އިސްރާއީލުގެ ވެރިރަށް ތެލް އަވީވަށް، ޔަމަނުގައި ހަރަކާތްތެރިވާ ހަތިޔާރުއެޅި ޖަމާއަތް ޙޫޘީންގެ ނުރައްކާތެރި މިސައިލު ހަމަލާއެއް ދީފިއެވެ. އެ ހަމަލާގައި 16 މީހުން ޒަޚަމްވެފައިވާ ކަމަށް ބޭރުގެ މީޑިއާތަކުން ރިޕޯޓުކޮށްފައިވެއެވެ.

ޙޫޠީން ބުނީ، މިސައިލް ޙަމަލާ އަމާޒު ކޮށްފައި ވަނީ ތެލް އަވީވުގެ ރަށްބޭރުގައި އޮތް ޔާފާގައި ހުރި ޔަހޫދީ ފައުޖުގެ އަސްކަރީ މަރުކަޒަކަށް ކަމުގައެވެ. ޔާފާއަކީ ޔަހޫދީން ވެރިވެގަނެފައިވާ ފަލަސްޠީނުގެ ބިމެކެވެ. އެ ތަނަށް ޙަމަލާ ދިނުމަށް ޙޫޘީން ބޭނުން ކޮށްފައި ވަނީ އަޑަށް ވުރެ ބާރަށް ދަތުރު ކުރުމުގެ ޤާބިލު ކަން ލިބިފައިވާ ހައިޕަރސޮނިކް ބެލިސްޓިކް މިސައިލެކެވެ. އެއީ، 'ފަލަސްޠީން 2' މަރުކާގެ މިސައިލެކެވެ.

މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހު އިސްރާއީލުން ޣައްޒާއަށް ހަމަލާދޭން ފެށި ފަހުން ޔަމަނުގައި ތިބި ޙޫޘީ ހަނގުރާމަވެރިން ވަނީ އިސްރާއީލާއި އެގައުމާ ގުޅުން ހުރި ބޯޓުތަކަށް ހަމަލާތައް އަމާޒުކޮށްފައެވެ.

ހޫޘީންގެ ހަމަލާތައް އިސްރާއީލަށް އަމާޒުކުރަނީ ފަލަސްތީނަށް ތާއީދުކުރުމުގެ ގޮތުން ކަމަށް އެ ޖަމާއަތުން ވަނީ ބުނެފައެވެ.

އިސްރާއީލުން ޣައްޒާގެ އާންމުންނަށް އަމާޒުކޮށް ދޭ ހަމަލާތަކުގައި މިހާތަނަށް 45،206 އަށްވުރެ ގިނަ މީހުން ޝަހީދުކޮށްލާފައިވާއިރު، އޭގެތެރޭގައި ގިނައީ ކުޑަކުދިންނާއި އަންހެނުންނެވެ. ހަމަލާތަކުގައި ޒަޚަމްކޮށްލާފައިވާ މީހުންގެ އަދަދު ވަނީ 107،512 އަށް އުފުލިފައެވެ.