އެމެރިކާގެ ލޮސް އެންޖެލެސްގައި ރޯވެ ފެތުރެމުންދާ އަލިފާންގަނޑު ނިއްވަން ގައިދީން ނެރެފިއެވެ.

މި އަލިފާނުގެ ހާދިސާއާ ގުޅިގެން 900 އަށް ވުރެ ގިނަ ގައިދީން ވަނީ އަލިފާން ނިއްވުމަށް ނެރެފައެވެ.

ކެލިފޯނިއާގެ ޕްރިޒަން އެޖެންސީ، ޑިޕާޓްމަންޓް އޮފް ކަރެކްޝަންސް އެންޑް ރިހެބިލިޓޭޝަން އިން ބުނި ގޮތުގައި ގައިދީން މަސައްކަތް ކުރަމުން ދަނީ "އަލިފާން ފެތުރޭ ސަރަަހައްދުތަކުގައި ހުރި ތެޔޮ އެހެން ސަރަހައްދަކަށް ބަދަލު" ކުރުމަށެވެ.

އަލިފާން ނިއްވުމުގައި ހަރަކާތްތެރިވާ ގައިދީންނަކީ ކަރެކްޝަންސް ޑިޕާޓްމަންޓާއި ކެލިފޯނިއާ ޑިޕާޓްމަންޓް އޮފް ފޮރެސްޓްރީ އެންޑް ފަޔާ ޕްރޮޓެކްޝަން އަދި ލޮސް އެންޖެލިސް ކައުންޓީ ފަޔާ ޑިޕާޓްމަންޓް ގުޅިގެން ހިންގާ ކެލިފޯނިއާގެ ކޮންޒަވޭޝަން ފަޔާ ކޭމްޕް ޕްރޮގްރާމްގެ މެމްބަރުންނެވެ.

ކަރެކްޝަންސް އިން ބުނާ ގޮތުގައި އެ މީހުންނަށް ދުވާލަކު އެންމެ ގިނަވެގެން ލިބެނީ 10 ޑޮލަރާއި 24 ސެންޓެވެ. އިމަޖެންސީ ހާލަތްތަކުގައި ގަޑިއަކު އިތުރު އެއް ޑޮލަރު ލިބޭނެއެވެ.

ކެލިފޯނިއާގެ ގަވަރުނަރު ގެވިން ނިއުސޯމް ހޮނިހިރު ދުވަހު ކުރެއްވި ޓްވީޓެއްގައި ވިދާޅުވީ ލޮސް އެންޖެލިސްގައި ރޯވަމުންދާ އަލިފާނުގެ ހާދިސާގައި ހަރަކާތްތެރިވާ ނޭޝަނަލް ގާޑްސްމެންގެ އަދަދު ދެގުނަ އިތުރުކުރައްވާނެ ކަމަށެވެ.

ސްޓޭޓް ނޭޝަނަލް ގާޑުން ހޮނިހިރު ދުވަހު ނެރުނު ބަޔާނެއްގައި ބުނީ ސީދާ އަލިފާން ނިއްވުމުގައި ތިބި 200 ސިފައިންގެ އިތުރުން އެތައް ސަތޭކަ އަސްކަރީ ފުލުހުން އެހީތެރިކަން ފޯރުކޮށްދެމުންދާކަމަށެވެ.

އަލިފާން ނިއްވުމުގައި އަސްކަރީ މަތިންދާބޯޓުތައް ވެސް ވަނީ ބައިވެރިވެފައެވެ.

އެމެރިކާގެ ލޮސް އެންޖެލިސް ކައުންޓީގައި ރޯވި އަލިފާނުގެ ބޮޑު ހަތަރު އަލިފާނުގެ ތެރެއިން އެންމެ ބޮޑު އަލިފާންގަނޑު ކަމަށްވާ ޕެލިސޭޑްސް އަލިފާން ގަނޑުން ކޮންޓްރޯލް ކުރެވުނީ 11 އިންސައްތަ ކަމަށް ކެލްފަޔާއިން ބުނެއެވެ.