ކުރިއަށް އޮތް ފަސް ދުވަހު ރާއްޖޭގެ މޫސުން ގޯސްވާނެކަމަށް މެޓްއިން ލަފާކޮށްފިއެވެ.

މޫސުމާ ބެހޭ ގައުމީ އިދާރާ (މެޓް އޮފީހުން) ލަފާ ކުރާ ގޮތުގައި، ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑަކާއި، އެކޮޅިގަނޑާއި ގުޅިފައިވާ ލޯޕްރެޝަރ ޓްރަފްގެ ސަބަބުން، ރާއްޖޭގެ ބޮޑުބަޔަކަށް ގުގުރުމާއިއެކު ބޯކޮށް ވާރޭވެހޭނެކަމަށް ލަފާކުރެެވޭ ކަމަށެވެ. އަދި ވަޔާއި ކަނޑު ގަދަވެ، ބައެއް ރަށްތަކަށް އުދަ އެރުމުގެ ފުރުސަތު އޮތްކަމަށް ވެސް މެޓްއިން ލަފާކުރެއެވެ.

މިގޮތުން، ވައިޖެހޭނީ އުތުރާއި މެޖު ރާއްޖެތެރޭގެ އަތޮޅުތަކަށް، އުތުރާއި އިރު އުތުރުން، އަދި ދެކުނުގެ އަތޮޅުތަކަށް، ހުޅަނގާއި ހުޅަނގުއުތުރުންނެވެ. ވައިޖެހޭނީ ގަޑިއަކު، 15 މޭލާއި 25 މޭލާއި ދެމެދުގެ ބާރުމިނުގައެވެ. މީގެ އިތުރުން، ވިލާގަނޑުގައި ގަޑިއަކު ގާތްގަނޑަކަށް 50 މޭލަށް ވައި ގަދަވާނެ ކަމަށް މެޓްއިން ލަފާކުރެއެވެ. އަދި ކަނޑުތައްވެސް އާންމު ގޮތެއްގައި ގަދަވާނެކަމަށްވަނީ ލަފާކުރެވުފައެވެ.

އާ އަހަރު ބަންދުގެ މޫސުމީ ނިމުތު--ފޮޓޯ: މެޓް

މީގެ އިތުރުން ފާހަގަކޮށްލެވެނީ، މިއަދުގެ 8:30 އިން ފެށިގެން މެންދުރު 14:00 މެޓްއިންވަނީ، ހއ އަތޮޅުން ފެށިގެން ކ އަތޮޅަށް ހުދު ސަމާލު ނެރެފައެވެ. މެޓްއިން ލަފާކޮށްފައިވަނީ، މި ސަރަހައްދަށް ބޯކޮށް ވާރޭވެހުމާއެކު، ގުގުރާ، ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށެވެ.

މެޓްއިންވަނީ، ހުރިހާ ފަރާތްތަކުން، ވަކިން ޚާއްސަކޮށް ކަނޑުދަތުރު ކުރައްވާ ފަރާތްތަކުން، އެ ސަރިވިސްގެ އެންމެ ފަހުގެ މޫސުމީ ނިމުތުތަކާއި ސަމާލުތަކަށް އިސަކަންދެއްވުމަށް އިލްތިމާސްކޮށްފައެވެ.