މަސްވެރިން ކިރުވާ މަހަށް 48 ގަޑި އިރުތެރޭގައި ފައިސާ ދޫކުރަން ފަށައިފި އެވެ.

ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ މިދިޔަ އާދީއްތަ ދުވަހު މަސްވެެރިން މިފްކޯއަށް ކިރި މަހަށްވާ 2،045،823.37ރ މިއަދު މިފްކޯއިން މަސްވެރިންނަށް ޖަމާކޮށްފައިވާ ކަމަށެވެ.

މަސްވެރިންގެ ޙައްގުތައް ހިމާޔަތްކުރުމަށް ރައީސް ޑރ. މުޙައްމަދު ކުރައްވަމުންގެންދަވާ މަސައްކަތްތަކަށް ރައްޔިތުންގެ މަޖިލީހުގެ ރައީސް ޢަބްދުއްރަހީމް ޢަބްދުﷲ ވެސް ވަނީ ރައީސް އަށް ޝުކުރު އަދާކުރައްވާފައެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ރައްޔިތުންގެ މަޖިލީހުގެ ރައީސް ވަނީ މަސްވެރިންގެ ދުވަހުގެ ހެޔޮއެދުންތައް، މަސްވެރިންނާއި، މަސްވެރި އާއިލާތަކާއި، އޮޑިވެރީންނާއި، މަސްވެރިކަމުގެ ދާއިރާގައި ހަރަކާތްތެރިވާ އެންމެހާ ފަރާތްތަކަށް އަރިސްކުރައްވާފައެވެ.

މަޖިލީހުގެ ރައީސް ވިދާޅުވީ މަސްވެރީންގެ ހައްޤުތައް ހިމާޔަތްކޮށް، ވާރެއާއި އަވީގައި، ދުވާލާއި ރޭގަނޑު، ބިޔަ ކަނޑުތަކުގައި، ދިވެހި މަސްވެރިންކުރާ ހިންމަތުގެ އަގު އިހުތިރާމާއެކު ވަޒަންކުރުމަކީ ގައުމީ ވާޖިބެއް ވިދާޅުވެ، ދިވެހި މަސްވެރިން ބާނާ މަހަށް 48 ގަޑިއިރު ތެރޭގައި ފައިސާ ދެވޭނޭ މަގު ފަހިކޮށްދެއްވީތީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުއަށް ހިފެހެއްޓުމެއް ނެތް ޝުކުރާއި ތަޙްނިޔާ ދަންނަވާކަމަށެވެ.

މަޖިލީހުގެ ރައީސް މިހެން ވިދާޅުވެފައިވާއިރު، މަސްވެރިންގެ ހުރި ކަންބޮޑުވުންތައް ހައްލުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން، މަސްވެރިންނަށް މިހާތަނަށް ނުދީ ހުރި ފައިސާ ދައްކާ ވަނީ ޚަލާސްކޮށްފައެވެ. އަދި ކުރިއަށް އޮތްތަނުގައި މަސްވެރިންނަށް ދޭންޖެހި ފައިސާ ނުދީ ނުވަތަ ބެކްލޮގެއް ނުބާއްވާނެކަމުގެ ޔަޤީންކަންވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދެއްވާފައެވެ.