ހެދުން އަޅާ ގޮތެއްގެ ސަބަބުން ވަޒީފާ ދިނުމުގައި އަދި އަދާކުރުމުގައި ތަފާތުކުރުންތައް ގެނެސްދޭ ގަވާއިދުތައް އުވާލެއްވުމަށް ރައީސް ޑރ. މުޙައްމަދު މުޢިއްޒު ނިންމަވައިފިއެވެ.

ރައީސް އެފަދައިން ވިދާޅުވީ ދ. ހުޅުދެލީގެ މެޖިސްޓްރޭޓް ކޯޓަށް ވަޒީފާއަށް ކުރިމަތިލި އަންހެނަކު މޫނު ބުރުގާ އަޅާތީ ވަޒީފާއަށް ޝަރުތު ހަމަނުވާކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖީއޭ) އިން ފޮނުވި އީމެއިލްގެ މައްސަލައެއް މީސް މީޑިޔާގައި ފެންމަތިވެފައިވާ ދަނޑިވަޅެއްގައެވެ.

Ad by Hajj Corporation

އެގޮތުން ރައީސް "އެކްސް"ގައި ކުރެއްވި ޕޯސްޓެއްގައި ވިދާޅުވީ، އިސްލާމް ދީނާ ޚިލާފް ނުވާ ގޮތަށް ހެދުން އަޅާނަމަ، އެމީހަކު އަޅާފައި ހުންނަ ހެދުމެއްގެ ސަބަބުން ވަޒީފާދިނުމުގައި އަދި ވަޒީފާ އަދާކުރުމުގައި އެއްވެސް ތަފާތެއް ކޮށްގެންނުވާނެ ކަމަށެވެ. އަދި އެފަދަ ތަފާތުކުރުންތައް ގެނުވާ ގޮތަށް ކުރީގައި ހެދިފައިވާ އަދި ޢަމަލުކުރަމުންދާ ހުރިހާ ގަވާއިދުތަކާއި އުސޫލުތައް ބަދަލުކުރުމަކީ ކުރަން ޖެހޭ ކަމެއް ކަމުގައި އެ ޕޯސްޓުގައި އެމަނިކުފާނު ވިދާޅުވިއެވެ.

އެކަން ކުރުމަށް ކަމާބެހޭ ފަރާތްތަކަށް ވާނީ މިހާރު އަންގާފައި. އަޅުގަނޑުމެންގެ މި މުޖުތަމަޢު އަކީ ހުރިހާ މާނައެއްގައި ޢަދުލުވެރިކަމާއި އިންސާފުވެރިކަން އިސްކުރާ މުޖުތަމަޢަކަށް ހަދަން އެންމެން ޢަޒުމް ކަނޑައަޅަމާތޯ، - ރައީސް ޑރ. މުޙައްމަދު މުޢިއްޒު

ރައީސް އެފަދައިން ވިދާޅުވިއިރު، ދ. ހުޅުދެލީގެ މެޖިސްޓްރޭޓް ކޯޓުގެ އެޑްމިން އޮފިސަރެއްގެ މަގާމަށް ވަޒީފާއަށް ކުރިމަތިލި އަންހެން މީހާގެ ޝަރުތު ހަމަނުވާކަމަށް ބުނެ ޑީޖޭއޭ އިން ކުރި އީމެއިލްގައި ބުނެފައިވަނީ، ޝަރުއީ ދާއިރާގެ މުވައްޒަފުންގެ ގަވާއިދު 2011 ގެ 129 ވަނަ މާއްދާގައި މުވައްޒަފުން މަސައްކަތު ގަޑީގައި ހެދުން އަޅާފައި ހުންނަންވާނީ ކާކުކަން ރަނގަޅަށް އެނގޭ ފަދަ ގޮތެއްގައި ކަމަށް ބަޔާންކޮށްފައިވާ ކަމަށެވެ.

އަދި އެ ޙާލަތުގައި އެ މީހާ މޫނު ބުރުގާ އަޅާ ނަމަ، ރެކްރޫޓްމަންޓް ޕްރޮސެސް ކުރިއަށް ގެންދަން ނުފެންނަ ކަމުގައި ވެސް އެ އީމެއިލްގައި ބުންޏެވެ.