ގެދޮރުވެރިޔާ ސްކީމްގެ ދަށުން ސަރުކާރުން އިމާރާތްކޮށްފައިވާ 4،000 ފުލެޓު މިއަހަރު ނިމުމުގެ ކުރިން ހަވާލު ކުރެވޭނެކަމަށް ހައުސިން އެންޑް އާބަން ޑިވެލޮޕްމެންޓް މިނިސްޓަރު  ޑރ.ޢަލީ ހައިދަރު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ރޭ ވާހަކަފުޅުދައްކަވަމުންނެވެ.

މި ޕްރޮގްރާމްގައި މިނިސްޓަރު ދެއްކެވި ވާހަކާގައި ވިދާޅުވީ، 4000 ފުލެޓަށް އެދި ހުށައަޅާފައިވާ ފޯމްތައް އަލުން އިވެލުއޭޓް ކުރުމުގެ މަސައްކަތްތައް ކުރަމުން އަންނަކަމަށާއި، އެހުރިހާ ފޯމެއް އިވެލުއޭޓްކޮށް ނިމުމުން އަންނަ ހަފުތާ ތެރޭގައި ފުލެޓް ލިބޭ މީހުންގެ ވަގުތީ ލިސްޓް އިއުލާންކުރާނެ ކަމަށެވެ.

އެއަށްފަހު އެ ލިސްޓަށް ޝަކުވާ ހުށައެޅުމުގެ ފުރުސަތު ވެސް ހުޅުވާލާނެ ކަމަށާއި އަދި އިރާދަކުރެއްވިއްޔާ މިއަހަރު ނިމުމުގެ ކުރިން ފުލެޓްތައް ހަވާލުކުރަށްވާނެ ކަމަށް މިނިސްޓަރު ވިދާޅުވިއެވެ.