ފާއިތުވި 24 ގަޑިއިރުގެ ތެރޭގައި މާލެއަށް ވެހުނު ބޯ ވާރޭގެ ސަބަބުން އަށް ގޭބީސީއަކަށް ފެން ވަދެ ޙާލަތު ގޯސްވެފައިވާ ކަމުގައި ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ(އެންޑީއެމްއޭ) އިން ބުނެފިއެވެ.

އެންޑީއެމްއޭ އިން ބުނީ، އެކަމާ ގުޅިގެން އެ ގޭބީސީތަކުން 32 މީހަކު ވަގުތީ ގޮތުން ގެސްޓް ހައުސްތަކާއި އާއިލާ މީހުން ދިރިއުޅޭ ގެތަކަށް ބަދަލުކޮށްފައިވާ ކަމަށެވެ. އަދި އެ އަށް ގޭބީސީތަކަށް ވަގުތީ ބޯހިޔާވަހިކަމާއީ ކެއިން ބުއިން ފޯރުކޮށްދީފައިވާ ކަމުގައި ފާހަގަކުރަމުން އެންޑީއެމްއޭ އިން ބުނީ، ވަގުތީ އެހީތެރިކަން ބޭނުންވާ 12 ގޭބީސީއެއްގެ ރެޕިޑް އެސެސްމެންޓު ވެސް އެ އިދާރާއިން ހަދާފައިވާ ކަމަށެވެ.

މީގެ އިތުރުން، ވިއްސާރައިގެ ސަބަބުން އެންޑީއެމްއޭ، ސިފައިން، ފުލުހުން، އަދި ދިވެހި ރެޑް ކްރެސެންޓުގެ ހޮޓްލައިންތަކަށް 101 ކޯލު ލިބިފައިވާ ކަމުގައި އެންޑީއެމްއޭ އިން ބުންޏެވެ.

އަ ދި ފެން ބޮޑުވުމާއި ގުޅިގެން ގޭގެ އާއި، ފިހާރަތައް އަދި ގުދަންތަށް ހިމެނޭހެން، މާލޭ ސިޓީ ކަައުންސިލް އަދި މިނިސްޓްރީ އޮފް ސިޓީސް ލޯކަލް ގަވަރމެންޓް އެންޑް ޕަބްލިކް ވޯކްސްގެ އެހީތެރިކަމާއެކު 47 ތަނެއްގައި 229 ވެލިބަސްތާ ޖަހާފައިވާ ކަމުގައި ވެސް އެންޑީއެމްއޭ އިން ބުންޏެވެ.

މި ދުވަސްވަރު ރާއްޖޭގެ މޫސުން ގޯސްވާނެކަމަށް މެޓުން ލަފާކުރާއިރު، ރޭގައި ވެހުނު ވާރޭގެ ސަބަބުން އެންމެ ބޮޑަށް ފެންބޮޑުވުމުގެ އަސަރުކޮށްފައިވަނީ މާލޭގެ މާފަންނު ސަރަހައްދަށެވެ.