ގެދޮރުވެރިޔާ ސްކީމްގެ ދަށުން ދޫކޮށްފައިވާ 4،000 ފްލެޓްގެ ރީ-އިވެލުއޭޝަންގެ މަސައްކަތަށް އެއްވެސް ފަރާތަކުން ނުފޫޒެއް ނުފޯރުވާ ކަމަށާއި، މަގްސަދަކީ އެންމެ ހައްގުވެރިންނަށް ފްލެޓްތައް ލިބުންކަމަށް ހައުސިން މިނިސްޓްރީން ބުނެފިއެވެ.

ހައުސިންގ މިނިސްޓްރީން ނެރުނު ބަޔާނެއްގައި ބުނީ ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތަކާއި ގުޅިގެން އާންމުންގެ ހިތްތަކުގައި ނުބައި ތަސައްވުރު އުފެދޭ ގޮތަށް ބައެއް ފަރާތްތަކުން އަޑު ފަތުރަމުން އަންނަކަމަށެވެ.

އެ މިނިސްޓްރީން ބުނީ މި ސްކީމާއި ގުޅިގެން ކުރިއަށްދާ ރީ-އިވެލުއޭޝަންގެ މަސައްކަތްތައްް ރައްޔިތުންގެ މަޖިލީހުގެ މެންބަރުންނާއި ބައެއް ސިޔާސީ ފަރާތްތަކުން ނުފޫޒު ފޯރުވާކަމަށް ބުނެ ފަތުރަނީ ރައްޔިތުންގެ ހިތްތަކުގައި ނުތަނަވަސްކަން އުފެދޭގޮތަށް، ކަނޑައެޅިގެން ހަގީގަތާއި ހިިލާފަށް ދޮގެއް ކަމަށެވެ.

"މި ސްކީމާއި ގުޅިގެން ކުރިއަށްދާ ރީ-އިވެލުއޭޝަންގެ މަސައްކަތްތަށް އެއްވެސް ފަރާތަކުން ނުފޫޒެއް ނޯފުވޭނެކަމުގެ ފުރިހަމަ ޔަގީންކަން އެންމެހައި ރައްޔިތުންނަށް އަރުވަމެވެ،". އެ ބަޔާނުގައި ވެއެވެ.

މަގްސަދަކީ މި ސްކީމްގެ ދަށުން ފްލެޓްތައް ލިބިގެންދާނީ އެންމެ ހައްގުވެރި ފަރާތްތައް ކަމުގައި ކަނޑައެޅިގެންދިއުން ކަމަށް ވެސް ހައުސިން މިނިސްޓްރީގެ ބަޔާނުގައި ވިދާޅުވެފަވެއެވެ.