ދެކުނުގެ ބައެއް ރަށްތަކަށް ގުގުރުމާއި އެކު ވިއްސާރަވާނޭ ކަމަށް ލަފާކުރެވޭކަމަށް ރާއްޖޭގެ މޫސުމާއި ބެހޭ އިދާރާ (މެޓް އޮފީސް) އިން ހާމަކޮށްފިއެވެ.

މެޓް އޮފީހުން އާއްމު ކުރި މައުލޫމާތުގައި ވާގޮތުން މިއަދު ހަވީރު 18:00 އާހަމައިން ދެކުނުގެ ބައެއް ރަށްތަކަށް ވިއްސާރަވެ ގުގުރުމުގެ އިތުރަށް ކެރީގެ އަސަރުކުރާނެކަމަށް ލަފާކުރެވޭ ކަމަށެވެ. އަދި ހުޅަނގާއި ހުޅަނގު އުތުރުން ގަޑިއަކު ތިން މޭލާއި 13 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި ވިލާގަނޑުގައި ގަޑިއަކު ގާތްގަނޑަކަށް 30 މޭލަށް ވައިގަދަވުން އެކަށީގެންވާ ކަމަށް ވެސް މެޓް އޮފީހުން ލަފާކޮށްފައިވެއެވެ.

ކުރިއަށް 03 ދުވަހުގެ މެދުރާއްޖެ ތެރެއާއި އުތުރުގެ ރަށްތަކަށް ވިއްސާރަކުރިކަމުގައި ވިޔަސް ދެކުނުގެ ރަށްތަކަށް މޫސުން ރަނގަޅުވެ ކަނޑުމަޑު ވާނެކަމަށް ލަފާކުރެވޭ ކަމަށް މެޓް އޮފީހުން ވަނީ ހާމަކޮށްފައެވެ. އަދި މެދު ރާއްޖެ ތެރެއަށް ވިއްސާރަވިކަމުގައިވީނަމަވެސް އެއީ ކަންބޮޑުވާންޖެހޭ ވަރުގެ ވިއްސާރައެއް ނޫންކަމަށް ވެސް އެއިދާރާއިން ލަފާކުރެެއެވެ.

ފާއިތުވެ ދިޔަ ދުވަސްތަކުގައި ވިއްސާރަވުމުގެ ސަބަބުން މާލޭގެ ގިނަ ގެތަކަށް ފެންވަދެ މަގުމަތީގައި އުޅަނދުފަހަރު ދުއްވަން އަދި ހިނގާބިނގާވެހަދަން ދަތިވާ ވަަރަށް މަގުތަކުގައި ފެންބޮޑުވިއެވެ. މޫސުމާއި ގުޅިގެން ނެރޭ އެލާޓްތަކަށް ސަމާލުވެ، ކަނޑުގަދަ ދުވަސް ވަރު ކޮންމެހެން ކުރަންޖެހޭ ދަތުރުތައް ފިޔަވައި އެހެނިހެން ދަތުރުތައް ނުކުރުމަށް މޫސުމާއި ބެހޭ އިދާރާއިން އިލްތިމާސް ކުރެއެވެ.