މަސްދޯނިފަހަރުގައި ލޮނުފެނުން މަސް ފިނިކުރާ ނިޒާމު (އާރްއެސްޑަބްލިޔު) ނިޒާމު ގާއިމްކުމުގެ މަޝްރޫއާ ގުޅޭ ގޮތުން މަސްވެރިންނާއި ކައުންސިލްތަކަށް މައުލޫމާތު ދިނުމަށާއި އެ ފެސިލިޓީއަށް ހުށަހެޅުމަށް ބޭނުންވާ އޮޑިވެރިންނަށް އެހީތެރިކަން ފޯރުކޮށްދިނުމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އާއި މަސްވެރިކަމާއި ކަނޑުގެ ވަސީލަތްތަކާ ބެހޭ މިނިސްޓްރީގެ ޓީމްތައް ރާއްޖޭގެ އެކި އަތޮޅުތަކަށް ފުރައިފިއެވެ.

އެސްޑީއެފްސީއާއި މަސްވެރި ވުޒާރާގެ ޓީމްތައް މި ހަފްތާގައި ހަރަކާތްތެރިވާނީ ތ. ހިރިލަންދޫ، ވޭމަންޑޫ، ޅ. ނައިފަރު, ށ. ކޮމަންޑޫ އަދި ހއ. އިހަވަންދޫގައެވެ.

ރާއްޖޭގެ އެންމެ ދެކުނުގެ ހަތަރު އަތޮޅުގައި މަސްވެރިކަންކުރާ 100 ވަރަކަށް ދޯނި ހަރަކާތްތެރިވާއިރު އޭގެ ތެރެއިން 70 ދޯނީގައި ވަނީ އާރްއެސްޑަބްލިޔު ސިސްޓަމް ހަރުކޮށްފައެވެ. އެ ސިސްޓަމް ހަރުނުކުރަނީ 30 ވަރަކަށް ދޯނީގައެވެ.

އެ ހަތަރު އަތޮޅުގައި ދުވާލަކަށް 450 ޓަނުގެ އައިސް އުފެއްދޭ 12 ޕްލާންޓެއް ހުރިނަމަވެސް މަސްވެރިކަން ރަނގަޅު ދުވަސްވަރެއްގައި ދޯނިތަކަށް އެކަށީގެންވާ އައިސް ފޯރުކޮށެއް ނުދެވެއެވެ.

ހުވަދޫގައި މަސްވެރިކަމުގައި ހަރަކާތްތެރިވާ 160 ދޯނި އޮތްއިރު، ހުވަދޫއަށްވެސް މަސްވެރިކަަން ރަނގަޅު ދުވަސްވަރެއްގައި އައިހުގެ ދަތިކަން ކުރިމަތިވެއެވެ.

މަސް ބޭނުމަށް ފަހު މަހުގެ ޓެމްޕަރޭޗާ ދަށްކުރުމަކީ ވަރަށް މުހިންމު ކަމެކެވެ. އެކަން ކުރެވޭނީ މަސް ފިނިކޮށްގެނެވެ.

މަސް މަރުވުމަށް ފަހު މަހުގައި "ހިސްޓަމިން" ކިޔާ މާއްދާއެއް އިތުރުވެއެވެ. އެއީ ވަކި ވަރަކަށްވުރެ މަތިވެއްޖެނަމަ އެ މަސް ބޭނުންކުރުމުން ހަށިގަނޑަށް ގެއްލުންވާ ކަމެކެވެ. ބައެއް ފަހަރު މަހުގެ ބާވަތްތައް ކަމުގައިވާ ހިކިމަސް ނުވަތަ ރިހާކުރު ބޭނުންކުރާއިރު އަނގަ ކަހާ ގޮތްވަނީ މަހުގައި "ހިސްޓަމް" އިތުރުވުމުންނެވެ. އެހެންކަމުން މަހުގެ ތާޒާކަން ދެމެހެއްޓުމަށް އާރްއެސްޑަބްލިޔު ސިސްޓަމް ދޯނީގައި ހަރުކުރުމަކީ މުހިންމު ކަމެކެވެ. އަދި އެކަމުގެ ސަބަބުން އައިސް ހޯދަން ދުއްވާ ދުއްވުން މަދުވެ ފަސޭހައިން އައިސް ލިބި، މަހުގެ ތާޒާކަން ދެމެހެއްޓޭނެއެވެ.

ލޮނުފެނުން މަސް ފިނިކުރާ ނިޒާމު (އާރު.އެސް.ޑަބްލިޔު ސިސްޓަމް)

• - ޖެނެރޭޓަރ ސެޓް
• ސޯލާރ ޕީވީ ސިސްޓަމް

މަސްވެރި ވުޒާރާއާއި އެސްޑީއެފްސީ ގުޅިގެން ދޫކުރާ މި ލޯނަކީ އިސްލާމީ ޝަރީޢާގެ ހަމަތަކާ އެއްގޮތަށް ދޫކުރެވޭ ލޯނެކެވެ.  އެގޮތުން، ފައިނޭންސިންގ ހަމަޖެހިފައިވަނީ އެސްޑީއެފްސީ އިން "އާރްއެސްޑަބްލިޔު ފައިނޭންސިންގ" ނަމުގައި ހުޅުވާފައިވާ އިސްލާމިކް ފައިނޭންސިންގ ސްކީމް މެދުވެރިކޮށެވެ.

މި ލޯނަށް އެދި ހުށަހަޅާނީ، އެސްޑީއެފްސީގެ ޕޯޓަލް (https://portal.sdfc.mv) މެދުވެރިކޮށެވެ. އެޕްލިކޭޝަންތައް ލިބޭ މިންވަރަކުން ޝަރުތުހަމަވާ ފަރާތްތަކުގެ އެޕްލިކޭޝަންތައް ޕްރޮސެސްކުރުމުގެ މަސައްކަތް ކުރިއަށް ގެންދެވޭނެއެވެ. އެޕްލިކޭޝަން ބަލައިގަތުމުގެ ސުންގަޑިއަކީ ނޮވެމްބަރުމަހުގެ 30 ވަނަ ދުވަހެވެ.

މަޝްރޫއާ ގުޅޭ އިތުރު މަޢުލޫމާތު މަސްވެރި ވުޒާރާގެ ނަންބަރު 30333434   އަދި އެސްޑީއެފްސީގެ ނަންބަރު 1613 އާއި ގުޅުއްވުމުން ލިބިވަޑައިގަންނަވާނެއެވެ.

މިއީ ރަހުނަކާ ނުލައި ހަ މަސް ދުވަހުގެ ގްރޭސްޕީރިއަޑާއެކު، ދެ މިލިއަން ރުފިޔާއާ ހަމައަށް ދޫކުރާ ލޯނެކެވެ.