މާފަންނު ބޮޑުގެ މިސްކިތް ހުރި ތަނުގައި ދާއިމީ މިސްކިތެއް އެޅުމަށްޓަކައި އެ ތަނުގައި މިހާރު ހުރި ވަގުތީ މިސްކިތް މިމަހުގެ 17 ވަނަ ދުވަހު ބަންދުކުރުމަށް ނިންމައިފި އެވެ.

އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވިގޮތުގައި މިސްކިތް މިމަހުގެ 17 ވަނަ ދުވަހު ހުކުރު ނަމާދަށްފަހު ބަންދުކުރެވޭނެއެވެ.

Ad by Hajj Corporation

މިސްކިތް ބަންދުކުރުމަށްފަހު، އެތަނުގައި މިހާރު ހުރި ވަގުތީ މިސްކިތް ތަޅާލުމުގެ މަސައްކަތް ފެށޭނެއެވެ. އަދި އަންނަ މަހުގެ 4 ވަނަ ދުވަހު އާ މިސްކިތުގެ ބިންގާ އެޅުމުގެ މަސައްކަތް ފެށޭނެކަމަށް ވަޒީރު ވިދާޅުވިއެވެ. މާފަންނު ބޮޑުގެ ބިމުގައި އަލަށް އިމާރާތްކުރާ މިސްކިތަކީ ތިން ފަންގިފިލާގެ ދާއިމީ މިސްކިތެކެވެ.

އިސްލާމީ ކަންތައްތަކާބެހޭ ވުޒާރާއިން ބުނީ، މި މިސްކިތަކީ ހަމައެކަނި ނަމާދުކުރުމަށް ހާއްސަކުރެވޭ ތަނެއް ނޫނެވެ. މިސްކިތުގައި ދީނީ އިލްމު އުނގަންނައިދިނުމަށް ބޭނުންވާ ކްލާސްރޫމްތަކާއި ލައިބްރަރީއެއްވެސް ހިމެނޭނެއެވެ. ހާއްސަކޮށް ޤުރްއާނުގެ އިލްމު އުނގަންނައިދިނުމަށް ވަކި ޖާގައެއް ހާއްސަކުރެވިފައިވާނެއެވެ.

މި މަޝްރޫއަކީ މިދިޔަ އަހަރުގެ ނޮވެމްބަރު މަހު ވިޔަފާރިވެރިންގެ ޓީމަކާ ހަވާލުކުރެވުނު މަޝްރޫއެކެވެ. މިއީ މާލެއާއި އަތޮޅުތެރޭގައި ކުރިއަށްދާ ގިނަ މިސްކިތް އިމާރާތްކުރުމުގެ މަޝްރޫއުތަކުގެ ތެރެއިން އެއް މަޝްރޫއެވެ. ވަޒީރު ޝަހީމް ވިދާޅުވިގޮތުގައި، މާލެ ސަރަހައްދާއި އަތޮޅުތަކުގައި ކުރިއަށްދާ 15 މިސްކިތުގެ މަޝްރޫއު އަންނަ ރަމަޟާން މަހަށް ނިމި، ބޭނުންކުރަން ފެށޭނެއެވެ.

ނިމިގެން ދިޔަ 2024 ވަނަ އަހަރު މުޅިން އަލަށް ތިން މިސްކިތެއް ހުޅުވިއިރު މީގެތެރެއިން ދެ މިސްކިތަކީ އަމިއްލަ ފަރާތަކުން ބިނާކޮށްފައިވާ މިސްކިތްތަކެވެ.

އިސްލާމީ ކަންތައްތަކާބެހޭ ވުޒާރާއިން މިދިޔަ އަހަރު ވަނީ އިތުރު 9 މިސްކިތެއް ބިނާކުރުމަށް އަމިއްލަ ފަރާތަކަށް ހުއްދަ ދީފަ އެވެ. މީގެތެރޭގައި ހިމެނެނީ މާލެ ސަރަހައްދުގައި ބިނާ ކުރާ ފަސް މިސްކިތާއި އަތޮޅުތަކުގައި ބިނާކުރާ 4 މިސްކިތެވެ.