ޑޮލަރު ގަތުމުގެ ނަމުގައި ހީލަތުން ފައިސާ ހޯދަމުންދިޔަ މީހަކު ހައްޔަރުކޮށްފި
30 ނޮވެމްބަރު 2025 - 07:41

12:45 PM
މަކަރާއި ހީލަތުން އެކި މީހުންގެ އަތުން ފައިސާ ހޯދައި، އެފައިސާތައް ވިޔަފާރި އެކައުންޓްތަކަށް ޖަމާކުރުވައި، އެފައިސާތައް ނަގަމުންދިޔަ މީހަކު ފުލުހުން ހިންގި އޮޕަރޭޝަނެއްގައި ހައްޔަރުކޮށްފިއެވެ.

Ad by Hajj Corporation
މިމައްސަލައާ ގުޅިގެން ހައްޔަރުކޮށްފައިވަނީ ބ. ތުޅާދޫ / މަންޒަރުގެ، މުޙައްމަދު ޝާވިން (23އ) އެވެ.
މުޙައްމަދު ޝާވިން ހައްޔަރުކޮށްފައިވަނީ ޑޮލަރު މާރުކުރުމަށް ވައިބަރ ގްރޫޕަކުން ފެނުނު ފަރާތަކަށް 1250 ޑޮލަރު ޓްރާންފަރކުރުމަށްފަހު، އެޑޮލަރަށްވާ ރުފިޔާ ނުދިނުމުގެ މައްސަލައެއް ފުލުހުންނަށް ހުށަހެޅުމާ ގުޅިގެންނެވެ. މި މައްސަލަ ހުށަހެޅުނީ 2025 ނޮވެމްބަރު 27 ވަނަ ދުވަހުގެ ވަގުތެއްގައެވެ. އޭނާ ހައްޔަރުކުރީ އެންޓި ސްކޭމް ސެންޓަރގެ ރެޕިޑް ރެސްޕޯންސުން ހުޅުމާލެއިން ހިންގި އޮޕަރޭޝަނެއްގައި، ފައިސާއާ ހަވާލުވުމަށްފަހު ދަނިކޮށެވެ.
ފުލުހުންގެ ބަޔާނުގައިވާ ގޮތުން، މި މައްސަލާގައި މަކަރާއި ހީލަތުން ހޯދާފައިވާ 1250 ޑޮލަރު ވަނީ ރިވަރކޮށްފައެވެ. މީގެ އިތުރުން، މިފަދަ އިތުރު ދެ މައްސަލައެއްގައި ހިމެނޭ ފައިސާވެސް ވަނީ ރިކަވަރކޮށްފައެވެ. ހައްޔަރުކުރި މުޙައްމަދު ޝާވިންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ 10 ދުވަހުގެ މުއްދަތަށް ބަންދުކުރުމަށް އަމުރުކޮށްފައެވެ.
މަކަރާއި ހީލަތުން ފައިސާ ހޯދާ ގޮތް
މިމައްސަލައާ ގުޅިގެން މިހާތަނަށް ފުލުހުން ބެލިބެލުމުން ފާހަގަކުރެވިފައިވާ ގޮތުގައި، މަކަރާއި ހީލަތް ހިންގާ ފަރާތްތަކުން އަމަލުކުރަމުންދަނީ ސޯޝަލް މީޑީއާގެ އެކި މަންސަތަކުގައި އެކި ހިދުމަތްތައް ފޯރުކޮށްދޭކަމަށް ބުނެ، އެކަންކަމަށް ބޭނުންވާ ފަރާތްތަކުން ފައިސާ ފޮނުވުމަށް އެދެނީ އެކި ވިޔަފާރީގެ ނަމުގައި ހުންނަ އެކައުންޓްތަކަށެވެ. އެގޮތުން ޑޮލަރު މާރުކުރުމާއި ތަކެތި ވިއްކުމާއި އެހެން ބައެއް ޚިދުމަތްތައް ފޯރުކޮށްދޭނެކަމަށް ބުނެ، އެ ޚިދުމަތަށް ފައިސާ ވިޔަފާރި އެކައުންޓްތަކަށް ޖަމާކުރުވައެވެ. ފައިސާ ޖަމާވުމުން އެ ވިޔަފާރިތަކަށް ގުޅައިގެން ނަގުދު ފައިސާގެ ގޮތުގައި ނުވަތަ އެފައިސާއަށްވާ މުދަލުގެ ގޮތުގައި އެފައިސާ ނަގަމުންދާކަން ވަނީ ފާހަގަކުރެވިފައެވެ.
އާންމުންނާއި ވިޔަފާރިތަކަށް ފުލުހުންގެ އިލްތިމާސް
މިފަދަ މައްސަލަތަކުން ރައްކާތެރިވުމަށްޓަކައި، ފުލުހުން ވަނީ އާންމު ރައްޔިތުންނާއި ވިޔަފާރިކުރާ ފަރާތްތަކަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ. ޚިދުމަތަކަށް ފައިސާ ދެއްކުމުގެ ކުރިން، ފައިސާ ފޮނުވަން ބުނާ އެކައުންޓް ނަންބަރުގައިވާ ވިޔަފާރިއަކީ އެފަދަ ޚިދުމަތެއް ފޯރުކޮށްދޭ ބައެއްތޯ ބަލައި ޔަގީންކުރުމަށް ފުލުހުން އިރުޝާދު ދެއެވެ.
މީގެ އިތުރުން، ވިޔަފާރި އެކައުންޓަށް ޖަމާވާ ފައިސާ އަނބުރާ ހޯދުމަށް ގުޅާނަމަ، ފައިސާ ހަވާލުކުރުމުގެ ކުރިން އެފައިސާއަކީ ކޮންގޮތަކުން ޖަމާވި ފައިސާއެއްތޯ ޔަގީންކުރުމަށްވެސް ވަނީ އެދިފައެވެ. ސައްކުކުރެވޭ ކަމެއް ފެނިއްޖެނަމަ އަވަހަށް ފުލުހުންނަށް ރިޕޯޓްކުރުމަކީ މިފަދަ މައްސަލަތައް މަދުކުރުމަށް އެޅޭނެ އެންމެ މުހިންމު ފިޔަވަޅުތަކެވެ.


