ރާއްޖޭގައި މީގެކުރިން ވެރިކަން ކުރެއްވި ބޭފުޅުންނާ ޚިލާފަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ހަމައެކަނި އިންތިޚާބުތަކަށް ކަޑަޖައްސަވަން ރަށްރަށަށް ވަޑައިގަންނަވާ ބޭފުޅެއްނޫންކަން ވަރަށް ސާފު ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު ޝިޔާމް މިހެން ވިދާޅުވީ, ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަތަރު އަތޮޅަކަށް މިހާރު ކުރައްވަމުންގެންދަވާ ދަތުރުފުޅާ ގުޅިގެން އެކްސްގައި ކުރެއްވި ޕޯސްޓެއްގައެވެ.

Ad by Hajj Corporation

ވަޒީރު ވިދާޅުވީ މަލްޓި-ޕާޓީ ޑިމޮކްރަސީއެއްގައި، ރަށްރަށުގެ ތަރައްގީއަށްޓަކައި ރައީސް ކުރައްވަމުން ގެންދަވަނީ އިޚްލާސްތެރި މަސައްކަތްޕުޅުތަކެއް ކަން، އެމަނިކުފާނާ ސިޔާސީ ގޮތުން ހިޔާލު ތަފާތު ބޭފުޅުން ވެސް މިއަދު ގަބޫލުކުރައްވާ ކަމަށެވެ. އަދި ރައްޔިތުންނާ ގާތަށް ވަޑައިގެން އެމަނިކުފާނު  އެ ގެންދަވަނީ ރައްޔިތުން ބޭނުންވާ ކަންކަން ސީދާ އެ  ރައްޔިތުންގެ ކިބައިން އައްސަވައި ސާފުކުރައްވަމުން ކަމަށް ވަޒީރު ޝިޔާމް ވިދާޅުވިއެވެ.

ވަޒީރު ވިދާޅުވީ ރާއްޖޭގައި މީގެކުރިން ވެރިކަން ކުރެއްވި ބޭފުޅުންނަކީ އިންތިޚާބުތަކަށް ކަޑަޖައްސަވަން ރަށްރަށަށް ވަޑައިގަންނަވާ ބޭފުޅުން ކަމަށެވެ. ނަމަވެސް އެއާ ޚިލާފަށް ރައީސް ޑރ. މުޢިއްޒަކީ ހަމައެކަނި އިންތިޚާބުތަކަށް ކަޑަޖައްސަވަން ރަށްރަށަށް  ވަޑައިގަންނަވާ ބޭފުޅެއްނޫންކަން ވަރަށް ސާފު ކަމަށް ވަޒީރު ވިދާޅުވިއެވެ.

ހަތަރު އަތޮޅެއްގެ 31 ރަށަކަށް ރައީސް ފެށްޓެވި ދަތުރުފުޅުގެ ފުރަތަމަ މަންޒިލެއްގެ ގޮތުގައި ވ.ފުލިދުއަށް ވަޑައިގެން އެމަނިކުފާނު ވަނީ ބަނދަރު ތަރައްގީކުރުމުގެ މަޝްރޫއާއި، ސިއްހީ މަރުކަޒަށް އަލަށް އިތުރުކުރާ އިމާރާތުގެ މަސައްކަތުގެ އަމަލީ މަސައްކަތް ފަށްޓަވައި ދެއްވައިފައެވެ. އަދި އެމަނިކުފާނު ވަނީ އެ ރަށުގައި ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމްގެ ޚިދުމަތް ވެސް ފަށްޓަވައި ދެއްވައިފައެވެ. ބީއެމްއެލް އޭޓީއެމްތައް ރާއްޖޭގެ ހުރިހާ ރަށެއްގައި ގާއިމްކުރުމަށް ސަރުކާރާއި އެ ބޭންކު ގުޅިގެން ކުރަމުންދާ މަސައްކަތުގެ ތެރެއިން، ވ. އަތޮޅު ހިމެނޭހެން ޖުމްލަ 12 އަތޮޅެއްގައި މި ޚިދުމަތް ފަށާފައެވެ.