ގުދަނުގައި ހިނގި އަލިފާނުގެ ހާދިސާގައި 22 މީހަކަށް ވަގުތީ ބޯހިޔާވަހިކަން


23 ޖެނުއަރީ 2025 - 12:17
ރޭ ފަތިހު މާލޭ ފުރުޓް ޓްރީ އެޕަލް ފިހާރަ ގުދަނުގައި ހިނގި އަލިފާނުގެ ހާދިސާގައި ލިބުނު ގެއްލުންތަކުގެ ސަބަބުން 22 މީހަކަށް ވަގުތީ ބޯހިޔާވަހިކަން ހަމަޖެއްސުމުގެ މަސައްކަތް ނޭޝަނަލް ޑިޒާސްޓަ މެނޭޖްމަންޓް އޮތޯރިޓީ (އެންޑީއެމްއޭ) އިން ފަށައިފި އެވެ.
އެގޮތުން، 5 ގޭބިސީއެއްގެ 14 ދިވެހިން އަދި 8 ބިދޭސީންނަށް ވަގުތީ ބޯހިޔާވަހިކަމާއި ކެއިންބުއިން ހަމަޖެއްސުމުގެ މަސައްކަތް ކުރަމުންދާ ކަމަށް އެމްޑީއެމްއޭ އިން ވަނީ ހާމަކޮށްފައެވެ.
އެ އިދާރާއިން ހާމަކޮށްފައިވާ ގޮތުން، އަލިފާނުގެ ހާދިސާގައި ދުމުގެ ސަބަބުންނާއި އިމާރާތައް ލިބުނު ގެއްލުންތަކުގެ ސަބަބުން ވަގުތީ ބޯހިޔާވަހިކަން ބޭނުންވާ 10 ގޭބީސީއެއްގެ 33 މީހަކު ފާހަގަކުރެވިފައިވެއެވެ. އެއީ 14 ދިވެހިންނާއި 19 ބިދޭސީންނެވެ.
ރޭ ފަތިހު 04:20 ހާއިރު ގުދަނުގައި ރޯވި އަލިފާންގަނޑު އެއްކޮށް ނިއްވާލާފައިވަނީ ހެނދުނު 06:00 ހާއިރު ކަމަަށެވެ. ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ. އެކަމަކު އަލިފާން ރޯވި ގުދަން ވަނީ ބޭނުން ނުކުރެވޭ ވަރަށް އަނދާފަ އެވެ.