ށ. ކޮމަންޑޫ ކައުންސިލާ އެއަތޮޅު ގައްލައިދޫ ހަވާލުކޮށްފިއެވެ.

ކުރިން ށ.އަތޮޅު ކައުންސިލްގެ ބެލުމުގެ ދަށުގައި އޮތް މި ފަޅުރަށް ކޮމަންޑޫ ކައުންސިލާއި ހަވާލުކޮށްފައި ވަނީ ރައީސް ރ.މުހައްމަދު މުޢިއްޒު މިހާރު ށ.އަތޮޅަށް ކުރަށްވަމުންގެންދަވާ ދަތުރުފުޅުގައި ކޮމަންޑޫ އަށް އަންގާރަ ދުވަހު ކުރެއްވި ޒިޔާރަތުގައެވެ.

ކޮމަންޑޫ ކައުންސިލާ އެއަތޮޅު ގައްލައިދޫ ހަވާލުކޮށްފައިވަނީ، ކައުންސިލްތަކުގެ މާލީ ގާބިލުކަން އިތުރުކުރުމުގެ މަޤްސަދުގައި ފަޅުރަށެއް ކައުންސިލާ ހަވާލުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ކަނޑައަޅުއްވާފައިވާ ސިޔާސަތުގެދަށުން، ކޮމަންޑޫ ކައުންސިލުން ހުށަހެޅުމުންނެވެ.

ކޮމަންޑޫ ކައުންސިލާ ގައްލައިދޫ ހަވާލުކުރެއްވީ، ސިޓީތަކާއި، އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރުއެވެ. ކޮަމަންޑޫ ކައުންސިލްގެ ފަރާތުން ހަވާލުވެލެއްވީ، ކޮމަންޑޫ ކައުންސިލުގެ ރައީސް މުޙައްމަދު ސިނާންއެވެ.

ލާމަރުކަޒީ ނިޒާމު ހަރުދަނާކޮށް، ކައުންސިލްތައް ބާރުވެރިކުރުވުމުގެ މަޤުޞަދުގައި އިޤުތިޞާދީ މަސައްކަތްތައްކުރުމަށް ކައުންސިލްތަކުގެ އިޚްތިޞާސުން ބޭރުން ފަޅުރަށް ދޫކުރުމަށް ރައީސުލްޖުމްހޫރިއްޔާ ނިންމަވާފައިވާ ނިންމެވުމުގެ ދަށުން އެކި ރަށްރަށުގެ ކައުންސިލްތަކަށް ފަޅުރަށްތައް އަންނަނީ ދޫކުރަމުންނެވެ.

Ad by Hajj Corporation