މޫސުމަށް އަންނަ ބަދަލުތަކާ ގުޅިގެން ހަރުދަނާ ޑޭޓާއެއް ވަރަށް މުހިންމުކަމަށާއި، މިއީ ޕެރިސް އެގްރީމެންޓުގެ އެންހޭންސްޑް ޓްރާންސްޕޭރެންސީ ފްރޭމްވޯކާ އެއްގޮތްވާގޮތުގެ މަތިން ދެފުށް ފެންނަ އަދި ޒިންމާދާރު ރިޕޯޓިންގ ފްރޭމްވޯކެއް ބިނާކުރުމަށް އެޅޭނެ އެންމެ މުހިންމު ފިޔަވަޅުކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ. ވަޒީރު މިފަދައިން ވިދާޅުވީ، ނެޝެނަލް ގްރީން ހައުސް ގޭސް އިންވެންޓްރީ ތައްޔާރުކުރުމަށްޓަކައި ބޭނުންވާ މައުލޫމާތު އެއްކުރުމުގެ ނިޒާމު ހަރުދަނާ ކުރުމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއާއި ޔުޓިލިޓީ ރެގިއުލޭޓަރީ އޮތޯރިޓީއާއި މޯލްޑިވްސް ބިއުރޯ އޮފް ސްޓެޓިސްޓިކްސްއާ ދެމެދު އެއްބަސްވުމެއްގައި ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.މި އެއްބަސްވުމުގައި މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއާއި ޔުޓިލިޓީ ރެގިއުލޭޓަރީ އޮތޯރިޓީގެ ފަރާތުން ސޮއިކުރެއްވީ މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމެވެ.

އަދި މޯލްޑިވްސް ބިއުރޯ އޮފް ސްޓެޓިސްޓިކްސްގެ ފަރާތުން ސޮއިކުރެއްވީ ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދެވެ.

މި އެއްބަސްވުމުގެ މަޤްޞަދަކީ، އދ.ގެ ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ޔޫ.އެން.އެފް.ސީ.ސީ.ސީ) އާއި ޕެރިސް އެގްރީމަންޓްގެ ދަށުން ކްލައިމެޓް ޓްރާންސްޕޭރެންސީގެ ޝަރުޠުތައް ފުރިހަމަކުރުމަށް ރާއްޖެއިން ކުރަމުންދާ މަސައްކަތްތަކަށް އެއްބާރުލުން ދީ، ރާއްޖޭގައި ހަކަތައިގެ ޑޭޓާ އެއްކުރުމުގެ ސައްހަކަން އިތުރުކުރުމެވެ