ރާއްޖެއާއެކު އޮންނާނީ ވަރަށް ގާތް ގުޅުމެއް - މޯދީ
ރައީސް މުޢިއްޒު އަދި އިންޑިޔާގެ ބޮޑު ވަޒީރު ނަރެންދުރަ މޯދީ -- ފޮޓޯ/ ޕީއެސްއެމް

07 އޮކްޓޯބަރު 2024 - 08:57
ރާއްޖެއާއެކު އަބަދުވެސް އޮންނާނީ ވަރަށް ގާތް ގުޅުމެއް ކަމަށާއި، ރާއްޖޭގެ ރައްޔިތުން އެދޭ ކަންކަން ޙާޞިލް ކުރުމުގައި އެހީތެރިވުމަށް އިންޑިޔާ އަބަދުވެސް ދެމި އޮންނާނެ ކަމަށް އެގައުމުގެ ބޮޑުވަޒީރު ނަރެންދުރަ މޯދީ މިއަދު ވިދާޅުވެއްޖެ އެވެ.
އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ރައީސް ޑރ މުހައްމަދު މުއިއްޒު ކުރައްވަމުން ގެންދަވާ ރަސްމީ ދަތުރުފުޅުގައި މިއަދު ބޮޑުވަޒީރު މޯދީއާ ދެ ބޭފުޅުން ވަނީ ވެރިރަށް ދިއްލީގައި ހުންނަ ހައިދްރައާބަދު ހައުސްގައި ޖޮއިންޓް ޕްރެސްކޮންފަރެންސް އެއް ބާއްވާފަ އެވެ.
ބޮޑުވަޒީރު މޯދީ ވިދާޅުވީ ރާއްޖެއާއި އިންޑިއާ ދެމެދު އޮންނަނީ ވަރަށް ޒަމާންވި ގާތް ގުޅުމެއް ކަމަށެވެ. އިންޑިއާގެ ބޮޑުވަޒީރުކަމުގެ 3 ވަނަ ދައުރު ފުރުއްވަމުން ގެންދަވާ މޯދީ ސިފަކުރެއްވީ ރާއްޖެ އާއި އިންޑިއާ އަކީ "މިތުރުން" ގޮތުގަ އެވެ. އިންޑިއާ އަކީ ރާއްޖެއާ އެންމެ ގާތް އެއް ގައުމުކަން ފާހަގަކުރައްވާ މޯދީ ވިދާޅުވީ އިންޑިއާ ނެއިބާ ހޫޑް ޕޮލިސީއާ އާއި އިންޑިއާގެ ކަނޑުގައި ހިމެނޭ ގައުމުތަކަށް ހާއްސަކުރާ "ސާގްރް ވިޝަން" ގައި ރާއްޖެއިން އަދާކުރަނީ މުހިއްމު ރޯލެއް ކަމަށެވެ.
ރާއްޖެއަށް އެހީ ބޭނުންވާ ކޮންމެ އިރެއްގައި އެންމެ ފުރަތަމަ އެހީވާ ގައުމަކީ އިންޑިއާކަން މޯދީ ފާހަގަކުރެއްވި އެވެ. ޒަރުރީތަކެތި ފޯރުކޮށް ދިނުމާއި، ކާރިސާތަކުގައި އިންޑިއާއިން ފޯރުކޮށްދީފައިވާ އެހީތެރިކަން މޯދީ ފާހަގަކުރެއްވި އެވެ. ކޮވިޑް-19 ގެ ވެކްސިން އިންޑިއާއިން ފޯރުކޮށްދިންކަންވެސް މޯދީގެ ވާހަކަފުޅުގައި ފާހަގަކުރެއްވި އެވެ.
އިންޑިޔާގެ ބޮޑު ވަޒީރު ނަރެންދުރަ މޯދީ، ރާއްޖެއަށް ވަޑައިގެންނެވުމަށް ރައީސް ޑރ. މުޙައްމަދު މުއިއްޒު ވަނީ ދަޢުވަތު ދެއްވާފައެވެ.
އެ ދައުވަތު ދެއްވިކަން ރައީސް އިއުލާނުކުރެއްވީ، އިންޑިޔާއަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ދެ ބޭފުޅުން އެކުގައި ބޭއްވެވި ނޫސްވެރިންގެ ބައްދަލުވުމުގައެވެ.
އެގޮތުން ރައީސް ވިދާޅުވީ، ބޮޑު ވަޒީރު މޯދީއަށް ދައުވަތު ދެެއްވީ، ރާއްޖެ އާއި އިންޑިޔާގެ ގާތް ގުޅުމަށް 60 އަހަރު ފުރޭ މުނާސަބަތު ފާހަގަކުރުމަށެވެ.
ރައީސް އިންޑިޔާއަށް ކުރައްވާ ފުރަތަމަ ފުރަމާނަ ދަތުރުފުޅުގައި، ބޮޑު ވަޒީރު މޯދީއާ ބައްދަލުކުރެއްވީ މިއަދުގެ ހެނދުނުގެ ވަގުތެއްގައެވެ. އެގޮތުން އެ ދައުވަތު ރައީސް، މޯދީއަށް ދެއްވީ ވެސް އެ ބައްދަލުވުމުގައެވެ.
އެ ދައުވަތު ގަބޫލުކުރައްވައި މޯދީ ރާއްޖެ ވަޑައިގަންނަވައިފި ނަމަ، އެކަން ވާނީ ބޮޑު ވަޒީރު ކަމުގައި ހުންނަވައިގެން މޯދީ ރާއްޖެއަށް ކުރައްވާ ތިން ވަނަ ދަތުރުފުޅަށެވެ. އެގޮތުން މޯދީ ވަނީ ކުރީގެ ރައީސް އިބްރާހިމް މުޙައްމަދު ސޯލިޙް ހުވާކުރެއްވުމުގެ ދަރުބާރަށާއި، އޭގެ ފަހުން 2022 ވަނަ އަހަރު ފުރަމާނަ ދަތުރުފުޅެއްގައި މާލެ ވަޑައިގަންނަވައިފައެވެ.
އިތުރު ލިޔުންތައް

ރައީސް މުއިއްޒުގެ މަރުހަބާ ލަންކާގެ އިންތިހާބީ ރައީސްއަށް!
6 މަސް ކުރިން
އެމެރިކާގައި ދިރިއުޅޭ ދިވެހިންނާ ރައީސް ބައްދަލު ކުރައްވައިފި
6 މަސް ކުރިން
ރާއްޖެއަށް ލިބޭ ހައްޖު ކޯޓާ އިތުރުކުރުމަށް މަޝްވަރާކޮށްފި
6 މަސް ކުރިން