މަސްތުވާތަކެއްޗާއެކު ހުޅުމާލެ ފޭސް 1 އިން މީހަކު ހައްޔަރުކޮށް، އެ މައްސަލަ ފުލުހުން ތަހުގީގުކުރަން ފަށައިފިއެވެ.

މި މީހާ ހައްޔަރުކޮށްފައިވަނީ ފުލުހުން ފެނުމުން ފިލަން މަސައްކަތްކުރުމުގެ ތުހުމަތުގައި ހުއްޓުވައި ބަލައިފާސްކުރުމުގެ ތެރެއިންނެވެ.

Ad by Hajj Corporation

މި މައްސަލައާ ގުޅިގެން ހައްޔަރުކޮށްފައި ވަނީ، މާލެ / ހުޅުމާލެ ފްލެޓް، 03-2-161، މުޙައްމަދު ޝައިޙާން (23އ) އެވެ. އޭނާ ހައްޔަރުކޮށްފައިވަނީ މިމަހުގެ 29 ވަނަ ދުވަހުއެވެ.

ހުޅުމާލެ ޕެޓްރޯލްކުރަމުން ދިޔަ ފުލުހުންނަށް އޭނާ ފެނުމުން، އޭނާ ދުއްވަން އިން ސައިކަލުގެ ސްޕީޑް ބާރުކޮށް ފުލުހުންނަށް ފިލަން މަސައްކަތްކުރާކަން ފާހަގަކުރި، އޭނާގެ އަމަލުތައް ހުރިގޮތުން ތުހުމަތުކުރެވިގެން، ފުލުހުން ވަނީ އޭނާ ހުއްޓުވައި ބަލައިފާސްކޮށްފައެވެ.

ބަލައިފާސްކުރިއިރު، މަސްތުވާތަކެތިކަމަށް ޝައްކުކުރެވޭ އެއްޗެއްހުރި ފިލްމު ހުސްކުރި ދަޅެއް އޭނާގެ އަތުން ފެނިފައިވެއެވެ. މިއާއެކު އޭނާ ވަނީ ހައްޔަރުކޮށްފައެވެ.

މިމައްސަލާގައި ހައްޔަރުކޮށްފައިވާ މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ 5 ދުވަހަށް ބަންދުގައި ބެހެއްޓުމަށް އަމުރުކޮށްފައެވެ.

ފުލުހުން މިހާރު ދަނީ މި މައްސަލަ އިތުރަށް ތަހުގީގުކުރަމުންނެވެ.