ރާއްޖޭގެ އެކި ހިސާބުތަކަށް މިހާރު ކުރަމުންދާ ވިއްސާރައިގައި ނ. ހެނބަދޫގެ 75 ގެއަކަށް ފެންވަދެ އެކި ވަރުގެ ގެއްލުންވެފައިވާކަމަށް ނެޝަނަލް ޑިޒާސްޓަރ މެނޭޖްމެންޓް އޮތޯރިޓީން ވިދާޅުވެއްޖެއެވެ.ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ، ވިދާޅުވީ މިއަދު ހެނދުނު ނ. ހެނބަދޫއަށް ވާރޭވެހި ފެންބޮޑުވުމުގެ ސަބަބުން އެރަށުގެ 75 ގެއަކަށް ފެންވަދެ އެކިވަރުގެ ގެއްލުންތައް ލިބިފައިވާ ކަމަށެވެ. އަދި ހެނބަދޫ ކައުންސިލާއި ދިވެހިރާއްޖޭގެ ޤައުމީ ދިފާޢީ ބާރު ގުޅިގެން ފެން ހިއްކުމުގެ މަސައްކަތް މިހާރު ކުރަމުންދާކަމަށްވެސް އެންޑީއެމްއޭއިން ވިދާޅުވިއެވެ.

މި ވިއްސާރައާ ގުޅިގެން ހެނބަދޫން ވާހަކަ ދެއްކި މީހަކު ބުނި ގޮތުގައި މިއަދު ހެނދުނު 6:30 އިން ފެށިގެން އެ ރަށަށް ވެހެން ފެށި ވާރޭ ދެ ގަޑިއިރު ފަހުން ތުނިކޮށްލި އިރު މުޅި ރަށް އޮތީ ފެނު އަޑީގައެވެ. ގިނަ ގެތަކަށް ފެން ވަދެ ހިފާ ގެންގުޅޭ ސާމާނާއި ފަރުނީޗަރު ފަދަ ތަކެތި ވަނީ ހަލާކުވެފައެވެ.

މިކަމާ ގުޅޭގޮތުން މަޢުލޫމާތު ދެއްވަމުން މޫސުމާ ބެހޭ ޤައުމީ އިދާރާއިން ވިދާޅުވީ މި ދުވަސްވަރަކީ ރާއްޖޭގެ ސަރަހައްދަށް ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރު ކަމަށްވާތީ މިދުވަސްވަރު ކޮޅިގަނޑުތައް އުފެދުމުގެ ފުރުޞަތު އޮންނާނެ ކަމަށެވެ. އެގޮތުން، ބަންގާޅު ކަނޑުގައި މިއަދުގެ ވަގުތެއްގައި ކޮޅިގަނޑެއް އުފެދި ކުރިއަށް އޮތް 2 ދުވަހުގެ ތެރޭގައި ދެކުނު އިންޑިއާގެ ޓެމިލްނާޑޫގެ އައްސޭރިފަށާ ދިމާއަށް ޖެހޭނެ ކަމަށް ލަފާކުރެވޭ ކަމަށް އެ އިދާރާއިން ވިދާޅުވެއެވެ.

މީގެ އިތުރުން ރާއްޖެއާ ދުރުން ދެކުނުގައިވެސް ކޮޅިގަނޑެއް އުފެދި ހުޅަނގަށް ޖެހެމުންދާނެ ކަމަށްވެސް މޫސުމާބެހޭ ޤައުމީ އިދާރާއިން ވިދާޅުވެއެވެ. މި ދެކޮޅިގަނޑުގެ ސަބަބުން ބުދަ ދުވަހުން ފެށިގެން ފަސް ދުވަހަށް ރާއްޖެއަށް މޫސުން ގޯސްވާނެ ކަމަށްވެސް ވަނީ ލަފާކޮށްފައެވެ.

2019 ވަނަ އަހަރު އެ ރަށުގައި ފެން ހިންދާ ސިސްޓަމެއް ގާއިމްކޮށްފައިވީ ނަމަވެސް މިއަދު ވާރޭވެހުނީ ފެން ހިންދާ ސިސްޓަމަށް ވެސް ނުކަތާ ވަރަށެވެ.