20 އަހަރުގެ ޖަލު ޙުކުމުން ސަލާމަތްވީ "އަންހެނަކު ފެންވަރަން ހުރި ވީޑިއޯއެއް" މި އިބާރާތް އޮތުމުން


27 ނޮވެމްބަރު 2024 - 15:52
ދައުލަތުން އަސްލަމް ޙަސަންގެ މައްޗަށް 2 ދަޢުވާއެއް ދަށު ކޯޓުގައި އުފުލިއެވެ. އެއީ ދިވެހިރާއްޖޭގައި އޮރިޔާންކާޑު ގެންގުޅުމާއި މީހަކު ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަ ގޮތަށް އޮރިޔާންކާޑު ހެދުން މި ދެ ދަޢުވާއެވެ.
ފުރަތަމަ ދަޢުވާ އޭނާގެ މައްޗަށްކޮށްފައި އޮތީ ޤާނޫނުލްއުޤޫބާތުގެ ދަށުންނެވެ. ދެވަނަ ދަޢުވާ ކޮށްފައި އޮތީ ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލު ކުރުމުގެ ޤާނޫނުގެ ދަށުންނެވެ. މި މައްސަލަ ދަށުކޯޓުން ބަލާ ޙުކުމްކޮށްފައިވަނީ މި ދެ ދަޢުވާވެސް އޭނާގެ މައްޗަށް ސާބިތުވާކަމަށެވެ.
އެގޮތުން ފުރަތަމަ ދަޢުވާގެ އަދަބެއްގެ ގޮތުން 1 މަހާއި 6 ދުވަހުގެ މުއްދަތަށް އޭނާ ޖަލަށްލުމަށް ޙުކުމްކޮށް، ދެވަނަ ދަޢުވާގެ އަދަބެއްގެ ގޮތުން 20 އަހަރާއި 1 މަހާއި 6 ދުވަހުގެ މުއްދަތަށް ޖަލަށްލުމަށް ޙުކުމް އިއްވިއެވެ.
މި ޙުކުމާމެދު ހިތްހަމަނުޖެހިގެން އަސްލަމް ޙަސަންގެ ފަރާތުން މި މައްސަލަ ދިވެހިރާއްޖޭގެ ހައިކޯޓުގައި އިސްތިޢުނާފު ކުރިއެވެ. އިސްތިޢުނާފުކޮށްފައިވަނީ މައިގަނޑު 2 ނުކުތާގެ މައްޗަށް ބިނާކޮށެވެ.
ދިވެހިރާއްޖޭގެ ހައިކޯޓުގައި މި މައްސަލަ ބެލި ފަނޑިޔާރުންގެ ބެންޗުގެ ރިޔާސަތުގައި އިންނެވީ ފަނޑިޔާރު ޙުސައިން މަޒީދެވެ. މަޒީދުގެ ރަޢުޔަށް އަނެއް ދެ ފަނޑިޔާރުން ތަޢީދު ކުރައްވައެވެ.
ސުވާލު އުފެދުނީ މޯބައިލް ފޮރެންސިކް ރިޕޯޓާ ގުޅިގެން:
މި މައްސަލައިގައި އަސްލަމް ޙަސަންގެ މައްޗަށް ދަށު ކޯޓުގައި ކުރި ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުމުގެ ދަޢުވާ ސާބިތުކުރުމަށް އަސާސީ ގޮތެއްގައި ހުށަހެޅިފައިވާ އެއް ހެކި ކަމަށްވާ މޯބައިލް ފޮރެންސިކް ރިޕޯޓުގައި އަސްލަމް ޙަސަންގެ ފޯނުން ފެނުނު ވީޑިއޯތަކުގައި "އަންހެނަކު" ފެންވަރަން ހުއްޓާ ފެންނަ ވީޑިއޯއެއް ހިމެނޭކަމަށް ބަޔާންކޮށްފައިވާތީއާއި ދަޢުލަތުން މި ދަޢުވާ ސީޣާގައި "އަންހެނަކު" ފެންވަރަން ހުރި ވީޑިއޯއެއް ފެނިފައިވާކަމަށް ބަޔާންކޮށްފައިވާތީ، މިކަން ކުޑަކުއްޖާއާ ގުޅެނީ ކިހިނަކުންތޯ ދިވެހިރާއްޖޭގެ ހައިކޯޓުގެ ފަނޑިޔާރުންގެ ބެންޗުން ދަޢުލަތާ ސުވާލުކޮށްފައިވެއެވެ. ސަބަބަކީ މި މައްސަލައިގެ ދަޢުވާއާ ގުޅިގެން ސާބިތުވާންޖެހެނީ ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުންކަމުގައިވާތީއެވެ. އަންހެނެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުމަކީ އޭގެ ޒާތުގައި މުޅިން ތަފާތު ނަތީޖާއެއް އަންނަ ތަފާތު ކުށަކަށްވާތީއެވެ.
ތަޙުޤީޤަށް ކުއްޖާ ކިޔައިދީފައިވާ ކިޔައިދިނުން:
2018 ވަނަ އަހަރުގެ ފަހުކޮޅު ސުކޫލު ނިމޭތީ ބޭއްވި ކުލާސްޕާޓީއަކަށް ގޮސް މޫދަށް އެރި އުޅުމަށްފަހު ގެއަށް އާދެވުނީ މެންދުރު 1 ޖަހާކަށްހާއިރު ކަމަށާއި، އައިސް ފެންވަރަށް ވަނީ ގޭގެ ބޭރުގައި ހުރި ގިފިއްޔަކަށް ކަމަށް ކުއްޖާ ބުނެފައިވެއެވެ. އަދި ކުއްޖާ ފެންވަރަށް ވަންއިރު އަސްލަމް ޙަސަން އެގޭގެ ޖޯލިފަތީގައި އިންކަމަށާއި ކުއްޖާ ފެންވަރަން ވަންތަން އޭނާއަށް ފެނިފައިވާކަމަށް ކުއްޖާ ބުނެފައިވެއެވެ. ކުއްޖާ ފެންވަރަށް ހުއްޓާ "ރަން" ކުލައިގެ ފޯނެއް ފާރުމަތިން ފެނުނު ކަމަށާއި ގިފިލީގެ ފާރުމަތިން ދެ ދިމާލަކުން ވީޑިއޯ ކުރިތައް ކުއްޖާއަށް ފެނިފައިވެއެވެ. އެހެންވެ ކުއްޖާ އަވަހަށް ގިފިލިން ނިކުތީ ކަމަށާއި އެގޭގައި "ރަން" ކުލައިގެ ފޯނެއް ގެންގުޅެނީ "އަސްލަމްބެ" އެކަނިކަމަށް ކުއްޖާ ތަޙުޤީޤުގައި ކިޔައިދީފައިވެއެވެ.
ދަށު ކޯޓަށް ހުށަހެޅުނު އަސްލަމް ޙަސަން ގެންގުޅުނު ފޯނާގުޅޭ މޯބައިލް ފޮރެންސިކް ރިޕޯޓުގައި ހަވާލާދީފައިވާ އެ ވީޑިއޯއާ ގުޅޭ މަޢުލޫމާތު ހިމެނޭ ޝީޓަށް ބަލާއިރު، ބުނެވުނު ގިފިލީގައި "އަންހެނަކު" ފެންވަރަން ހުރި ވީޑިއޯ "ކްރިއޭޓް" ކޮށްފައިވަނީ 2018 ވަނަ އަހަރުގެ ނޮވެމްބަރުގެ ފަހުކޮޅުގެ ދުވަހެއްގައި މެންދުރު 13:50 ގައިކަން އެނގެން އޮވެއެވެ. އެ ވީޑިއޯއިން ފެންނަ ގިފިއްޔަކީ ހަމަ ހަޤީޤަތުގައިވެސް ކުއްޖާ ފާހަގަކުރާ ގޭގެ ގިފިލިކަން ދަށުކޯޓަށް ހުށަހެޅުނު ވީޑިއޯ އެންޑް އިމޭންޖް އެނަލިސިސް ރިޕޯޓުގައި ފާހަގަކޮށްފައިވެއެވެ.
ނަމަވެސް މޯބައިލް ފޮރެންސިކް ރިޕޯޓުގައި އަދި ދަޢުވާ ސީޣާގައިވެސް ތުޙުމަތު އުފެދޭ ގިފިލީގައި "އަންހެނަކު" ފެންވަރަން ހުރި ވީޑިއޯއެއް ފެނިފައިވާކަމަށް ބަޔާންކޮށްފައިވާއިރު، މި މައްސަލައިގައި ދަށު ކޯޓަށް ހުށަހެޅުނު ހެކިތަކަށް އެކީގައި ރިޢާޔަތްކޮށް ބެލިނަމަވެސް އެ ވީޑިއޯއިން ފެންނަނީ ކުޑަކުއްޖެއްތޯ ނުވަތަ މި މައްސަލައިގައި ހިމެނޭ ކުޑަކުއްޖާތޯ ކަށަވަރުކުރުމަށް ތަޙުޤީޤުން އެެއްވެސް ކަމެއް ކޮށްފައިވާކަން އެނގޭކަން ނެތެވެ.
އެހެންކަމުން، ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުމުގެ ކުށުގެ އެންމެ އަސާސީ އެއް އުންސުރަކީ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހަދާފައިވަނީ 18 އަހަރުން ދަށުގެ ކުޑަކުއްޖެއްކަމަށް ވުމުގެ އުންސުރު މި މައްސަލައިގައި ފުރިހަމަނުވާކަމަށް ފަނޑިޔާރުންގެ ޢިއްތިފާޤުން ނިންމީއެވެ.
މި މައްސަލައިގައި ހުށަހެޅިފައިވާ އެހެނިހެން ހެކިތައް އެކުގައި ގުޅުވާލުމުން އެ ވީޑިއޯއަކީ މި މައްސަލައިގައި އަނިޔާލިބުނު ކުއްޖާގެ ވީޑިއޯއެއްކަން ސާފުވާނެކަމަށް ދައުލަތުން ތަކުރާރުކޮށް ފާހަގަ ކުރިއެވެ.
އިތުރު ލިޔުންތައް

ކާރު އެކްސިޑެންޓްގައި މީހަކު ނިޔާވުން: ވިސާމްގެ ބަންދަށް ލުޔެއް ނުދިން
6 މަސް ކުރިން
ދިރިއުޅޭ އެޑްރެސް ސާފުނުވާތީ ބޭރުކޮށްލި މައްސަލަ އަލުން ހައިކޯޓަށް
6 މަސް ކުރިން
ބައްސާމް ހުށަހެޅި އިސްތިއުނާފްގެ މައްސަލަ ހައިކޯޓަށް ބަލައެއް ނުގަތް
6 މަސް ކުރިން