ކުރީގެ ރައީސް އަބްދުﷲ ޔާމީން އަބްދުލްޤައްޔޫމުގެ ވެރިކަމުގެ ފަސް އަހަރުގެ ތެރޭގައި، އެންމެ ފަހަރަކު ވެސް އދ. ގެ އާންމު މަޖިލީހުގައި ބައިވެރިވެވަޑައިގަތުމަށް އެމަނިކުފާނު ވަޑައިގަންނަވައިފައިނުވާކަން، މޫސުމަށް އަންނަ ބަދަލުތަކާއި، ތިމާވެއްޓާ ބެހޭ ވަޒީރު ތޯރިގް އިބްރާހިމް ހަނދާން އައުކޮށްދެއްވައިފިއެވެ.

ވަޒީރު ތޯރިގް އެފަދައިން ވިދާޅުވީ، އދ. އަށް ރައީސް ޑރ. މުޙައްމަދު މުޢިއްޒު ކުރެއްވި ދަތުރުފުޅުގައި އާންމު މަޖިލީހުގައި އެމަނިކުފާނު ދެއްވި ތަގުރީރަށް، ޔާމީން ފާޑު ވިދާޅުވުމުން އެކަމަށް ރައްދު ދެއްވައި "އެކްސް"ގައި ކުރެއްވި ޕޯސްޓެއްގައެވެ.

އެގޮތުން ޕީއެންއެފްގެ ޖަލްސާގައި ޔާމީން ވިދާޅުވި ވާހަކައަށް ރައްދު ދެއްވައި ވަޒީރު ވިދާޅުވީ، ރައީސް ޔާމީންގެ ފަސް އަހަރުގެ ޒަައާމަތުގައި އެންމެ ފަހަރަކު ވެސް އދ.ގެ އާންމު މަޖިލީހުގައި ބައިވެރިވެވަޑައިގަތުމަށް ވަޑައިނުގަންނަވާ ކަމަށާއި، ޔާމީން އަކީ ދޭދޭ ގައުމުތަކުގެ ގުޅުމާއި، ޑިޕްލޮމެސީއަށް ވިސްނަވާ ބޭފުޅެއް ނޫން ކަމަށެވެ.

އޭގެ ހެއްކެއްގެ ގޮތުގައި ފާހަގަ ކުރައްވަމުން ވަޒީރު ވިދާޅުވީ، 2015 ވަނަ އަހަރު، ދެމެހެއްޓެނިވި ތަރައްގީގެ ލަނޑުދަނޑިތައް ޙާސިލްކުރުމަށާއި، ޕެރިސް އެގްރިމެންޓްގެ މަޝްވަރާއަށް ދުނިޔޭގެ ހުރިހާ ވެރިން އެއްތަންވިއިރު ވެސް، ރައީސް ޔާމީން އެ މަޝްވަރާތަކުގައި ބައިވެރިވެވަޑައިގަންނަވައިފައި ނުވާ ކަމަށެވެ.

މުޅި ފަސް އަހަރުގެ ޒަޢާމަތުގައި ވެސް ރައީސް ޔާމީން އުޅުއްވީ ބައިނަލްއަގުވާމީ މައިދާނަށް ފިއްލަވައިގެން. ތަކުރާރުކޮށް އެފަދައިން ޢަމަލުކުރެއްވި، - މޫސުމަށް އަންނަ ބަދަލުތަކާއި، ތިމާވެއްޓާ ބެހޭ ވަޒީރު ތޯރިގް އިބްރާހިމް

ޔާމީންގެ ވެރިކަމުގައި ވެސް ތިމާވެއްޓާ ބެހޭ ވަޒީރުގެ ގޮތުގައު ހުންނެވި ތޯރިގް ވިދާޅުވީ، ލީޑަރުންނަކީ ގައުމުގެ ރައްޔިތުންގެ ޙައްގުގައި ގައުމު ކުރިއެރުވުމަށް ބައިނަލްއަގުވާމީ މައިދާނުގައި އެ ގައުމެއް ތަމްސީލުކުރަންޖެހޭ ފަރާތްތަަކަށް ވާއިރު، އެ ޒިންމާތަކުން ރެކި، ބައިނަލްއަގުވާމީ މައިދާނާ ދުރުވުމަކީ ކޮށްގެންވާނެ ކަމެއް ނޫން ކަމަށެވެ. އެހެން ނަމަވެސް، ރައީސް ޔާމީން ޢަމަލުކުރެއްވީ އެފަދައިން ކަމުގައި ތޯރިގް ވިދާޅުވިއެވެ.

ރައީސް ޔާމީން އަދި އޭރުގެ ތިމާވެއްޓާ ބެހޭ ވަޒީރު ތޯރިގް އިބްރާހިމް

ވަޒީރު ވިދާޅުވި ގޮތުގައި، ޔާމިންގެ ވެރިކަމުގައި ރާއްޖެއާ ބައިނަލްއަގުވާމީ މައިދާނާ އޮންނަ ގުޅުން ކުޑަކޮށް، ބައިނަލްއަގުވާމީ މައިދާނުން ރާއްޖެ އެކަހެރިކުރިއެވެ.

އެއާއެކު ވަޒީރު ވިދާޅުވީ، ރައީސް ޑރ. މުޙައްމަދު މުޢިއްޒު އަކީ ރައްޔިތުންގެ އިޙްސާސްތައް ދަންނަ، ރައްޔިތުންގެ ޙައްގުގައި މަސައްކަތް ކުރައްވާ ރައީސެއް ކަމަށެވެ. އަދި އެމަނިކުފާނުގެ އަރިހުގައި މަސައްކަތް ކުރެއްވުމަކީ ވަޒީރަށް ލިބިވަޑައިގަންނަވާ ފަޚުރަކަށް ވަނީ އެހެންވެ ކަމުގައި ވަޒީރު ވިދާޅުވިއެވެ.

އދ.ގެ ސަލާމަތީ މަޖިލީހުގައި ރައީސް ތަގުރީރު ދެއްވއިރު، އަރިހުގައި ވަޒީރު ތޯރިގު އިބްރާހިމް އަދި ރާއްޖޭގެ ވަފުދު -- ފޮޓޯ/ ރައީސް އޮފީސް

އެގޮތުން އދ.ގެ ސަލާމަތީ މަޖިލީހުގައި ރާއްޖޭގެ ރައީސަކު ފުރަތަމަ ފަހަރަށް ތަގުރީރު ކުރެއްވިކަން ފާހަަގަ ކުރައްވަމުން ތޯރިގު ވިދާޅުވީ، ރައީސް މުޢިއްޒު ތާރީޚުގެ ތެރެއަށް ވަދެވަޑައިގަންނަވައިފައިވާ ކަމަށެވެ. އަދި އެކަމުން ދައްކުވައިދެނީ، ރާއްޖެއަކީ ދުނިޔެއަށް ލޯ ހުޅުވާލެވިފައިވާ ބައެއް ކަން ކަމުގައި ވަޒީރު ވިދާޅުވިއެވެ.