ކުރިއަށް އޮތް 2025 ވަނަ އަހަރު ގައުމަށް ކުރިއެރުން ހޯދައިދިނުމަށް ކޮންމެ ރައްޔިތަކުވެސް މަސައްކަތްކޮށްދިނުމަށް މަޖިލީހުގެ ރައީސް އަބްދުއްރަހީމް އަބްދުއްﷲ އިލްތިމާސްކުރައްވައިފިއެވެ.

އަބްދުއްރަހީމް މިފަދައިން އިލްތިމާސްކުރެއްވީ މީލާދީ އައު އަހަރުގެ ތަޙުނިޔާ 2025 އަރިސްކުރައްވައި އެކްސްގައި ހިއްސާކުރެއްވި ޕޯސްޓެއްގައެވެ.

މީލާދީ އައު އަހަރުގެ ތަޙުނިޔާ އާއި ހެޔޮއެދުންތައް ރާއްޖޭގެ ޢިއްޒަތްތެރި ރައީސުލް ޖުމްހޫރިއްޔާގެ ދެކަނބަލުންނަށާއި، ރައްޔިތުންގެ މަޖިލީހުގެ ޢިއްޒަތްތެރި މެންބަރުންނަށާއި، އެންމެހާ ދިވެހި ލޮބުވެތި ރައްޔިތުންނަށް އަރިސްކުރައްވައި އަބްދުއްރަހީމް ވަނީ ކުރިއަށް އޮތް އަހަރު ކޮންމެ މީހަކީވެސް، އާ ޢަޒުމަކާއި އާ ހިތްވަރަކާއި އެކު ދިވެހިޤައުމަށް ފާގަތިކަމާއި، ކުރިއެރުމާއި، އަރުތަ ހާޞިލް ކުރުމަށް ހިތްމަތާއި އެކު މަސައްކަތްކުރާ ރައްޔިތަކަށް ވުމަށް އިލްތިމާސްކުރައްވާފައެވެ.

އަބްދުއްރަހީމް ގެ ޕޯސްޓް ނިންމާލައްވަމުން ވަނީ ދިވެހީންނަށް އުފާ ފާގަތި ފުދުންތެރި އަމާން ރައްކާތެރި މާދަމާއެއް ހޯއްދަވައި ދެއްވުމަށް ރައީސް ޑރ.މުޙައްމަދު މުޢިއްޒު ކުރައްވަމުންގެންދަވާ މަސައްކަތްޕުޅުގައި ބަރަކާތްލައްވައި،ދިވެހީންނަކީ އެކުވެރި، ހިތްހެޔޮ، ހެޔޮލަފާ، އަދި ދުޅަހެޔޮ ޞިއްޙަތެއް ލިބިފައިވާ ބަޔަކު ކަމުގައި މިންވަރު ކޮށްދެއްވުން އެދި މާތް ﷲ ގެ ހަޒުރަތުގައި ދުއާ ދަންނަވާފައެވެ.