މަސްވެރިކަމުގެ ދާއިރާއިން ރާއްޖެއިން ބޭރުން މަތީ ތައުލީމު ހޯދުމުގެ ފުރުސަތުތަކެއް ފިޝަރީޒް މިނިސްޓްރީން ހުޅުވާލައިފިއެވެ.

މިއީ ޓްރާންސްފޯރމިންގ ފިޝަރީޒް މެނޭޖްމަންޓްއިން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް ޕްރޮޖެކްޓްގެ ދަށުން ހުޅުވާލި ފުރުޞަތުތަކެކެވެ.

ގޮތުން ހުޅުވާލާފައިވަނީ ފިޝަރީޒް ސައިންސް/ މެރިން ސައިންސްއިން ބެޗްލަރސް ޑިގްރީ ހާސިލް ކުރުމުގެ ދެ ފުރުސަތާއި އެކުއަކަލްޗަރއިން ބެޗްލަރސް ޑިގްރީ ހާސިލްކުރުމުގެ ފުރުސަތެކެވެ.

މި ސްކޮލަޝިޕްތަކަށް ކުރިމަތިލުމުގެ ޝަރުތުތަކުގެ ތެރޭގައި ޖީސީއީ އޯލެވެލްގެ ފަސް މާއްދާއިން 'ސީ' އިން ފެށިގެން މަތީ ގްރޭޑެއް ޙާސިލުކޮށްފައިވުމާއި ޖީސީއީ އޭލެވެލްގެ ތިން މާއްދާއިން 'ސީ' އިން ފެށިގެން މަތީ ގްރޭޑެއް ޙާސިލުކޮށްފައިވުން ހިމެނެއެވެ.

އަދި ފައުންޑޭޝަން ނުވަތަ ސަރޓިފިކެޓް ލެވެލްގެ ޔުނިވަރސިޓީ އެންޓްރެންސް ގަބޫލުކުރާ ސަނަދެއް ހާސިލްކޮށްފައިވުންވެސް ހިމެނެއެވެ.

މިނިސްޓްރީގެ އިއުލާނުގައިވާގޮތުން މި ސްކޮލަރޝިޕް ލިބިއްޖެ ނަމަ ކޯސް ފުރިހަމަކުރުމަށްފަހު ސިވިލް ސަރވިސްގެ ގަވާއިދުގައި ވާގޮތަށް އެ މިނިސްޓްރީގައި ޚިދުމަތް ކުރުމަށް ބޮންޑުކުރެވޭނެއެވެ.

މި ކޯސްތަކަށް ކުރިމަތިލާން ބޭނުންވާ ފަރާތްތަކުން އަންނަ ޖެނުއަރީ މަހުގެ ނުވަ ވަނަ ދުވަހުގެ މެންދުރު 12:00 ގެ ކުރިން ހުށަހަޅަންޖެހެއެވެ.