، ކަންކަމުގައި ދެކޮޅުބަލައި، ޙަޤީޤަތް އޮޅުންފިލުވައިގެން، ތެދު މަޢުލޫމާތު ފޯރުކޮށްދޭނޭކަން ޔަޤީންކުރައްވާކަމަށް ވެސް ވިދާޅުވިއެވެ.

މި ސަރުކާރަކީ ނުފޫޒުން ސަލާމަތްކޮށްދޭނެ 100 ޕަސެންޓް މީޑިއާ ޕްރޯ ސަރުކާރެއް

ރާއްޖޭގެ ތާރީޚްގައި ދިވެހި ނޫސްވެރިކަމަށް ސަރުކާރަކުން ދީފައިނުވާ އަހައްމިއްޔަތު މި ސަރުކާރުން ވަނީ ދީފައެވެ. އޭގެ މިސާލަކީ ނޫސްތަކާއި މީޑިއާ އަށް ދައުލަތުގެ މާލިއްޔަތުން އެހީތެރިކަން ލިބޭނެ ނިޒާމެއް ފުރަތަމަ ފަހަރަށް ސަރުކާރަކުން ގާއިމުކުރެއްވުމުގެ ރެކޯޑު އޮތީ މި ސަރުކާރުގައެވެ. އެ ނިޒާމު ހިންގެވުމަށް މިހާރު ވަނީ ފައްޓަވާފައެވެ.

އަނެއްކަމަކީ މީޑިއާތަކަށް ސަރުކާރަކުން ފުރަތަމަ ފަހަރަށް މަސައްކަތްކުރާނެ ޖާގައެއް ހަމަޖައްސައިދެއްވުމުގެ ރެކޯޑް ވެސް އޮތީ މި ސަރުކާރުގައެވެ. މިގޮތުން މީޑިއާތަކަށް ބޮޑު ލުއިފަސޭހަކަން ލިބިދޭނެ މީޑިއާ ވިލެޖް ހެދުމުގެ އަމަލީ މަސައްކަތް މިހާރު ވަނީ ފަށާފައެވެ.

ތިންވަނަ ރެކޯޑަކީ ދައުލަތުގެ އަދި ސަރުކާރުގެ އެންމެ އިސް އޮފީސް ކަމުގައިވާ ރައީސުލްޖުމްހޫރިއްޔާގެ އޮފީހުގައި ހިނގާ ކަންކަމާއި، އެ ސަރަހައްދުގައި ހިމެނޭ ސަރުކާރު އޮފީސްތަކުގައި ހިނގާ ކަންކަމުގެ ޚަބަރާއި މަޢުލޫމާތު ރަސްމީ ގަޑީގައި މީޑިއާއިން ހޯދުން ފަސޭހަކޮށްދިނުމަށް މީޑިއާތަކަށް ގާއިމުކޮށްދިން މީޑިއާ ފެންޑާއެވެ. މިއީ ވެސް އެއްވެސް ސަރުކާރަކުން މީޑިއާތަކަށް ފަހިކޮށްދިން ފުރުސަތެއްނޫނެވެ.

އަނެއް ރެކޯޑަކީ ސަރުކާރުގެ ޚަބަރުތަކާއި ސަރުކާރުގެ ވުޒާރާތަކާއި އިދާރާތަކުން ކުރާ މަސައްކަތްތައް އަދާހަމަކޮށް، ދުވަހުން ދުވަހަށް ލިބޭނެ މުހިންމު ވަސީލަތެއްގެ ގޮތުގައި ''https://sarukaaru.gov.mv/'' ނަމުގައި ގާއިމުކޮށްފައިވާ މައުލޫމާތު ހޯދާ ލިބިގަތުމުގެ ޕްލެޓް ފޯމެވެ. މިއީ ވެސް މިހާތަނަށް ސަރުކާރަކުން ފޯރުކޮށްދިން ފުރުސަތެއްނޫނެވެ.

ހަތަރުވަނަ ކަމަކީ ''ގައުމީ ނިއުސް އެޖެންސީ" އެއް އުފެއްދުމުގެ މުހިންމު ފިޔަވަޅެވެ. މިއީ ވެސް މީޑިއާތަކަށް މައުލޫމާތު ހޯދައި ލިބިގަތުމަށް ސަރުކާރުން ހުޅުވާލަދޭ މުހިންމު ދޮރެކެވެ. އެހެނީ، ހަބަރާއި މަޢުލޫމާތު ފެތުރުމުގެ ދާއިރާއިންނާއި މައުލޫމާތު ލިބިގަތުމުގައި ހުރި ފަސޭހަތައް އިތުރަށް ހަރުދަނާކޮށް ފުޅާކުރުމަކީ ރައީސް ޑރ. މުޙައްމަދު މުއިއްޒުގެ ވައުދުފުޅު ތެރޭގައި ހިމެނޭ މުހިއްމު އެއް ސިޔާސަތެވެ.

ފަސް ވަނަ ކަމަކީ ވެރިޔަކު މިހާތަނަށް ނޫސްވެރިންނާ ނުބަހައްޓާ ގާތްކަމާއި ނުދެއްވާ ވަގުތު ދެއްވާ ރައީސަކަށް ރައީސް މުޢިއްޒު ވެވަޑައިގެންފައި ވުމެވެ. ނޫސްވެރިން ހޯދަން ބޭނުންވާ މައުލޫމާތު ސީދާ އެމަނިކުފާނުގެ ފަރާތްޕުޅުން އެރުވުމުގައި ވަރުބަލިކަމެއްނެތި ރައީސް މުޢިއްޒު ނޫސްވެރިންނާއެކު 14 ގަޑިއިރާއި 55 މިނިޓް ހޭދަކުރެއްވިއެވެ. މިއީ ދުނިޔޭގެ ވެސް ރެކޯޑެކެވެ. އެމަނިކުފާނު ވަނީ ނޫސްވެރިންގެ ސުވާލުތައް ހުސްވަންދެން ވަގުތުދެއްވައި ޖަވާބު ދެއްވާފައެވެ.

މިފަދަ އެތައް ރެކޯޑެއް ނޫސްވެރިކަމުގެ ދާއިރާގެ ކުރިއެރުމަށް މި ސަރުކާރުގެ ދޮޅު މަސް ތެރޭގައި ވަނީ ގާއިމުކޮށްފައެވެ. މިނިވަން ނޫސްވެރިކަމަށް މަގުފަހިވެ، ރައްޔިތުންނަށް ތެދު އަދި ހަމަހަމަ މަޢުލޫމާތު ފޯރުކޮށްދިނުމުގެ ހަމަހަމަ ފުރުސަތު ނޫސްވެރިންނަށް ލިބިދޭނެ ހުރިހާ ދޮރެއް މި ސަރުކާރުން ވަނީ ހުޅުވައިދީފައެވެ. އެހެންކަމުން މި ސަރުކާރަށް ނޫސްވެރިކަމާއި ގުޅުވައި ނުކަސިޔާރު ތުހުމަތެއް މަތިކުރުމުގެ އެއްވެސް ފުރުސަތެއް ނެތެވެ.

މިއަދުގެ ޙަޤީޤަތަކީ ނޫސްވެރިންކޮޅެއް އަޚްލާގީ އިމުންނެއްޓި، މުޖުތަމައުއަށް ދައްކަންވީ މިސާލުގެ މަތީން ހަނދުމަނެތި، ރައީސަކަށް ކުޑައިމީސްވާ ބީދައަކުން ޢަމަލުކުރުމުން ވެސް ރައީސް މުޢިއްޒު އެ ވަޑައިގަންނަވަނީ ހިނިތުންވުމާއެކުގައެވެ. ޢަމަލާއި ބަހުން އެ ދައްކަވަނީ މިއީ ހަމަ ޙަޤީޤަތުގައި ވެސް އެކިފަރާތްތަކުގެ ނުފޫޒުން މީޑިއާއާއި ނޫސްވެރިކަން ސަލާމަތްކޮށްދޭނެ 100 ޕަސެންޓް މީޑިއާ ޕްރޯ ސަރުކާރެއްކަމެވެ.