ހުސްވި ހަފުތާގައި ހޮރްމޫޒް ކަނޑުއޮޅިން ދަތުރުކުރަނިކޮށް ހަމަލާގެ ޝިކާރައަކަށްވި ތައިލެންޑުގެ މުދާ އުފުލާ ބޯޓުގެ 20 ފަޅުވެރިން ރައްކާތެރިކަމާއެކު އަނބުރާ ގައުމަށް ގޮސްފިއެވެ.

ތައިލެންޑުގެ ފޮރިން މިނިސްޓްރީން ހާމަކުރި ގޮތުގައި، މި ފަޅުވެރިން ބެންކޮކްގެ މައި އެއާޕޯޓަށް ގޮސްފައިވަނީ އެ ގައުމުގެ ގަޑިން ހޯމަ ދުވަހުގެ ހެނދުނު 8:00 ހާއިރުއެވެ.

Ad by Hajj Corporation

އީރާނުގެ ސެމީ-އޮފިޝަލް "ފާރްސް ނިއުސް އެޖެންސީ" އިން ރިޕޯޓްކޮށްފައިވާ ގޮތުގައި، އީރާނުގެ އިސްލާމިކް ރިވަލޫޝަނަރީ ގާޑް ކޯޕްސް (އައި.އާރު.ޖީ.ސީ) އިން ނެރުނު ބަޔާނެއްގައި ބުނެފައިވަނީ "މަޔޫރީ ނާރީ" ނަމަކަށް ކިޔާ މި ބޯޓަށް ހުސްވި ބުދަ ދުވަހު ހަމަލާދިނީ، ދިން އިންޒާރުތަކަށް ބޯނުލަނބައި ގަވާއިދާ ހިލާފަށް ހޮރްމޫޒް ކަނޑުއޮޅިން ވަންނަން ތަކުރާރުކޮށް މަސައްކަތް ކުރުމާ ގުޅިގެން ކަމަށެވެ.

މީގެ އިތުރުން، ލައިބީރިއާގެ ދިދަ ޖަހާފައިވާ "އެކްސްޕްރެސް ރޯމް" ނަމަކަށް ކިޔާ އުޅަނދަކަށް ވެސް އެ ދުވަހު ހެނދުނު އީރާނުގެ އަސްކަރީ ހަމަލާތަކެއް އަމާޒުވެފައިވާ ކަމަށް އީރާނުގެ އަސްކަރިއްޔާއާ ހަވާލާދީ ފާރްސް ނިއުސް އިން ރިޕޯޓްކޮށްފައިވެއެވެ. މި އުޅަނދަށް ވެސް ހަމަލާދީފައިވަނީ އައި.އާރު.ޖީ.ސީ ނޭވީން ދިން އިންޒާރުތަކަށް އަމަލުނުކުރުމުން ކަމަށް ބަޔާނުގައި ބުނެފައިވެއެވެ.

މި ހާދިސާތަކާ ގުޅިގެން ހޮރްމޫޒް ކަނޑުއޮޅީގެ ސަލާމަތީ ކަންކަމާ މެދު ކަންބޮޑުވުން އުފެދިފައިވާއިރު، ތައިލެންޑުގެ ސަރުކާރުން ވަނީ އެ ގައުމުގެ ރައްޔިތުން ރައްކާތެރިކަމާއެކު އެނބުރި އައުމަކީ ލިބުނު ބޮޑު ހިތްހަމަޖެހުމެއްގެ ގޮތުގައި ފާހަގަކޮށްފައެވެ.