logoEN
ދުނިޔެ

ހަނގުރާމަ ހުއްޓާލުމުގެ އެއްބަސްވުމަށް އިސްރާއީލުން އަމަލުނުކުރާނެކަމުގެ ސިގްނަލެއް

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ

ހަނގުރާމަ ހުއްޓާލުމުގެ އެއްބަސްވުމަށް އިސްރާއީލުން އަމަލުނުކުރާނެކަމުގެ ސިގްނަލެއް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދީފިއެވެ.

ޣައްޒާއާއި ހަނގުރާމަ ހުއްޓާލުމުގެ އެއްބަސްވުމަށް ރުހުން ދިނުމަށް މިއަދު ބާއްވަން ނިންމި ކެބިނެޓް ބައްދަލުވުން ވަނީ ކެންސަލްކޮށްފައެވެ.

ނަތަންޔާހޫ ނެރުނު ބަޔާނެއްގައި ބުނެފައިވަނީ ހަމާސް އިން އިސްރާއީލާއެކު ވެފައިވާ އެއްބަސްވުމުގެ ބައެއް ބައިތަކަށް ރައްދު ދެނީ އެންމެ ފަހު ވަގުތު ލުއިތައް ހޯދުމުގެ ގޮތުން ކަމަށެވެ. އަދި ހަމާސް އިން އެއްބަސްވުމުގެ ހުރިހާ ކަމެއް ބަލައިގެންފައިވާ ކަން އިސްރާއީލަށް އަންގަންދެން އިސްރާއީލުގެ ކެބިނެޓް ނުބާއްވާނެކަމަށްވެސް އޭނާ ބުންޏެވެ.

އިސްރާއީލުގެ މި ނިންމުމާ ގުޅިގެން ހަމާސްގެ އިސް އޮފިޝަލެއް ކަމަށްވާ އިއްޒަތު އަލް ރިޝޭގު ނެރުނު ބަޔާނެއްގައި ވިދާޅުވީ ފަލަސްތީނުގެ އަސްކަރިއްޔާއިން ބުދަ ދުވަހު އިއުލާނުކުރި ހަނގުރާމަ ހުއްޓާލުމުގެ އެއްބަސްވުމަށް ވައުދުވެފައިވާ ކަމަށެވެ. ނަމަވެސް، އިސްރާއީލުގެ ބައެއް އާއިލާތަކުން ވަނީ ސަޕޯޓަރުންނާ އެކު ނަތަންޔާހޫގެ އޮފީސް ކުރިމަތީގައި އިހުތިޖާޖުކޮށް، ހަމާސްއާ އެކު ގައިދީން ބަދަލުކުރުމުގެ އެއްބަސްވުމުގައި ކެބިނެޓުން ސޮއި ނުކުރުމަށް ގޮވާލައިފައެވެ.

ޣައްޒާގައި ތިބި ގިނަ އަދަދެއްގެ ގައިދީން އަނބުރާ ގެނައުމަށް ނަތަންޔާހޫއަށް އެތެރޭގެ ބޮޑެތި ޕްރެޝަރުތަކެއް ކުރިމަތިވެފައިވާއިރު، އޭނާގެ ހަރުކަށި ފިކުރުގެ ކޯލިޝަންގެ ބައިވެރިން ވަނީ މާ ގިނަ ލުއިތަކެއް ދީފިނަމަ ސަރުކާރު ވައްޓާލާނެ ކަމުގެ އިންޒާރު ދީފައެވެ.

ބުދަ ދުވަހުގެ ފަތިހުން ފެށިގެން ގުނަމުން ދިޔަ މަރުވި މީހުންގެ އަދަދު އިތުރުވަމުން ދިޔައީ ބުދަ ދުވަހުގެ ރޭ އިސްރާއީލާއި ހަމާސްއާ ދެމެދު ހަނގުރާމަ ހުއްޓާލުމުގެ އެއްބަސްވުމަކަށް އާދެވުނު ކަމުގެ ޚަބަރު ކުޑަ ވަގުތުކޮޅަކަށް އުފާފާޅުކުރުމަށްފަހު ފަލަސްތީނު މީހުން އެމީހުންގެ ޓެންޓުތަކުގައި ހިމާޔަތް ހޯދަމުން ދަނިކޮށެވެ. މިގޮތުން ޣައްޒާގައި އިސްރާއީލު ސިފައިން މިހާތަނަށް 82 މީހުން ޝަހީދުކޮށްލާފައިވެއެވެ.

އިސްރާއީލުން ޣައްޒާގައި ކުރަމުންދާ ހަނގުރާމައިގައި 2023 ވަނަ އަހަރުގެ އޮކްޓޯބަރު މަހުގެ ހަތްވަނަ ދުވަހުން ފެށިގެން މިހާތަނަށް ފަލަސްތީނުގެ 46،707 މީހުން ޝަހީދުވެ، 110،265 މީހުން ޒަޚަމްވެފައިވެއެވެ.

ކޮމެންޓް

871x217_placeholder