ސީރިއާގައި ވެރިކަން ކުރަމުންދާ ތަޙްރީރް އަލް-ޝާމް (އެޗްޓީއެސް) ޖަމާއަތަކީ ޓެރަރިސްޓް ޖަމާއަތެއްގެ ގޮތުގައި ރާއްޖެއިން ކަނޑައަޅާފައި އޮތް އޮތުމާއި ސީރިއާއަށް ދިވެހިން ދަތުރުކުރުން މަނާކޮށްފައި އޮތް އޮތުން ދިވެހި ސަރުކާރުން މިއަދު ދަމަހައްޓައިފިއެވެ.

ސީރިއާގައި ވެރިކަންކުރަމުން އައި ބައްޝާރު އަލް އަސަދުގެ އާއިލާގެ 54 އަހަރުވީ ވެރިކަން ނިމުމަކަށް ގެނެސް މިހާރު ސީރިއާގެ ވެރިކަންކުރަނީ އެޗްޓީއެސް ޖަމާއަތުންނެވެ.

ދިވެހި ސަރުކާރުން ޓެރަރިސްޓް ޖަމާއަތްތަކާއި ހަނގުރާމަވެރި ސަރަހައްދުތަކުގެ ގޮތުގައި ދެކޭ ޖަމާއަތްތަކާއި ސަރަހައްދުތަކުގެ ލިސްޓް އާންމުކޮށް އިއުލާންކުރަމުން ދަނީ މީގެ 8 އަހަރު ކުރިން 2015 ވަނަ އަހަރު އަމަލުކުރަން ފެށި ޓެރަރިޒަމް މަނާކުރާ ގާނޫނުގެ ދަށުންނެވެ. އެގޮތުން އެޗްޓީއެސްއަކީ 2019 ވަނަ އަހަރުން ފެށިގެން ޓެރަރިސްޓް ޖަމާއަތެއްގެ ގޮތުގައި ރާއްޖެއިން ކަނޑައަޅާފައިވާ ޖަމާއަތެކެވެ.

ގާނޫނުގައިވާ ގޮތުން ގައުމީ ސަލާމަތާ ބެހޭ މަޖިލީހުގެ ލަފާގެ މަތިން އަހަރަކު އެއްފަހަރު މި ލިސްޓު މުރާޖައާކޮށް އާއްމުކުރަންޖެހެ އެވެ. މިއަދު ނެރުނު ލިސްޓުގައި ކުރިން ކަނޑައަޅާފައިވާ ލިސްޓަށް އެއްވެސް ބަދަލެއް ގެނެސްފައެއްނުވެއެވެ. އެޗްޓީއެސްގެ އިތުރުން 20 ޖަމާއަތެއް މި ލިސްޓުގައިވަނީ ހިމަނާފައެވެ.

ހަނގުރާމަވެރި ސަރަހައްދެއްގެ ގޮތުގައި ސީރިއާގެ ހުރިހާ ސަރަހައްދެއް ރައީސް އޮފީހުން ވަނީ ކަނޑައަޅާފައެވެ.

ރައީސުލްޖުމްހޫރިއްޔާ އާންމުކުރައްވާ ލިސްޓު ގައުމީ ސަލާމަތާ ބެހޭ މަޖިލީހުގެ އިރުޝާދާ އެކު ބަލަހައްޓަނީ ދިވެހި ސިފައިންނެވެ.

ތަހުރީރު އަލް-ޝާމް (އެޗްޓީއެސް)އަކީ އަލް-ގާއިދާއާއި އައިސިސްއާ ކުރިން ގުޅުން އޮތް ޖަމާއަތެއްނަމަވެސް ފަހުން އެ ޖަމާއަތުންވަނީ އެ ޖަމާއަތްތަކާ ދުރުވެ ގުޅުން ކަނޑާލައިފައެވެ. އަދި މިހާރު މެދު މިނުގެ ޖަމާއަތެއްގެ ގޮތުގައި އެ ޖަމާއަތް ދުނިޔެއަށް ދައްކަން އަންނަނީ ގިނަ މަސައްކަތްތަކެއް ކުރަމުންނެވެ.

އައު ވެރިކަމަކަށް ތައްޔާރުވުމަށް އެ ޖަމާއަތުން މިއަދު ވަނީ އަސްކަރިއްޔާގެ އިސް މަގާމުތަކަށް މީހުންވެސް އައްޔަނުކޮށްފައެވެެ.