މިނިސްޓަރ އެޓް ދަ ޕްރެޒިޑެންޓްސް އޮފީސް، ޢަބްދުﷲ ނާޞިރުގެ މަންމާފުޅު ޝަރީފާ މުޙައްމަދު (މ.ދިލޭރާމްގެ/މާލެ)، އުމުރުފުޅުން 83 އަހަރުގައި އަވަހާރަވެއްޖެއެވެ.

ޝަރީފާ މުޙައްމަދު އަވަހާރަވުމުގެ ހިތާމައިގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ތަޢުޒިޔާ ފޮނުއްވާފައެވެ.

Ad by Hajj Corporation

މިނިސްޓަރު ޢަބުދުﷲ ނާޞިރުގެ މަންމާފުޅު އަވަހާރަވުމުގެ ޚަބަރު އެއްސެވީ ފުން ހިތާމައާއިއެކުގައި ކަމަށް ރައީސް ޑރ. މުޙައްމަދު މުޢިއްޒު ވަނީ މީސްމީޑިއާގައި ކުރެއްވި ޕޯސްޓެއްގައި ވިދާޅުވެފައެވެ. ރައީސް ވަނީ މި ހިތާމައިގައި މިނިސްޓަރާއި އާއިލާއަށް ތަޢުޒިޔާ ދަންނަވައި، މަރުޙޫމާގެ ފުރާނައަށް ސުވަރުގޭގެ ދާއިމީ ނިޢުމަތް ދެއްވުން އެދި ދުޢާކުރަށްވާފައެވެ. އަދި ޢާއިލާއަށް ކެތްތެރިކަން މިންވަރުކޮށްދެއްވުން އެދިވަޑައިގެންނެވިއެވެ.

ޝަރީފާ މުޙައްމަދު އަކީ މިނިސްޓަރު ޢަބްދުﷲ ނާޞިރުގެ އިތުރުން، ފަންޑް މެނޭޖްމަންޓް ކޯޕަރޭޝަންގެ މެނޭޖިންގ ޑިރެކްޓަރ އަހްމަދު ނާޒިމް (ހެރިންސް އައްމަޑޭ)ގެ ވެސް މަންމާފުޅެވެ. މި ދެބޭފުޅުންނަށް ލިބުނު މި ބޮޑު ހިތާމައިގައި ގިނަ ބަޔަކު ދަނީ ތަޢުޒިޔާ ފޮނުވަމުންނެވެ.

މަރުޙޫމާ ޝަރީފާ މުޙައްމަދުގެ މައްޗަށް ކުރެވޭ ކަށުނަމާދު ބާއްވަން ހަމަޖައްސާފައި ވަނީ މިއަދު މަޣްރިބް ނަމާދަށްފަހު އިސްލާމީ މަރުކަޒުގައެވެ. އަދި މޫނު ދެއްކުމުގެ ކަންކަން ވެސް ކުރިއަށް ދާނީ އިސްލާމީ މަރުކަޒުގައި ކަމަށް ވަނީ ހަމަޖެހިފައެވެ.