ރާއްޖޭގައި ވެރިކަން ކުރެެއްވި ރައީސުންގެ ތަޖުރިބާއަށް ބަލާއިރު ޑރ. މުހައްމަދު މުއިއްޒުއަކީ މަޝްވަރާ ކުރައްވަންޖެހޭ ކޮންމެ ހާލަތެއްގައި އެކަމަކާއި ގުޅުން ހުރި ފަރާތްތަކާއި މަޝްވަރާ ކުރައްވާ ބޭފުޅެއް ކަމަށް ފިޝަރީޒް މިނިސްޓަރ އަހްމަދު ޝިޔާމް ވިދާޅުވެއްޖެއެވެ.

އެކްސް ގައި ކުރެއްވި ޕޯސްޓެއްގައި ޝިޔާމް މިފަދައިން ވިދާޅުވީ ރާއްޖޭގެ އޮންލައިން ނޫހެއްކަމަށްވާ 'ދައުރު'ގައި ޝާއިއުކޮށްފައިވާ ލިޔުމަކާއި ގުޅިގެންނެވެ. އެ ލިޔުމުގައި ބަޔާންކޮށްފައިވާ ގޮތުން ރައީސް މުއިއްޒު ލޭނު މަސްވެރިކަމަށް ހުއްދަ ނުދޭން ރައީސް ނިންމެވީ މިނިސްޓަރު ޝިޔާމުއާ މަޝްވަރާ ވެސް ނުކޮށެވެ. ނަމަވެސް މިކަން ވަޒީރު ވަނީ ދޮގުކުރައްވާފައެވެ.

ރާއްޖޭގެ ވެރިކަން ކުރެއްވި ވަރަށްގިނަ ރައީސުން ތަޖުރިބާ ކުރެވިއްޖެ. ރައީސް ޑރ. މުއިއްޒު ތަޖުރިބާ މިކުރެވެނީ މަޝްވަރާ ކުރައްވަން ޖެހޭ ކަންކަމުގައި މަޝްވަރަާ ކުރައްވަންޖެހޭގޮތަށް މަޝްވަރާ ކުރައްވަންޖެހޭ ފަރާތްތަކާ އަދި މަޝްވަރާ ކުރައްވަން ޖެހޭ މިންވަރަށް މަޝްވަރާ ކުރައްވާތަން،- މަސްވެރިކަމާ ބެހޭ ވަޒީރު އަޙްމަދު ޝިޔާމް

ލޭނު މަސްވެރިކަމަށް ދިން ހުއްދަ އަނބުރާ ބާތިލް ކުރަން ރައީސް ނިންމެވީ އެކަމާއި ގުޅުން ހުރި ފަރާތްތަކުގެ ކަންބޮޑުވުންތައް އަޑުއެއްސެވުމަށްފަހުގައެވެ. އެގޮތުން ރައީސް އޮފީހުގައި އިއްޔެ ބޭއްވި ބައްދަލުވުމުގައި ރައީސް ވަނީ ބީކޭއެމްޔޫ ( ބޮޑުކަންނެލީގެ މަސްވެރިކަމާއި ބެހޭ ޔޫނިއަން) ގެ ފަރާތްތަކާއި ބައްދަލުކުރައްވާފައެވެ. މިބައްދަލުވުމުގައި އެޖަމުއިއްޔާގެ ފަރާތުން ވަނީ މަސްވެރިކަމުގެ ސިނާއަތަށް ހުރި ބޮޑެތި ގޮންޖެހުންތައް ފާހަގަކޮށްފައެވެ. މި ބައްދަލުވުމުގައި ރައީސްގެ އިތުރަށް ފިޝަރީޒް މިނިސްޓަރ ޝިޔާމް ވެސް ވަނީ ބައިވެރިވެލައްވާފައެވެ.

އޭގެ ތެރޭގައި މަސްވެރިކަމުން ލިބޭ ނަފާ ދަށްވުމާއި ޒަމާނީ ވަސީލަތްތައް ނެތުމުގެ އިތުރުން ދޯނިތަކަށް ހޯދަންޖެހޭ ސާފުތާހިރުކަމުގެ ލިޔުން ހޯދުމުގައި ދިމާވާ ދަތިތައް ވަނީ ރައީސްއަށް ހުށައަޅާފައެވެ. މީގެ އިތުރުން ފްލޯ ޕްރައިސްއެއް ކަނޑައަޅުއްވައި އޭގެ ދަށުން މަސްވިއްކޭނެ އިންތިޒާމެއް ހަމަޖައްސައިދެއްވުމަށް ވެސް މިބައްދަލުވުމުގައި ބީކޭއެމްއޫ އިން ވަނީ ރައީސް ގެ އަރިހުން އެދިލައްވާފައެވެ. އަދި މަސްވެރިކަމަށް ޚާއްޞަ ބޮއި ހޯދައިދެއްވުމަށާއި، އެންވެރިކަން ކުރާ ސަރަހައްދުތައް ރައްކާތެރިކޮށްދެއްވުމަށް ވެސް ގޮތްތަކެއް އެކުލަވާލައި ކަނޑައަޅުއްވައިދެއްވުމަށް ވެސް މި ޖަމުއިއްޔާއިން ވަނީ އެދިފައެވެ،