ވ. ފެލިދޫގައި އަންނަ އަހަރު 12 ހެކްޓަރުގެ ބިން ހިއްކުމުގެ ބޮޑު މަޝްރޫޢެއް ފައްޓަވާނެ ކަމަށް ރައީސް ޑރ. މުޙައްމަދު މުޢިއްޒު އިއްޔެ ވިދާޅުވެއްޖެއެވެ.

އެމަނިކުފާނު މިކަން ހާމަކުރެއްވީ ހަތަރު އަތޮޅެއްގެ މީހުން އުޅޭ ރަށްތަކަށް ހުކުރު ދުވަހު އެމަނިކުފާނު ފެއްޓެވި އަށް ދުވަހުގެ ދަތުރުފުޅުގައި ވ.ފެލިދޫއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

Ad by Hajj Corporation

އެމަނިކުފާނުގެ ވާހަކަފުޅުގައި، ފެލިދޫގެ ތަރައްޤީއަށް ސަރުކާރުން ރާވާފައިވާ މަޝްރޫޢުތަކަށް އަލިއަޅުއްވާލައްވަމުން ވިދާޅުވީ، ހޮނިހިރު ދުވަހު ޢަމަލީ މަސައްކަތް ފެށުމަށް ހަމަޖެހިފައިވާ 30 އެނދުގެ ހޮސްޕިޓަލް ތަރައްގީކުރެވިގެންދާނީ ޒަމާނީ ހޮސްޕިޓަލެއްގެ ގޮތުގައި ކަމަށެވެ.

މީގެ އިތުރުން، އިންޑޯ ސްޕޯޓްސް ކޮމްޕްލެކްސްއެއްގެ ގޮތުގައި ފިޓްނަސް އެންޑް ރިކްރިއޭޝަން ސެންޓަރެއް ފެލިދޫގައި ތަރައްޤީކޮށްދެއްވާނެ ކަމަށްވެސް ރައީސް ވިދާޅުވިއެވެ.

ސްކޫލް ތަރައްޤީކުރުމުގެ މަޝްރޫޢަށް އަލިއަޅުއްވާލައްވަމުން ރައީސް މުޢިއްޒު ވިދާޅުވި ގޮތުގައި،އެ ރަށުގައި 14 ކްލާސްރޫމްގެ 4 ބުރީގެ އިމާރާތެއް ތަރައްޤީކުރުމުގެ މަސައްކަތް މިއަހަރު ފައްޓަވާނެ ކަމަށާއި، އެކަމުގެ އިދާރީ މަސައްކަތްތައް ނިމި، ޢަމަލީގޮތުން މަސައްކަތް ފެށުމުގެ މަރުހަލާއަށް އާދެވިފައިވާ ކަމަށް ރައީސް ފާހަގަކުރެއްވިއެވެ.

ޞިއްޙީ ޚިދުމަތްތައް ފުޅާކުރުމުގެ ގޮތުން، ރާއްޖޭގެ ސީ-އެމްބިއުލާންސް ފްލީޓަށް އުޅަނދުތައް އިތުރުކޮށް، ފެލިދެއަތޮޅުގައިވެސް މި ޚިދުމަތް ޤާއިމުކުރެވޭނެ ކަމަށް ރައީސް ވިދާޅުވިއެވެ.

މި މަޝްރޫޢުތަކުގެ ސަބަބުން ފެލިދޫގެ ރައްޔިތުންނަށް ލިބޭނެ ފައިދާތަކުގެ ވާހަކަ ދައްކަވަމުން ރައީސް މުޢިއްޒު ވިދާޅުވީ، ބިން ހިއްކުމުގެ މަޝްރޫޢާއި އެހެނިހެން ތަރައްޤީގެ މަޝްރޫޢުތަކުން ރަށުގެ އިޤްތިޞާދީ އަދި އިޖްތިމާޢީ ދުޅަހެޔޮކަން އިތުރުވެގެންދާނެ ކަމަށެވެ.