ރާއްޖޭގައި މެރިކަލްޗަރ ސިނާޢަތް ތަރައްޤީކުރަން 4 ސަރަޙައްދެއް ސަރުކާރުން ކަނޑައަޅުއްވައިފިއެވެމިކަން ހާމަކުރެއްވީ ބޭސިކް މެރިކަލްޗަރ ކޯހުގެ ދެވަނަ ބެޗް ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން މަސްވެރިކަމާ ކަނޑުގެ ވަޞީލަތްތަކާ ބެހޭ ވަޒީރު، އަޙްމަދު ޝިޔާމް. ވަޒީރު ވިދާޅުވީ މިހާރު ކުރަމުންދަނީ އެސަރަހައްދުތަކުގައި މެރިކަލްޗަރގެ މަސައްކަތް ކުރަން ބޭނުންވާ ގަވާއިދުތައް އެކުލަވާލުމުގެ މަސައްކަތްކަމަށެވެ.

ވަޒީރު އަޙްމަދު ޝިޔާމް ވިދާޅުވީ، މެރިކަލްޗަރ ސިނާޢަތް ވަކި ސިނާޢަތެއްގެ ގޮތުގައި ތަރައްޤީކުރެވޭނެކަމުގެ ޔަގީންކަން އެބައޮތްކަމަށެވެ. އެގޮތުން ރާއްޖޭގައި މެރިކަލްޗަރ ތަރައްޤީކުރުމަށް 4 ސަރަޙައްދެއް ވަޒީރުންގެ މަޖިލީހުން ކަނޑައަޅުއްވާފައިވާކަމަށެވެ.އެ 4 ސަރަހައްދަކީ ބޮޑު ތިލަދުންމައްޗާއި، ރ.އަތޮޅާއި މ.އަތޮޅުގެ އިތުރުން ތ. އަތޮޅެވެ. މީގެއިތުރުން މަނިޔަފުއްޓާއި ގާތްގަނޑަކަށް 2 ކިލޯމީޓަރު ދުރުގައި އޮތް ފަޅެއްވެސް މިކަމަށްވަނީ ކަނޑައަޅާފައެވެ. މިކަމަށް ހުޅުވާލުމަށް ތައްޔާރުވަމުންދާއިރު މިހާރު ކުރިއަށްދަނީ މިކަމަށް ބޭނުންވާ އުސޫލުތަކާއި ގަވާއިދުތައް އެކުލަވާލުމުގެ މަސައްކަތެވެ.

ވަޒީރު ވިދާޅުވީ މިއީ ރާއްޖޭގައި ކުރެވޭނެ ކަމެއްކަން އިންވެސްޓަރުންނަށާއި ދިވެހިންގެ ތެރެއިން މިކަން ކުރަން ޝައުގުވެރިވާ ފަރާތްތަކަށް ދައްކަން ޖެހޭނެކަމަށެވެ.މިމަސައްކަތްކުރާ އެހެން ޤައުމުތަކާ ބަލާއިރު މިކަން ކުރުމަށް ބޮޑެތި ލުއިތަކެއް ދިނުމަށް ސަރުކާރުންވަނީ ނިންމަވާފަ. އެގޮތުން މިމަސައްކަތް ކުރުމަށް ރަސްމީކޮށް ކަނޑައަޅާފައިވާ 4 ސަރަޙައްދުން ނަގާ ބިމަށް ލޭންޑް އެކުއިޒިޝަނަށް ފައިސާ ނުނަގާގޮތަށާއި، ފުރަތަމަ 3 އަހަރުގެ ބިމު ކުލި ނުނެގުމަށްވަނީ ނިންމަވާފައެވެ. މީގެ އިތުރުން މިމަސައްކަތަށް ބޭނުންވާ ވަޞީލަތް ރާއްޖެ އެތެރެކުރުމަށް ޑިއުޓީ މާފުކުރުމަށްވެސް ސަރުކާރުންވަނީ ހަމަޖައްސަވާފައެވެ.

ވޯލްޑް ބޭންކްގެ މާލީ އެހީތެރިކަމާއެކު، މޯލްޑިވްސް މެރިން ރިސަރޗް ސެންޓަރުން ކުރިއަށްގެންދިޔަ ބޭސިކް މެރިކަލްޗަރ ކޯހުގެ ދެވަނަ ބެޗްގައި ޖުމްލަ 16 ފަރާތަކުންވަނީ ބައިވެރިވެފައެވެ. މިޕްރޮގްރާމްގެ މަޤުސަދަކީ ރާއްޖޭގައި މެރިކަލްޗަރ ސިނާޢަތުގައި މަސައްކަތްކުރާނެ ދިވެހިން ތަމްރީނުކުރުން. އެގޮތުން އެކުއަކަލްޗަރގެ ނިޒާމުތަކާއި ދިރޭ ކާނާ އާލާކުރުމާއި ފާނައާއި، ހުއިފިލަނޑާއި، ދިވެހި މާކަނޑުމަސް އަދި އިތާމުތް އާލާކުރުމާއި، އާލާކުރާ ބާވަތްތަކަށް ޖެހޭ ބަލިތައް ދެނެގަނެ ބަލިތަކުން ރައްކާތެރިކުރުމާއި، މެރިކަލްޗަރ އާލާކުރުމުގައި ތިމާވެއްޓަށް ގެއްލުން ކުޑަވާގޮތަށް އެމަސައްކަތްކުރުމާއި ގުޅޭގޮތުންވަނީ މަޢުލޫމާތު ދީފަ. މެރިކަލްޗަރ ކޯހުގެ ދަށުން މިހާތަނަށް 26 ފަރާތެއްވަނީ ތަމްރީންކޮށްފައެވެ.