ހެކީގެ ގޮތުގައި ހިފެހެއްޓިފައިވާ ފޯނަކުން ފޮޓޯ/ވީޑިއޯ ލީކުވިކަމަށް ކުރަނީ ތުހުމަތަކީ ދޮގެއްކަމަށަ ފުލުހުން ބުނެފިއެވެ.

ފުލުހުންނަށް އިންޒާރުދޭ މައްސަލާގައި ހިފެހެއްޓި ފޯނަކުން، އެ ފޯނު ފުލުހުންގެ ބެލުމުގެ ދަށުގައި އޮއްވާ ފޮޓެއް ލީކުވިކަމަށް ފޯނުގެ ވެރިފަރާތުން ވަނީ ފުލުހުންގެ މައްޗަށް ތުހުމަތުކޮށްފައެވެ.

Ad by Hajj Corporation

ފުލުހުންގެ މައްޗަށް މިތުހުމަތުކުރި އިދިކޮޅު އެމްޑީޕީގެ އެކްޓިވިސްޓެކެވެ.

މިކަމާއި ގުޅިގެން ފުލުހުން ނެރުނު ބަޔާނެއްގައި ވަނީ އެ ތުހުމަތު ދޮގުކޮށްފައެވެ. އަދި ހެކީގެ ގޮތުގައި ފުލުހުންގެ ބެލުމުގެ ދަށަށް ގެންދެވޭތަކެތި ބަލަހައްޓަނީ ބައިނަލްއަގްވާމީ މިންގަނޑަށްކަމުގެ ޔަގީންކަން އެެެއިދާރާއިން ވަނީ ދީފައެވެ.

''ދިވެހި ފުލުހުންގެ ޚިދުމަތުން ތަހުގީގުކުރާ މައްސަލަތަކާއި ގުޅިގެން ހޯދާ ޑިޖިޓަލް ވަސީލަތްތައް ބަލަހައްޓަނީ ބައިނަލްއަގުވާމީ މިންގަނޑުތަކާ އެއްގޮތަށް ހަދާފައި އޮންނަ ހަރުދަނާ އުސޫލުތައް ވަނީ ގާއިމުކުރެވިފައި، އެހެންކަމުން ދިވެހި ފުލުހުންގެ ބެލުމުގެ ދަށުގައިވާ އެއްވެސް މޮބައިލް ފޯނަކުން މައުލޫމާތެއް ލީކްވުމުގެ ފުރުސަތު ނޯންނާނެވާހަކަ ދަންނަވަން'' ފުލުހުން ބުނެފަވެއެވެ.

އެހެންކަމުން ހެކީގެ ގޮތުގައި ހިފެހެއްޓިފައިވާ ފޯނެއްގައި ހުރި ފޮޓޯއެއް ނުވަތަ ވީޑިއޯއެއް ލީކުވެފައިވާކަމަށް ކުރާ ތުހުމަތަކީ އެއްވެސް ހަގީގަތެއް އެކުލެވިގެންނުވާ ދޮގު ތުހުމަތުތަކެއްކަމަށް ވެސް ފުލުހުން ވަނީ ބުނެފައެވެ.

ފުލުހުން ބުނިގޮތުގައި އެ އިދާރާއިން ތަހުގީގުތައް ކުރިއަށް ގެންދަނީ ޕްރޮފެޝަނަލް ކަމާ އެކު ގާނޫނީ ހަމަތަކުގެ މަތިން ހެކީގެ ރައްކާތެރިކަން ކަށަވަރުކޮށްގެން ކަމަށެވެ. އަދި އެ އިދާރާގެ މަސައްކަތްތަކުގައި އިންސާނީ ހައްގުތަކަށް އިހުތިރާމްކުރުމާއި ޕްރޮފެޝަނަލް މިންގަނޑުތައް ހިފެހެއްޓުމަކީ އަބަދު ވެސް އިސްކަންދެވޭ ކަންކަންކަމަށް ވަނީ ބުނެފައެވެ.