ރާއްޖޭގައި އަތޮޅުތަކުގައި ދިރިއުޅޭ މީހުންގެ ތެރެއިން ގެދޮރު ނުހެދި ތިބި ފަރާތްތަކަށް ލުއި ފަސޭހަކަމާއެކު ގެދޮރު އެޅޭނެ އިންތިޒާމު ހަމަޖެއްސުމާގުޅޭ އެއްބަސްވުމެއްގައި ބީއެމްއެލްއާއެކު ސަރުކާރުން ސޮއިކޮށްފިއެވެ.

"ހިޔާވަހި ފައިނެންސް ސްކީމް"ގެ ދަށުން ލޯނަށް އެދެމުގެ ފުރުޞަތު ކުރިއަށް އޮތް ހަފްތާއެއްހާ ދުވަހުގެ ތެރޭގައި ހުޅުވާލުމަށް ހައުސިން މިނިސްޓްރީން މަސައްކަތް ކުރައްވަމުން ގެންދަވާއިރު، މި ސްކީމްގެ ދަށުން ތިން ބާވަތެއްގެ ލޯނު ދޫކުރުމަށް ވަނީ ހަމަޖެހިފައެވެ.

ހިޔާވަހި ފައިނޭންސް ސްކީމްގެ ދަށުން ދޫކުރާ ލޯނުތައް:

• އެގޮތުން އަރބަން ސެންޓަރުތައް ހިމެނޭ ތަންތަނުގައި ގެ އެޅުމަށް - ގިނަވެގެން 3 މިލިޔަން ރުފިޔާ
• މާލެ ސަރަހައްދުގައި ގެދޮރު އެޅުމަށް - ގިނަވެގެން 6 މިލިޔަން ރުފިޔާ
• ރާއްޖެތެރޭގެ ރަށްރަށުގައި ގެދޮރުއެޅުމަށް - ގިނަވެގެން 1 މިލިޔަން ރުފިޔާ

މި ލޯންތައް ދޫކުރަނީ 25 އަހަރު ދުވަހުގެ ތެރޭގައި ދައްކަންޖެހޭ ގޮތަށެވެ. މި ލޯންތަކުގެ އިންޓަރެސްޓް ރޭޓަކީ 5 އިންސައްތައެވެ.

ހިޔާވަހި ފައިނެންސް ސްކީމަށް އެހީތެރިކަން ފޯރުކޮށްދިނުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވީ، ބީއެމްއެލްއާއެކީގައި ސޮއިކުރެވިގެން މިދިޔައީ ބޯހިޔާވަހިކަމަށް ދޫކުރެވޭ ލުއި ލޯނު ސްކީމްގެ މަސައްކަތުގައި ފަންޑު މެނޭޖްކުރުމުގައި އެ ބޭންކުގެ އެހީތެރިކަން ހޯދުމުގެ މަސައްކަތަށް ކަމަށެވެ.